{idkey=9817b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3375-rene-herde-avp-no-tin-motibo-pakico-no-por-tin-miho-cuido-medico%3FItemid%3D101][title=Rene+Herd%C3%A9+%28AVP%29%3A+No+tin+motibo+pakico+no+por+tin+miho+cuido+medico][desc=+Mester+saca+mas+rendimiento+for+di+tur+inversion+den+hende%2C+material+y+infrastructura%21%26amp%3Bnbsp%3B+Dialuna+mainta+9%26%23039%3Bor+minister+di+salubridad+dr.+Alex+Schwengle+ta+reuni+cu+Parlamento+riba+e+critica+cu+tin+den+comunidad+riba+e+nivel+di+cuido+medico.+Despues+di+un+serie+di+reunion+cu+Parlamento+a+tene+cu+diferente+organisacion+den+cuido+medico+riba+e+critica+di+comunidad+riba+e+servicio+medico+na+Aruba%2C+awor+ta+toca+e+minister+pa+contesta+preguntanan+di+Parlamento.+Contrario+na+miembronan+di+oposici]}

Dialuna mainta 9'or minister di salubridad dr. Alex Schwengle ta reuni cu Parlamento riba e critica cu tin den comunidad riba e nivel di cuido medico. Despues di un serie di reunion cu Parlamento a tene cu diferente organisacion den cuido medico riba e critica di comunidad riba e servicio medico na Aruba, awor ta toca e minister pa contesta preguntanan di Parlamento. Contrario na miembronan di oposicion cu ta warda pa pone culpa pa tur cos cu no ta cana bon riba schouder di e minister, Rene Herde', lider di fraccion di AVP ta pensa diferente. Su punto di bista ta cu no tin motibo pakico nos no por tin un cuido medico na Aruba sin tur e puntonan di critica hustifica cu tin den comunidad. Nos tin tur e elementonan necesario pa cuido medico sin e problemanan cu nos tin. Pero apesar di tin tur e elementonan necesario, e resultado final no ta loke ta spera didje. Segun Rene Herde cuido medico ta funciona manera un cadena. Cada renchi di e cadena mester funciona bon pa henter e cadena funciona bon. Pesey cada persona of instancia den e cadena mester percura pa haci nan trabou bon, pasobra e otro persona y instancianan ta depende di nan. E minister su responsabilidad ta pa percura pa henter e cadena funciona bon. Esey ta loke e minister tin cu responsabilisa p'e den Parlamento awe mainta.

RESPONSABILIDAD INDIVIDUAL
Den e reunionnan cu Parlamento a tene cu e organisacionnan manera Hospital, IMSAN, AZV, Asociacion di Docternan di Cas, Asociacion di Specialistanan, e.o. a papia di e critica y e trabou di e organisacionnan y profesionalnan individual. Den e reunionnan a trata e critica cu tin den comunidad riba e servicio na hospital, e servicio di laboratorionan, e servicio di docternan di cas y di specialistanan, e cobertura di AZV, e necesidad pa mas prevencion, etc. Riparabel tabata den tur e reunionnan, cu tur e organisacionnan y docternan ta conciente di problemanan y critica cu tin den comunidad. Den e reunionnan cu e instancianan aki e fraccion di AVP a confronta e organisacionnan den cuido medico y e docternan cu e critica di pueblo y a duna nan ehempelnan concreto pa ilustra e critica. For di e reunionnan cu e docternan en particular por a conclui cu nan mes ta haya cu e cobertura di AZV ta bon, pa tratamentonan cu no por haya na Aruba, tin e posibilidad pa bay afo, casi tur remedi ta disponibel, e docternan tur tin un nivel di estudio halto y nan ta tene nan mes na altura di desaroyonan nobo, e hopital ta bon y ta wordo renova awor. Compara cu hopi otro pais nan ta haya cu tur e elementonan pa bon cuido medico na Aruba tey. E fraccion di AVP a remarca cu si e docternan ta haya cu tur e elementonan necesario pa un bon cuido tey, ta pakico tin e critica y hopi biaha cu bon argumento, riba cuido medico anto?

ORGANISACION
Pa e fraccion di AVP e motibo pakico e cuido medico na Aruba ta bou critica hustifica, no ta pasobra e patientnan ta malcria. E motibo ta cu e organisacion di y entre tur e docternan y organisacionnan den cuido medico tin cu wordo mehora. Tin mucho espacio pa eror, tin mucho falta di control, tin mucho falta di coordinacion entre tur e instancianan y di tur e instancianan hunto, pa sigura un miho cuido di cada patient den cada caso. No tin motibo pa e servicio y e cuido no ta miho y por lo menos mes bon cu na Colombia of Hulanda. Nos docternan a studia na e mes un universidadnan, nan tin e mes un nivel di estudio, nos tin facilidadnan medico cu ta mes bon of miho cu den otro paisnan. Nos tin un seguro medico general cu ta cubri tur hende na Aruba cu un pakete di cuido amplio. Aruba ta inverti mas cu 375 miyon florin pa aña den cuido medico pa 120 mil hende. Si nos tin tur e diferente elementonan essencial pa un bon cuido medico disponibel, e unico cos cu falta ta un bon organisacion di tur e elementonan aki hunto, pa duna cada patient na Aruba e bon cuido cu nan ta spera y merece! 

Expresionnan haci den e articulo aki no necesariamente ta refleha opinion di ArenaPoliti.co