{idkey=7678b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3388-edgard-vrolijk-mep-despues-di-3-ana-minister-hooyboer-winklaaar-a-realisa-cu-nos-tin-un-problema-di-keda-sinta-den-klas-1-na-aruba%3FItemid%3D101][title=Edgard+Vrolijk+%28MEP%29%3A+Despues+di+3+a%C3%B1a+Minister+Hooyboer-Winklaaar+a+realisa+cu+nos+tin+un+problema+di+keda+sinta+den+klas+1+na+Aruba][desc=Mi+ta+aplaudi+cu+nos+Minister+di+Ense%C3%B1ansa+Hooyboer-Winklaar+cu+ta+campeon+den+actua+na+final+di+un+a%C3%B1a+escolar%2C+a+realisa+despues+di+3+a%C3%B1a+cu+nos+tin+un+problema+di+keda+sinta+den+klas+1+na+Aruba+%28rond+di+13%25%29%2C+en+comparacion+cu+Hulanda+y+otro+paisnan.+E+cifra+aki+ta+bisabo+cu+rond+di+13+di+cada+100+alumno+ta+keda+sinta+%2887+ta+pasa%29.+Nos+a+scucha+cu+Minister+lo+a+bin+cu+un+plan+pa+baha+e+cifra+aki+drasticamente.+Pero+mucho+nos+no+a+tende+mas+di+esaki%2C+pero+den+gang+nos+por+a+tende+cu+Ministe]}
Mi ta aplaudi cu nos Minister di Enseñansa Hooyboer-Winklaar cu ta campeon den actua na final di un aña escolar, a realisa despues di 3 aña cu nos tin un problema di keda sinta den klas 1 na Aruba (rond di 13%), en comparacion cu Hulanda y otro paisnan. E cifra aki ta bisabo cu rond di 13 di cada 100 alumno ta keda sinta (87 ta pasa). Nos a scucha cu Minister lo a bin cu un plan pa baha e cifra aki drasticamente. Pero mucho nos no a tende mas di esaki, pero den gang nos por a tende cu Minister su pensamento ta pa den klasnan 1,2 y 3 muchanan ta pasa y den klasnan 4,5 y 6 e alumno lo por keda sinta. Pero mucho nos no a tende mas di Minister ki e plan di dje ta concretamente y ainda nos ta spera cu Minister por bin pafo y splica esaki. Pero bao di maneho di SKOA si por a tuma nota cu a bin cambionan den normanan di klas1.

Factornan di keda sinta
Na Aruba ta hunga diferente factor cu ta conduci muchanan cu e cifra di keda sinta den klas 1 ta halto y cu nos tin di drecha pa nos por baha e cifra aki pero den forma realistico y sin perhudica niun yiu di hende.

1. Nos muchanan ta ser educa den un idioma stranhero cu ta Hulandes. Pa basta decada ta bin ta debati riba esaki, pero poco a ser haci. Bao Gabinete Eman a introduci dos scol multilingual y pa nos  ta importante pa Minister bin cu cifra con esaki ta bay. Mas tiki alumno ta keda sinta en comparacion cu scolnan cu ta duna les na Hulandes den klas 1? Si esaki ta hopi mas abao ki Minister ta bai haci?
2. Den e porcentahe aki ta encera tambe muchanan cu motibonan cognitivo mester atende un otro tipo di scol pero mester keda atras debi cu e proceso pa test ta tuma su tempo y no ta bay a corto tempo. Con Minister tin pensa di bay percura pa tin suficiente cupo pa e muchanan aki y tambe con Minister ta bay haci cu e proceso aki por bay mas liher sin perhudica e muchanan aki?
3. Den e porcentahe aki tambe ta encera hobennan cu pa motibonan social-emocional cu ta ser perhudica. Con Minister ta bay haci pa e alumnonan aki por haya atencion inmediato? Lo percura pa tin mas ayudo social pa e alumnonan na scol?
4. Den e grupo aki tambe tin hobennan cu nos ta yama ‘onrijp’, pues ainda nan no ta cla pa klas 1. Con Minister tin pensa di atende cu e grupo aki?
5. Na mita di aña escolar ta drenta alumnonan di otro paisnan cu no sa ni Papiamento ni Hulandes. Con Minister ta atende cu e problema aki?
6. Pa un maestro por atende debidamente cu nos hobennan y principalmente cu klasnan grandi (20 y mas) e mester por tin tur e actornan na su lugar na nan scol. Minister por duna nos di conoce cuanto scol tin tur e actornan na nan lugar? Pues cuanto scol tin remedial teacher, Prisma leerkracht, Interne Begeleider, Onderwijsassistent/Klasseassistent etc na nan scol?
7. Ora ta papia di kier yuda mester cuminsa pensa riba nos sistema di evalua nos muchanan cu ta basa riba cifra. Con leu Minister ta pa institui evaluacion a base di nivel di cada mucha y no a base di normanan basa riba cifra?

Cambio den manera di evalua
Pues ta interesante pa sa con leu y con Minister lo atende cu e problemanan cu ta afecta nos hobennan di pasa nan aña, sin conta e infrastructura di scol unda tin scolnan cu den un era cu ta papia di sostenibilidad henter ora, alumnonan tin di sofoca den calor inmenso y kier exigi di nan pa produci. Paso pa baha e cifra di keda sinta ta hopi facil, pero e bahamento aki mester bay cu hopi seriedad sin perhudica niun yiu di hende y sigur ta bon pa Minister splica ki ta su plan riba corto plazo pa tur scol por tin tur e actornan disponibel na scolnan y cambio den manera di evalua cada alumno cu lo yuda sigur nos muchanan di klas 1. Y naturalmente nos kier pa e plan aki ta pas cu nan frase bunita pero aki for nos no ta sinti esaki ta cu:  e plan aki por ta sostenibel y duradero y realisabel y realistico pa tur tipo di enseñansa.

Expresionnan haci den e articulo aki no necesariamente ta refleha opinion di ArenaPoliti.co