{idkey=2281b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F310-mike-eman-nos-mester-di-un-conseho-fiscal-di-nos-mesun-diseno-y-forsa-pa-mantene-un-conexion-y-responsabilidad-cu-pueblo%3FItemid%3D101][title=Mike+Eman%3A+Nos+mester+di+un+Conseho+Fiscal+di+nos+mesun+dise%C3%B1o+y+forsa+pa+mantene+un+conexion+y+responsabilidad+cu+pueblo][desc=Como+lider+di+nos+pais%2C+Prome+Minister+Mike+Eman+tabatin+na+su+encarga+e+discurso+di+apertura+na+e+sesion+di+trabou+pa+establecimento+di+un+Conseho+Fiscal+pa+Aruba.+E+encuentro+di+tur+partido+envolvi+tabata+organisa+pa+Ministerio+di+Finanzas+y+Organisacion+Gubernamental%2C+hunto+cu+Banco+Central+di+Aruba+y+Fondo+Monetario+Internacional+%28IMF%29.+Den+su+palabra%2C+e+mandatario+a+pone+enfasis+riba+necesidad+pa+reevalua+y+adapta+e+sistema+di+un+pais+pa+cumpli+cu+e+demandanan+di+tempo+actual+y+con+cualkier]}Como lider di nos pais, Prome Minister Mike Eman tabatin na su encarga e discurso di apertura na e sesion di trabou pa establecimento di un Conseho Fiscal pa Aruba. E encuentro di tur partido envolvi tabata organisa pa Ministerio di Finanzas y Organisacion Gubernamental, hunto cu Banco Central di Aruba y Fondo Monetario Internacional (IMF). Den su palabra, e mandatario a pone enfasis riba necesidad pa reevalua y adapta e sistema di un pais pa cumpli cu e demandanan di tempo actual y con cualkier entidad mester gosa di e credibilidad moral den comunidad pa por eherce su funcion. Den e caso di e Conseho Fiscal, no ta diferencia. Nan tin e tarea di duna e debido proceso y ehecucion di e decisionnan dificil, pero necesario cu a wordo tuma pa resguarda e bienestar economico y social di un pueblo.

Minister President a inicia treciendo dilanti e palabranan di un di e fundadornan di estado Mericano, Thomas Jefferson caminda ta indica cu cada generacion of mas, un pais mester tuma su modelo politico y economico y pone bou di luz di un dia nobo pa evalua y huzga si e ta ainda sostenibel of mester di un cambio. Pesey mes, na inicio di un reflexion riba un Conseho Fiscal pa Aruba, e mandatario a haya necesario pa su mes reflexiona riba e obhetivo di nos pais y e proposito di tal conseho.

“E comunidad Arubano tin un balansa saludabel entre e buskeda di felicidad y e racionalidad con pa logra esey. Mester implementa structuranan cu ta haci nos sistema mas fuerte y sostenibel,” Premier Eman a menciona. Esaki ta un balansa presente den nos historia for di inicio di siglo pasa durante e lucha pa independencia y mas laat den crisis economico. “Nos tin consenshi y sabiduria pa reconoce e limitacionnan fisico, pero tambe e potencial. A scoge pa keda den Reino, pero cu e libertad di un estado autonomo.”

Un situacion similar a ripiti na 2009 ora cu Gabinete Mike Eman I a instala y tabatin retonan economico grandi. Crisis mundial y ciere di refineria a causa un desempleo di casi 12% y un caida di 15% den e Producto Domestico Bruto (GDP). Gobierno a opta pa trece e comunidad hunto y instala e plataforma di Dialogo Social. E tabata un historia destina pa ripiti. Loke si no a opta pa haci di nobo, ta e formula di bet tur cos riba turismo. “Na luga di uza e receta bieu, a wak loke en berdad Aruba tin mester,” Minister President a indica.

Den un analogia inspira pa Bijbel, e mandatario a splica na e sala yen di lider y intelectualnan economico, cu Aruba a para dilanti di un porta hancho y un porta smal. “A scoge pa inverti den renobacion di ciudad y barionan, e poder di compra di nos hendenan, den infrastructura, espacionan publico y restauracion di monumentonan. Haya e conexion entre desaroyo economico y bienestar ta un parti esencial di e vision di Gobierno di Aruba pa futuro,” tabata e palabranan di Premier Eman. A introduci un model nobo di acercamento pasobra mientras cu pa hopi experto austeridad ta e solucion den tempo di crisis, otronan, cu por ehempel, Premio Nobel den economia, ta boga pa inversion y incentivo.

Y e resultado di e prome termino ta papia pa su mes. Cifranan ta mustra cu turismo a crece, desempleo a baha y economia ta creciendo. E mandatario ta admiti cu tin un debe y esey ta e mision di e di dos termino, esta pa yega na un presupuesto balansa pa reduci e debe. Aki ta caminda e Conseho Fiscal ta cay aden. “Nos ta kere cu un conseho fiscal basa den nos mesun diseño y nos mesun forsa ta algo cu nos mester haci,” Premier Eman a bisa.

Den mesun rosea a señala cu e sistemanan semper mester tin un conexion y responsabilidad cu pueblo. “Cualkier sistema cu ta perde e base y principionan di ‘pa e pueblo, di e pueblo y dor di e pueblo’ ta perde e sosten den e comunidad. Ni con maske independiente bo haci nan, den tempo di crisis economico y institucionnan bin abou, bo mester tin entidad y funcionarionan cu credibilidad y vision pa guia e caminda.”

Por ultimo, Premier Eman a splica cu mientras nos ta bay over un conseho fiscal, un entidad profesional cu por husga e presupuesto di un pais y pone e standard pa gobierno y Parlamento mantene nan, tambe ta importante pa desaroya un institucion cu tin mes tanto moral y credibilidad den e comunidad cu lo duna bo e evaluacion di cada medida cu tuma. Kico crecemento economico ta nifica pa e ciudadano. Prome Minister Mike Eman a finalisa su turno bisando “Mescos cu nos ancestronan, e mester ta un acercamento balansa entre e curason y e mente.”

Expresionnan haci den e articulo aki no necesariamente ta refleha opinion di ArenaPoliti.co