{idkey=2615b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3427-gabinete-me-ii-comerciante-y-habitantenan-di-san-nicolas-ta-mira-apertura-di-refineria-cu-hopi-optimismo%3FItemid%3D101][title=Gabinete+ME+II%3A+Comerciante+y+habitantenan+di+San+Nicolas+ta+mira+apertura+di+refineria+cu+hopi+optimismo][desc=Prome+Minister+Eman+y+de+Meza+na+San+Nicolas%26amp%3Bnbsp%3BORANJESTAD+%E2%80%93+Gabinete+Mike+Eman+II+tin+hopi+confiansa+cu+ta+keda+cla+cu+tur+proceso+pa+reapertura+di+refineria+na+San+Nicolas+Citgo+Petroleum+Corporation+como+operador+prome+di+augustus+proximo.+Esaki+ta+e+mensahe+di+Prome+Minister+mr.+Mike+Eman+y+Ministerio+di+Economia%2C+Comunicacion%2C+Energia+y+Medio+ambiente+ing.+Mike+de+Meza%2C+den+di+un+entrevista+despues+di+un+bishita+den+e+centro+comercial+di+San+Nicolas.+Gabinete+Mike+Eman+ta+trahando+duro+]}
Prome Minister Eman y de Meza na San Nicolas 

ORANJESTAD – Gabinete Mike Eman II tin hopi confiansa cu ta keda cla cu tur proceso pa reapertura di refineria na San Nicolas Citgo Petroleum Corporation como operador prome di augustus proximo. Esaki ta e mensahe di Prome Minister mr. Mike Eman y Ministerio di Economia, Comunicacion, Energia y Medio ambiente ing. Mike de Meza, den di un entrevista despues di un bishita den e centro comercial di San Nicolas.

Gabinete Mike Eman ta trahando duro riba revitalisacion di San Nicolas pa basta tempo caba, particularmente riba infrastructura, entre otro na Pastoor Hendrikstraat, inicio di caya principal y un parti di Village. Banda di a traha riba e mehoracion di Infrastructura y reviltalisacion di San Nicolas, tambe a haci trabou di mehora e desaroyo economico di San Nicolas riba tereno fiscal y turistico.

Bou liderazgo di e Minister encarga cu Energia, a logra awor cu reapertura di e refineria a bira un realidad. Banda di cu e refineria ta bolbe opera, e ta bay haci esaki bou exigencianan mucho mas estricto cu antes. Un di e exigencianan ey ta cu mester haci uzo di gas pa opera e compleho petrolero. Esaki ta haci henter e operacion uno mas limpi, y alabes emitiendo mucho menos productonan dañino den nos atmosfera.

Un otro exigencia, cu awendia ta posibel, ta un planta di algen banda di e refineria, cu ta bay captura e carbon cu e e refineria ta produci. Esaki ta haci e refineria uno mucho mas 'berde' nos a conoce antes.

E ministernan a splica cu comerciante y habitantenan di San Nicolas tabata hopi interesa den e desaroyonan aki, loke nan ta mira como desaroyonan positivo pa economia di San Nicolas. “Tur e comentarionan di esnan cu nos a combersa cu nan tabata positivo y nan ta bisa cu esaki ta un Gobierno cu realmente a duna atencion na San Nicolas,” Minister de Meza a bisa na final di e recorido hunto cu Prome Minister na San Nicolas. "Y awor cu e logro pa reapertura di e refineria, e alegria cu a wordo sinti tabata grandi," Prome Minister Eman a agrega.

Manera por corda, Gobierno, mientras cu e tabata busca e reapertura, a sigui traha riba e plan pa re-destina e area di e refineria. “Nos tabata busca un diversificacion, cu a dicidi di bini cu incentivonan fiscal y a busca pone atencion na turismo pa e area aki, drechando Baby Beach. Pero un reapertura tin un impacto mas grandi. Nos ta den e proceso pa mira e frutonan di esaki,” Prome Minister Eman a expresa.

No falta mucho pa yega na e parti di apertura, segun Minister de Meza a señala. E team negociado ta den contacto continuo cu e team di Citgo y ta sincronisando agendanan pa firmamento por tuma luga. Tambe ta trahando riba e proceso pa bay Parlamento y busca aprobacion di cambionan di ley y e pakete den su totalidad. “E plan te ainda ta cu riba prome di augustus e trabounan tin cu ranca sali,” Minister de Meza a bisa. El a agrega cu, aunke cu Parlamento den un luna lo bay cu reces, e ta sigur cu nan lo tene consideracion cu esaki. “E asunto aki ta demasiado importante. Nos ta combersando cu nan pa tene consideracion cu e asunto aki.” Pero Prome Minister Eman tambe a expresa siguransa cu lo alcansa e fecha di prome di augustus cu cooperacion di Parlamento. E mandatario a recorda cu  dia a habri Valero bek tabatin un ley importante cu mester a pasa pa alcansa un fecha poni. Y e tempo ey pa prome biaha Parlamento a traha un sesion special den fin di siman. “Parlamento semper a demostra cu ora ta trata di un proyecto grandi of e refineria cu nan ta dispuesto pa pospone cualkier reces of fin di siman pa un ley asina bira posibel. Nos ta hopi optimista cu nos ta cla riba e fecha cu nos ta desea.”

Expresionnan haci den e articulo aki no necesariamente ta refleha opinion di ArenaPoliti.co