{idkey=4080b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3432-booshi-wever-upp-nivel-di-tanto-parlamento-como-di-e-parlamentarionan-ta-haci-cu-e-organo-aki-no-ta-digno-ni-cla-pa-bira-independiente-ainda%3FItemid%3D101][title=Booshi+Wever+%28UPP%29%3A+Nivel+di+tanto+Parlamento+como+di+e+parlamentarionan+ta+haci+cu+e+organo+aki+no+ta+digno+ni+cla+pa+bira+independiente+ainda][desc=E+escenanan+di+siman+pasa+diaranzon+den+nos+Parlamento+entre+su+presidente+y+su+vice-presidente+ta+muestra+di+un+degeneracion+completo+di+e+organo+mas+halto+di+nos+sistema+constitucional.+Mientras+cu+hopi+ta+esnan+cu+ta+ocupa+nan+mes+cu+e+pregunta+kende+a+dal+kende+prome+y+cu+mester+pidi+dispensa%2C+UPP+ta+kere+cu+tin+preguntanan+mas+clave+cu+tur+21+miembro+di+Parlamento+mester+contesta+na+Pueblo%2C+sin+distincion.Loke+ta+importante+pa+atende+cune+ta+e+acusacionnan+presenta+dor+di+presidente+di+Parl]}
E escenanan di siman pasa diaranzon den nos Parlamento entre su presidente y su vice-presidente ta muestra di un degeneracion completo di e organo mas halto di nos sistema constitucional.
Mientras cu hopi ta esnan cu ta ocupa nan mes cu e pregunta kende a dal kende prome y cu mester pidi dispensa, UPP ta kere cu tin preguntanan mas clave cu tur 21 miembro di Parlamento mester contesta na Pueblo, sin distincion.

Loke ta importante pa atende cune ta e acusacionnan presenta dor di presidente di Parlamento sra. Lopez-Tromp na direccion di sr. Dammers.
Sra. Lopez-Tromp a indica cu sr. Dammers, na momento di a fungi como presidente den ausencia di sra. Lopez Tromp, lo a manda e presupuesto den “rood”, dor di “djoek” esaki, manera e presidente mes a indica.
Tambe a resona – durante e entrevista cu sr. Dammers - e acusacion na direccion di sra. Lopez-Tromp. Dammers a denuncia e hecho cu pa mas di un aña a resulta dificil pa traha cu sra. Lopez-Tromp.

Awor nos por scucha con Prome Minister suplente sr. de Meza ta bin pidi disculpa pa algo cu a sosode den Parlamento, pero no ta wordo papia at all riba e asunto di e keho principal di sra. Lopez Tromp, ni tampoco riba e denuncia cu no por traha cu Lopez-Tromp.
UPP ta kere cu ta importante, awor cu presidente di Parlamento a papia y a acusa sr. Dammers di a “djoek” e presupuesto, pa e bin cu e pruebanan dilanti.
Tambe nos Parlamentarionan, alo menos esunnan di oposicion, por exigi e splicacion aki of duna tambe e informacionnan di e tipo di biahamentonan aki. Pasobra ora di discusion di viahe, oposicion tambe ta acerca.

Pa UPP ta keda un berguenza cu varios Parlamentarionan cu tabata presente na e momento ey, no por sali dilanti y papia loke nan a mira. Particularmente sr. Jeffrey Kelly y Sra. Jennifer Arends-Reyes ta falta cu e pueblo, y unda cu sr. Kelly ta bisa cu ta na sr. Eman, como Minister-Presidente SO e lo duna cuenta. Esaki na su turno ta muestra di un falta di respet y na mes momento ta mustra cu nos Parlamento como organo legislativo y mas halto di nos Pais, practicamente ta secuestra dor di minister-/gobernantenan.
Pues na unda un parlamentario NO ta duna cuenta, mientras unda un minister ta bin papia pa e miembronan di Parlamento. Ki berguenza!!

Otro punto di cuestionamento ta loke cu sr. Dammers a declara den direccion di su presidente y colega di partido.
Esta cu pa mas cu un aña caba no tin bon entendimento y relacion cu presidente di Parlamento.

