{idkey=3633b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3316-dangui-oduber-mep-turismo-den-problema-serio-rev-par-ta-cai-cu-17-2%3FItemid%3D101][title=Dangui+Oduber+%28MEP%29%3A+Turismo+den+problema+serio.+REV+PAR+ta+cai+cu+17.2%25%21][desc=Aunke+minister+Otmar+Oduber+no+kier+mira+e+realidad+y+ta+keda+bisa+lo+contrario%2C+e+realidad+di+nos+turismo+ta+uno+hopi+preocupante.+Otmar+Oduber+mester+atende+cu+e+situacion+aki+y+stop+di+ta+terco.+Turismo+ta+loke+tur+ciudadano+ta+biba+di+dje+directo+of+indirecto.+Aruba+ta+e+di+2+pais+na+mundo+cu+ta+mas+dependiente+di+turismo.+E+situacion+for+di+hopi+tempo+no+ta+uno+bon.+Banco+Central+di+Aruba+a+pone+den+su+rapport+di+anja+2015+cu+anja+2015+a+cera+cu+NINGUN+crecemento+economico+y+esaki+ta+debi+n]}
Aunke minister Otmar Oduber no kier mira e realidad y ta keda bisa lo contrario, e realidad di nos turismo ta uno hopi preocupante. Otmar Oduber mester atende cu e situacion aki y stop di ta terco. Turismo ta loke tur ciudadano ta biba di dje directo of indirecto. Aruba ta e di 2 pais na mundo cu ta mas dependiente di turismo. E situacion for di hopi tempo no ta uno bon. Banco Central di Aruba a pone den su rapport di anja 2015 cu anja 2015 a cera cu NINGUN crecemento economico y esaki ta debi na e situacion den nos turismo. CAFT tambe a pone den su jaarverslag cu e economia na Aruba ta stagna. Con Otmar Oduber kier sigui insisti den ganja pueblo cu turismo ta bon si no tin crecemento economico y si e cantidad di placa cu cada turista ta gasta durante si estadia a cai cu 10%. Actualmente cada turista cu Otmar Oduber ta trece ta gasta 300 florin riba su estadia. Loke nos mester remarca ta e hecho cu actualemte e minister ta gastando 73 miyon florin na mercadeo y algun siman atras a pidi parlamento aproba 20 miyon florin addicional di e fondo di emergencia pa usa den mercadeo. E minister aki tin casi 100 miyon florin na su disposicion pa usa na mercadeo y e resultado ta uno pessimo. Na anja 2008 tawata usa 26 miyon florin na mercadeo y e turistanan tawata laga mas placa atras den nos economia.
E cifranan den e sector hotelero ta loke mas ta preocupa nos. Hotelnan ta bashi pa mas cu un anja caba. E REV PAR cu ta e revenue per available room cu ta un indicador hopi importante den turismo ta cayendo pa 13 luna consecutivo. E REV PAR den luna di april 2016 a cai cu 17.2%. E caida aki ta un indicacion cu hotelnan ta haya na mes forza pa reduci nan prijs di camber pa asina por haya turista of localnan pa yena e cambernan aki. Na momento cu REV PAR ta cai di e manera cu e la cai ta pasobra e calidad di turistnan ta inferior. Bo ta mira tur e advtertencianan cu ta wordo haci den medionan di communicacion y den social media caminda hotelnan ta ofrece camber cu prijsnan reduci. Si turismo tawata bon, e camber di hotelnan lo tawata yen y tambe e REV PAR lo tawata creciendo y NO cayendo. Nos ta sumamente preocupa cu e situacion den nos turismo actual pasobra na momento tin un minister na cabez di e un di e carteranan di mas importante ta terco y no kier reconoce cu tin problemanan den e sector aki dificilmente e por atende cu esakinan. Tur esnan cu ta traha den e sector aki ta sintiendo di e efectonan. Taxistanan ta kehando, waiternan ta kehando, bartendernan ta kehando, esnan cu ta labora riba beach ta kehando. Anja 2016 ta un anja hopi dificil pa loke ta trata turismo. Nos ta urgi Otmar Oduber pa sinta cu AHATA pa atende cu e problemanan cu tin den nos turismo. E probleman aki di hotelnan bashi, REV PAR cayendo, turismo crusero den crisis no por keda wordo ignora. Hunto cu nos partnersnan den nos turismo mester habri un dialogo pa bin cu solucion. Tin hopi factornan ta afectando nos turismo y e minister ta morto na sonjo. Awor e kier bin cu un plan pa wak con turistnan por gasta mas placa den nos economia. Unda e minister aki tawata e ultimo 7 anjanan aki??? Ta un falta di respet pa pueblo y berguenza cu awor e kier traha un plan?? MEP tin un plan y e plan ta ensera entre otro pa usa e fondonan di mercadeo eficientemente, upgrade nos sector turisitico, eleva nos nivel di servicio y percura pa nos por ofrece un producto di calidad na nos turistnan. Mester bin un evaluacion unda nos ta para y unda nos kier bai! Sin tuma accion nos no ta tega ningun caminda! 

Expresionnan haci den e articulo aki no necesariamente ta refleha opinion di ArenaPoliti.co