{idkey=788b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3194-abo-chichi-ta-puntr-abo%3FItemid%3D101][title=ABO%3A+Chichi+ta+puntr%26%23039%3Babo...][desc=Na+Aruba+placa+ta+mas+importante+cu+bida+di+hende%2C+den+tur+sentido.+Comer+Ida%2C+berdad+cu+un+acto+ilegal+a+keda+cometi+ora+esun+persona+a+fia+su+carchi+di+AZV+na+e+se%C3%B1ora+di+22+a%C3%B1a+cu+a+fayece+y+un+di+su+babynan+tambe.+Pero+e+fayo+no+ta+di+e+se%C3%B1ora+ni+di+hospital.+E+fayo+ta+sinta+den+e+sistema+cu+no+ta+funciona+manera+mester+ta.+Si+cierto+instancianan+ta+haci+nan+trabou%2C+anto+nan+lo+tabata+sa+cu+e+se%C3%B1ora+aki+a+bira+ilegal+for+di+un+cierto+tempo+caba+y+nan+lo+mester+a+tuma+medida.+Pero+manera+]}
Na Aruba placa ta mas importante cu bida di hende, den tur sentido. Comer Ida, berdad cu un acto ilegal a keda cometi ora esun persona a fia su carchi di AZV na e señora di 22 aña cu a fayece y un di su babynan tambe. Pero e fayo no ta di e señora ni di hospital. E fayo ta sinta den e sistema cu no ta funciona manera mester ta. Si cierto instancianan ta haci nan trabou, anto nan lo tabata sa cu e señora aki a bira ilegal for di un cierto tempo caba y nan lo mester a tuma medida. Pero manera casi tur instancia na Aruba: no tin control, no tin servicio, no tin comunicacion interno.

Comer Ida, bo sa di con mi ta bisa cu placa ta mas importante na Aruba? Paso tur hende ta keda puntra ta ken ta bay paga e carchi di AZV cu e señora ilegal a ‘fia’. Pero NINGUN HENDE, NINGUN MOMENTO ta puntra con a para cu e criatura di dje cu a keda bibo! NINGUN hende ta puntra kico ta bay para di su bida. Ay... si nos bestianan di stimacion mes nos ta maltrata, ta kico ta hende...

Diahuebs siman pasa e trahadonan di Biblioteca Nacional mester a bay cas. Problema cu airco, entre otro. Ta apenas poco tempo pasa a drecha BNA cu tabata casi cay den otro. Atrobe tin problema cu airco, anto no tin un bentana cu ta habri. E arkitectonan cu a studia na Hulanda lo a lubida cu Aruba ta cayente y cu ta p’ esey nos tin bentana cu ta habri pa laga aire fresco circula.

Fuera di problema cu airco tin mas otro ta lanta cabes atrobe. E mesun plafond cu a drecha biaha pasa ta biniendo abou atrobe. Ta ki sorto di trabou a wordo haci? Ta mescos cu cierto scol cu a caba di renoba y ya tin muraya cu a sker caba. Chichi kier sa si ta controla e trabounan riba calidad? Ahng, anto señora minister Hooyboer, esunnan cu ta conseha bo acaso no sa di experiencia cu riba diasabra NIUN hende ta bishita Biblioteca? Placa di Chichi tira afo y ainda bo ta stroba e trahadonan di tin un bida social por nada.

Gobierno ta cambiando luznan bieu pa luznan LED. E problema ta cu e luznan LED no ta ilumina mes bon cu esunnan bieu. Pero comokiera cu Aruba ta un ‘living lab’ y probablemente e luznan aki ta parti di un ‘pakete’, tin cu haci manera e dicho Hulandes ta bisa: ‘een gegeven paard kijk je niet in de bek’. E’n ta asina cos ta?

Y papiando di laboratorio...e proyecto ‘Smart Community’ ta masha bunita como idea. Pero ta di con net nos hendenan mester ta proefkonijn? Anto riba dje bo tin cu paga tambe! Chichi ta haya cu ya cu ta un ‘living lab’ e ta, NO mester cobra un cen di huur, awa, coriente of salubridad.

Chichi cu comer Ida a pasa basta tempo ta ‘google’ con ‘safe’ e tipo di proyectonan aki ta pa salud di hende. Pero nada... informacion riba salud no ta ni aparece. E investigacion ey lo no ta mucho importante. En todo caso, ainda lo dura basta aña prome cu por bisa si e ta bale la pena of no. E pregunta mas importante awo ta, CUANTO e ‘living lab’ aki ta costa Aruba? Y ki benefishi economico e tin pa nos isla?

Loke falta tambe ta informacion adecuado pa e comunidad den caso di un calamidad. Aki poco temporada di horcan ta cuminsa y te awe Chichi no sa unda tin shelter pa sconde warda horcan pasa, te pa sa kico mester haci den caso di un terremoto...

Informacion pa pueblo ta poco y hopi biaha troci. Den e caso di tiramento di Ranchostraat marduga di diadomingo, por ripara cu algun reportero sa mas cu otro. Ta papia di  bendedonan di droga cu ta bringa cu otro pa gana tereno. Di con e tipo di informacion aki no ta wordo divulga como informacion general pa pueblo sa kico ta pasando? Of ora cu cierto droganan nobo, manera e ‘Devil’s Breath’, haci su entrada na Aruba, di con autoridadnan concerni no ta duna pueblo informacion amplio di kico e ta, kico e ta haci etc. en bes di warda e prome victima cay pa despues bin cu e informacion? Chichi ta kere cu pueblo tin derecho riba informacion di forma ‘preventivo’. Bay de weey, no ta den Ranchostraat so... ta henter Aruba ta sufri di e tipo di cosnan aki. Ta cuanto baca mas tin cu hoga prome cu haci e ‘link’ cu e pos cu ta habri?  


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co