Nos por a wak cu desde aña pasa presidente di Parlamento a bin ta tuma un rol diferente, desde e.o. cu Caft a bini, votando contra presupuesto di Pais Aruba, votando na fabor di un mocion di desconfianza contra minister sr. Sevinger di su mes partido, mientras tambe ta lanta caso como ciudadano contra mesun un minister aki.
Tambe nos por a tuma nota di e declaracion den Amigo di Aruba, unda cu presidente a bisa, cu despues di sla, cu ta “bala cayente” e mester spera? Aki e lo ta dunando un indicacion cu dia 27 di augustus aña pasa tabata tin hende arma den Parlamento, te cu a wordo tira riba e manifestantenan?

Si tin asina un mal comprendimento y relacion, pakico aña pasa toch sr. Dammers ta vota na fabor di sra. Lopez Tromp pa e bolbe bira presidente? Ki palabracionnan tin anto? Pakico diripiente nos ta tende cu Prome Minister, prome di a bandona nos Pais atrobe, ta papia cu el a reuni cu ambos actor den e comedia aki, y laga parce cu tur cos lo ta cla?
Mientras cu nos por wak Parlamentario Tromp ta remata contra di sra. Lopez Tromp, nos por tende tambe cu sr. Herde lo bin pa pone ordo?

Nos por a tuma nota cu sr. Dammers ta cuestiona ki mishi “un tercera” den Parlamento, refiriendo na casa di sra. Lopez Tromp, ora cu esaki a presenta te den sala.
UPP ta kere cu en berdad aki mester bin claridad riba e aspecto aki, ya cu no ta na su lugar pa esaki presenta sin mas y purba na agredi un Parlamentario.
Nos por comprende cu kizas sra. Lopez -Tromp lo ta sintie intimida den e ultimo temponan aki. No ta pornada el a bisa ariba e asunto ta kico por spera despues, “bala?”.
Pero na momento cu sr. Dammers ta cuestiona e aspecto aki, ta bon tambe pa clarifica kico cierto personanan tabata haci riba 27 di augustus 2015 na momento cu a trata e ley di entrega di autonomia financiero. Ey tambe no ta trata di “tercera”? Y nan tabata arma?

Como miembro di Parlamento den pasado, mi tambe tabata envolvi den casonan unda tabata tin “agresion”. Mi a bisa tambe cu mi no tabata y mi no ta orguyoso di esey, apesar cu mester reconoce cu “aktie roept reaktie”.
Pero na momento cu discusionnan bay for di man, tabata pa casonan fundamental. Pero aki ta resulta cu ta trata pa un asunto di “biahamento”.
Tur hende parce di ta keda keto kico ta e problema real cu sra. Lopez Tromp a atende.
Ta e mesun actitud aki cu nos a bin ta condena pa hopi tempo caba, unda nos a bisa cu tanto Parlamentarionan di AVP como gobierno di AVP ta “toerekeningsvatbaar” pa loke nan a haci.
Pero mientrastanto cu na cabez ta haci y deshaci cu fondonan di pueblo, e Parlamentarionan di AVP no ta interesanan kico ta pasando, pasobra loke nan ta interesa aden, ta e biahamento.

Tur esaki ta haci, cu contrario na loke nos a tende algun siman atras tocante “independisacion” di Parlamento, Parlamento di Aruba no ta cla pa ta independiente.
Na prome lugar pasobra nos ministernan tin e Parlamento secuestra, y na di dos lugar, sin ta independiente mes, sr. Dammers hunto cu otro Parlamentarionan aparentemente ta malusa fondonan den presupuesto, cu pa colmo no t’ey, pa asina nan por sigui biaha.

Nos Pais na e momentonan aki ta den un crisis formal, tambe riba e tereno politico.
P'esey UPP ta keda boga pa bin cu cambionan fundamental den nos sistema democratico parlamentario y gubernamental, y tambe introduccion di reglanan estricto di Good Governance all across the board. Si esaki no sosode, e degeneracion lo continua.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 31, 2016

Expresionnan haci den e articulo aki no necesariamente ta refleha opinion di ArenaPoliti.co