{idkey=1352b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3380-edgard-vrolijk-mep-minister-hooyboer-winklaar-ta-haci-mane-cu-e-no-sa-di-unda-e-norma-usa-pa-colegio-arubano-ta-bin%3FItemid%3D101][title=Edgard+Vrolijk+%28MEP%29%3A+Minister+Hooyboer-Winklaar+ta+haci+mane+cu+e+no+sa+di+unda+e+norma+usa+pa+Colegio+Arubano+ta+bin][desc=Mi+ta+kere+cu+Minister+Hooyboer-Winklaar+mester+ta+mas+serio+si+den+su+actuacion+como+Minister+di+Ense%C3%B1asa+y+stop+di+ta+populista.+Minister+ta+haci+mane+cu+e+no+sa+di+unda+e+norma+usa+pa+Colegio+Arubano+ta+bin.+Awel+laga+nos+record%E2%80%99e+algun+cos%3A%26amp%3Bnbsp%3B+Bao+gabinete+Eman+1+nos+hobennan+di+scol+basico+a+cuminsa+haci+e+test+pa+por+drenta+Colegio+Arubano%2C+tres+a%C3%B1a+escolar+bao+Gabinete+Eman+2%2C+pues+3+a%C3%B1a+bao+di+Minister+Hooyboer-Winklaar+a+sigui+cu+e+test+pa+drenta+Colegio+y+ki+Minister+a+haci+]}
Mi ta kere cu Minister Hooyboer-Winklaar mester ta mas serio si den su actuacion como Minister di Enseñasa y stop di ta populista. Minister ta haci mane cu e no sa di unda e norma usa pa Colegio Arubano ta bin. Awel laga nos record’e algun cos: 

• Bao gabinete Eman 1 nos hobennan di scol basico a cuminsa haci e test pa por drenta Colegio Arubano, tres aña escolar bao Gabinete Eman 2, pues 3 aña bao di Minister Hooyboer-Winklaar a sigui cu e test pa drenta Colegio y ki Minister a haci tur e tempo aki?
• Recientemente su persona a institui un comision di evaluacion di norma y 12 di mei 2016 su persona mester a haya conseho riba esaki. Awel Minister aki ta biba na Aruba of na unda, paso e test a ser haci 22 di april 2016 y cu di comienso di aña 2016  ya scolnan y mayornan ta na altura di e fecha di e test y alabes tambe e fecha cu lo duna resultado y tambe scolnan y mayornan tambe ta na altura di e normanan tentativo cu e alumnonan mester por haal pa drenta Colegio Arubano. Pues Minister, bo ta hopi laat! E comision aki mester a ser institui prome cu aña escolar a cuminsa y cu nan tabatin suficiente tempo pa termina esaki kizas prome cu December esaki mester a keda cla.
• Minister ta na altura por ehempel aña pasa tin mayornan a trece nan obhecion (bezwaar) cerca Colegio Arubano riba e test paso e normering tin alumnonan pa un fout di mas a keda sin drenta? Minister ta na altura cu tin mayor a trece nan obhecion ya cu e normanan ta discriminatorio paso e tabata duna opcion pa 5,3 pa Taal ser recompensa cu un 7,3 pa Rekenen, mientras cu esnan cu haal 7,3 pa Taal y 5,3 pa Rekenen no por a drenta?
• Minister ta na altura cu mayornan despues cu Colegio Arubano a keda mantene nan criteria di admision a acerca e Director di DPS cu e peticion pa evalua e circumstancia di nan yiu cu pa 6 aña tabata e mihor (beste) di su klas y pa un fout di mas e no por a drenta y apela paso Colegio Arubano San Nicolas ta resorta bao di Minister pa e por drenta y cu su director a duna conseho negativo basa riba e normanan di Colegio Arubano su test? Y ta pa ken e director aki ta traha, pues tin di conclui ta Minister su maneho e ta sigui y ta un berguensa paso si boca pafo Minister ta papia bunita pero ora di berdad Minister su actuacion ta completamente otro.
• Minister ta na altura cu e norma di admision usa awo, cu ta un proposicion di Colegio Arubano pa e comision, ta un di e basenan di obhecion di un mayor aña escolar 2014 – 2015? Minister sa cuanto mucha pa hopi aña escolar ya a ser perhudica door di no actua y di con di aña pasa cu e mayor a acerca director di DPS no a bin cu cambionan prome cu comienso di aña escolar 2015-2016?

Pues un biaha mi no ta wak con minister por ta asombra con cos a bay, paso ta su persona mes ta culpable. Tres aña escolar bou di su maneho y sin conta di su colega anterior bao Gabinete Eman 2, a permiti cu nos alumnonan cu no tin e capital pa paga scol priva, ta ser masacra psicologicamente paso pa 6 aña nan a  haci lo maximo y ta parce cu nan ta ser gestraf cu normanan discriminatorio y tambe cu nan esfuerso di 6 aña ta ser benta un banda y un test ta dicidi y mas pio ta cu Minister ta parti di esaki paso e tabatin 3 aña pa actua y awo na final di aña kier actua, cu ta demasiado laat y kier haci mane ta otronan ta fout.
Si Gabinete Eman a sigui cu e plannan di MEP di construccion di Colegio Noord cu nan a para di 2009 pa usa e placa aki den e proyecto di tram y tambe lo a sigui cu e ampliacion di Colegio San Nicolas , Minister no mester mara su mes na ningun test ni norma di admision paso e tin suficiente cupo disponibel pa nos muchanan cu no tin di sufri mas decepcion emocional pa su bon actuacion pa 6 aña na nan scol basico.

Expresionnan haci den e articulo aki no necesariamente ta refleha opinion di ArenaPoliti.co