{idkey=1272b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3345-ministerio-di-turismo-minister-oduber-conhuntamente-cu-ata-a-haci-entrega-di-750-mil-florin-na-aruba-hospitality-security-foundation%3FItemid%3D101][title=Ministerio+di+Turismo%3A+Minister+Oduber+conhuntamente+cu+ATA+a+haci+entrega+di+750+mil+florin+na+Aruba+Hospitality+%26amp%3B+Security+Foundation][desc=Pa+aspectonan+di+siguridad%26amp%3Bnbsp%3BMinister+di+Turismo+Otmar+Oduber+y+ATA+tabata+presente+hunto+cu+directiva+di+Aruba+Hospitality+and+Security+Foundation+den+un+conferencia+di+prensa+unda+cu+a+anuncia+cu+ATA+lo+contribui+cu+e+bunita+suma+di+750+mil+florin+na+Aruba+Hospitality+and+Security+Foundation.+E+fondo+aki+ta+brinda+e+oportunidad+pa+contribui+na+siguridad+di+nos+bishitantenan+specialmente+den+area+turistico.Minister+Oduber+ta+mira+esaki+un+hecho+special+mirando+cu+ta+trata+aki+di+siguridad+di]}
Pa aspectonan di siguridad 

Minister di Turismo Otmar Oduber y ATA tabata presente hunto cu directiva di Aruba Hospitality and Security Foundation den un conferencia di prensa unda cu a anuncia cu ATA lo contribui cu e bunita suma di 750 mil florin na Aruba Hospitality and Security Foundation.
E fondo aki ta brinda e oportunidad pa contribui na siguridad di nos bishitantenan specialmente den area turistico.
Minister Oduber ta mira esaki un hecho special mirando cu ta trata aki di siguridad di nos bishitantenan berdad pero tambe como un aporte na frena criminalidad riba nos isla na mes momento.
E mandatario ta indica cu e tarea aki no ta uno individual pero ta hunto nos por logra combati criminalidad riba nos isla y yega na e siguridad desea.
Esaki ta di cinco aña cu ATA, desde cu el a bira un organisacion Sui Generis, ta cumpli cu un deber cu AHATA tabata cumpli cun’e via di AHSF. Un biaha mas a haci entrega di un check di ¾ miyon florin, cu ta wordo pasa pa AHSF pa aspectonan di siguridad, di cual den gran mayoria ta bay pa Cuerpo Policial di Aruba.
“Mi ta kere cu na prome luga mester elogia e trabou cu ta wordo haci door di e team hopi limita cu ta labora den area turistico banda di hotelnan como na e beachnan na San Nicolas, y downtown Oranjestad,” Minister Oduber a expresa.
E minister ta enfatisa cu e grupo cu ta labora den e area aki ta limita pa tur loke nan mester haci.

Pesey nan ta spera di por keda contribui y cu mas recurso na e grupo aki.
“Nos ta contribui pa por tin e oficina cerca den centro di ciudad y tur hende por mira un diferencia den e area rond di nos haf compara cu antes, ora cu tabata haya hopi adicto ta cana rond. Esaki no ta e caso mas door di e presencia di autoridad den e area importante aki,” Oduber a duna di conoce.
Ayera mainta tambe e Minister di Turismo a expresa cu e trabou di e Polisnan den e area ta bay haya un peso adicional na momento cu e Beach Policy drenta na vigor.
Aki el a recorda cu recientemente for di fondo di turismo cu a wordo genera door di Triple A a pone un suma disponibel pa seccion di Brandweer na aeropuerto, cu tin su limitacionnan pa falta di material.
A logra saca man pa brinda un ayudo na Minister di Husticia, bou kende Servicio di Brandweer ta cay, dunando un suma di 2,5 miyon florin pa cumpra trucknan nobo pa Brandweer. Esaki tabata posibel pasobra Aeropuerto a genera 4 miyon florin extra di entrada cu no tabata presupuesta.
Pa loke ta e suma entrega na AHSF, e mandatario tabata hopi satisfecho di por cumpli un biaha mas cu palabracion haci. El a enfatisa cu tin espacio pa fondonan wordo poni disponibel pa aspectonan di siguridad pa turismo, cu ta algo sumamente importante (specialmente pa e bishitante cu mester haya un percepcion di bon siguridad na Aruba.
Pesey banda di entrega di e fondo pa AHSF, mirando resultadonan di ATA cu ta mustra un adelanto grandi cu tin, e aña’ki mes lo mira si lo pone fondonan adicional pa sigura e area di hotelnan, cual ta posibel danki na e placa di e turistanan cu ta bishita nos isla tur dia.
Tur esaki cu e meta pa combati criminalidad na Aruba.
“Nos ta kere cu tur minister hunto y sectornan lo logra e meta di frena e actonan cu a tuma luga ultimamente, y traha preventivo pa evita esakinan.”

Expresionnan haci den e articulo aki no necesariamente ta refleha opinion di ArenaPoliti.co