{idkey=9767b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3121-parlamentario-mr-xiomara-maduro-mep-gabinete-eman-kier-legalisa-triki-pa-drecha-cara-financiero-y-politico%3FItemid%3D101][title=Parlamentario+mr.+Xiomara+Maduro+%28MEP%29%3A+Gabinete+Eman+kier+legalisa+%E2%80%98triki%E2%80%99+pa+drecha+cara+financiero+y+politico][desc=Dialuna+Parlamento+a+atende+den+reunion+publico+e+cambio+di+e+ley+di+SVB+pa+asina+Gobierno+por+libra+di+un+debe+na+SVB+por+medio+di+un+exoneracion+di+debe+%28kwijtscheldig%29%2C+pa+cambia+e+loongrens%2C+pa+pasa+placa+di+e+Fondo+di+Cessantia+pa+e+Fondo+di+Malesa+y+pa+formalisa+algun+rekisito+di+e+Ley+di+Zwangerschapsverlof+aproba+na+2007.+Pero+e+motibo+mas+urgente+cu+Gabinete+Eman+ta+haci+e+cambio+di+ley+aki+ta+pa+legalisa+un+%E2%80%98triki%E2%80%99+financiero+pa+nan+por+drecha+cara+financiero+y+politico.Presenta+pr]}
Dialuna Parlamento a atende den reunion publico e cambio di e ley di SVB pa asina Gobierno por libra di un debe na SVB por medio di un exoneracion di debe (kwijtscheldig), pa cambia e loongrens, pa pasa placa di e Fondo di Cessantia pa e Fondo di Malesa y pa formalisa algun rekisito di e Ley di Zwangerschapsverlof aproba na 2007. Pero e motibo mas urgente cu Gabinete Eman ta haci e cambio di ley aki ta pa legalisa un ‘triki’ financiero pa nan por drecha cara financiero y politico.

Presenta presupuesto mas bunita
Gobierno tin un debe na SVB cu ta data di tempo cu nos Pais a conoce su Status Aparte. E debe aki claramente ta aparece riba e balansa di nos Pais y ta pisa hunto cu e otro debeben den e MEGADEBE crea pa Gabinete Eman. Como cu nos ta bou di curatela di Hulanda den forma di e supervicion financiero di CFT, Gabinete Eman ta bou di e precion pa busca tur sorto di ‘triki’ pa por mustra un presupuesto cu cifra mas bunita posibel. Y aki ta na unda nan a pensa pa libra Gobierno di un debe na SVB y haci pasa cu esaki ta un entrada incidental den 2015 y di e manera aki logra presenta un presupuesto na CFT cu un deficit hopi mas abou. CFT no a keda convenci di e ‘triki’ aki y a duna su critica na Gabinete Eman. Minister Bermudez no a worry cu locual CFT a cuestiona, ya cu e sa cu e mayoria den Parlamento lo bay legalisa e ‘triki’ aki haciendo e cambio necesario den e ley di SVB.

Faceta positivo pa evita voto contra
Claramente, e parti di manipulacion no por keda atras. Pa legalisa e ‘triki’ aki Gabinete Eman a inclui den e cambio di Ley di SVB algo positivo manera e cambionan necesario pa e Ley di zwangerschapsverlof di 2007 por traha mas optimal. Door di inclui e parti positivo aki, Gabinete Eman kier evita cu esnan cu sa di e wega sushi di AVP y e ‘triki’ cu nan kier legalisa, vota contra e Ley. E ora nan tin algo tambe pa desvia atencion di e ‘triki’ door di ataca esnan di opocicion tildando nan di ta contra e faceta positivo di e cambio di Ley di SVB. Esaki ta e modus operandi di manipulacion di AVP cu nos por spera asina e Ley keda aproba.

Kier drecha cara financiero y politico
Cu e ‘triki’ di exoneracion di e debe na SVB, Gabinete Eman kier purba pa drecha nan cara financieramente y politicamente. E ‘triki’ aki ta yuda Gobierno presenta cifranan mas bunita cu ta resulta den un rapport mas favorabel di CFT pa 2015. Di e manera aki Gabinete Eman kier mustra cu e ta drechando e situacion financiero di nos Pais y consecuentemente nan por drecha nan cara politico y asina keda na poder.

Manipulacion no lo hiba nos na progreso
Ta un lastima cu Gabinete Eman den e cambio di Ley di SVB tambe ta recuri na manipulacion djies pa por keda na poder. Manipulacion no lo hiba nos na progreso. Nos Pais lo conoce progreso di berdad, dia nos wordo goberna pa hendenan cu tin e fatsoen politico di no mester legalisa ‘triki’ y recuri na manipulacion pa drecha cara financiero y politico.

11 april 2016

Expresionnan haci den e articulo aki no necesariamente ta refleha opinion di ArenaPoliti.co