{idkey=5983b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3446-elton-lioe-a-tjam-abo-poniendo-educacion-tambe-na-rudia-pa-un-it-centrum%3FItemid%3D101][title=Elton+Lioe-A-Tjam+%28ABO%29%3A+Poniendo+educacion+tambe+na+rudia%2C+pa+un+%E2%80%98IT-Centrum%E2%80%99][desc=Pueblo+por+ripara+cu+e+campa%C3%B1a+electoral+a+cuminsa.+Gobierno+a+cuminsa+anuncia+y+inicia+varios+proyectonan+miyonario+pa+susha+wowo+di+pueblo.+Semper+e+mesun+rutina+y+semper+e+mesun+cantaleta.+Durante+e+prome+tres+a%C3%B1anan+di+gobernacion%2C+e+interes+di+e+partido+na+mando+%28y+esunnan+liga+na+dje%29+ta+wordo+sirbi.+Mientras+den+e+a%C3%B1a+prome+cu+eleccion%2C+campa%C3%B1a+ta+wordo+haci+cu+placa+di+pueblo+cu+proyectonan+miyonario%2C+cu+tampoco+ta+na+bienestar+di+pueblo+pero+atrobe+ta+sirbi+solo+e+interes+di+e+parti]}
Pueblo por ripara cu e campaña electoral a cuminsa. Gobierno a cuminsa anuncia y inicia varios proyectonan miyonario pa susha wowo di pueblo. Semper e mesun rutina y semper e mesun cantaleta. Durante e prome tres añanan di gobernacion, e interes di e partido na mando (y esunnan liga na dje) ta wordo sirbi. Mientras den e aña prome cu eleccion, campaña ta wordo haci cu placa di pueblo cu proyectonan miyonario, cu tampoco ta na bienestar di pueblo pero atrobe ta sirbi solo e interes di e partido (y esunnan liga na dje). Ultimo añanan varios campaña a wordo gana uzando placa di pueblo, pa despues di eleccion legalisa esaki den parlamento, manera e partido a logra haya un mayoria. Esaki ta un echo contra ley y castigabel, pero ningun musca ta tribi di denuncia esaki y tampoco ministerio publico kier investiga esaki.

Hopi biaha bo ta tende ‘argumentacion/hustificacion’ hopi dom pa hustifica proyectonan miyonario cu no tin sentido ni prioridad, Pero pueblo ta acepta esaki pasobra ‘un mandatario cu vision’ a bis’e y cu e ta mustra ‘bunita’. Pa no lubida e ‘bo ta wak unda bo placa ta bay’. Cu pueblo por mira algun adorno y decoracion, esey no kiermen cu pueblo a ‘wak unda su placa a bay’. Tur e proyectonan aki, nunca tabata presupuesta, tur ta ‘over-budgetted’ y ningun ta representa e balor/costo real. Y a pesar cu mundialmente e ta conoci cu den proyectonan di infrastructura semper tin hopi corupcion, aki na Aruba esaki ta wordo acepta como normal.

Un otro ‘argumentacion/hustificacion’ hopi uza, ta esun di ‘pa hopi aña no a wordo inverti den infrastructura y den edificionan’. P’esey miyones mester wordo inverti awor. Pregunta: Ken a goberna Aruba durante e periodo cu ‘no a wordo inverti’? Pues, ken ta esun culpabel di e deterioro structural? Exacto, e mesun personanan cu ta grita awendia cu nada a wordo haci pa ‘añanan largo’.

Awor cu placa a caba, pero e campaña tradicional di susha wowo di pueblo cu proyecto ta sinonimo cu ‘bon gobernacion’ tin cu sigui, ata e minister di Enseñansa tambe a descubri e instrumento dudoso di Private Public Partnership (PPP). Parce cu e minister tampoco kier realisa cu e forma di financiamento aki, no ta na beneficioso pa pueblo, cu asina parlamento no tin casi ningun control financiero pa 25-30 aña, cu e forma di financiamento aki ta pone mas debe riba e futuro generacionnan y cu recientemente e gremionan a pidi pa investiga tur PPP-proyecto cu a wordo implementa e ultimo añanan aki na Aruba.

E ‘argumentacion/hustificacion’ di e minister cu ’..84 edificio cu ta wordo uza pa scol, mayoria ta entre 40 pa 60 aña bieu y nunca a ricibi un renobacion amplio’ (Bon Dia, 30 Mei 2016), ta mustra claramente con diferente gobierno intencionalmente no a haci nan trabou y a crea e situacion deplorabel aki, pa tin awe e ‘excuus politico’ valido pa fia miyones. Durante 7 aña largo, gobierno tabata mas ocupa di bende pueblo cu verfmento, pone airco y awendia ‘solar panels’, tabata ‘inversion’ den enseñansa. Cu cada aña e nivel di educacion tabata bahando, cu salarionan miyonario tabata wordo paga na diferente rectornan na Colegio of cu ainda ta esunnan di Colegio ta dicidi ken ta drenta Colegio y ken no, esaki no tabata importante pa e mandatario. E minister di Enseñansa tabata mas ocupa cu sacamento di potret banda di scolnan cu ta tuma 100 aña pa wordo renoba, mientras miyones tabata wordo paga pa huur otro edificionan pa ubica e scol mientrastanto. Awor den un aña electoral, e minister di Enseñansa a ‘descubri’ cu ‘70% di e 84 edificionan mester di un renobacion grandi’ y p’esey e ta ‘studiando’ e plannan cu ta ‘inclui tambe sistema di alarma y instalacion di camara pa tur scol, cual ta wordo monitor for di un centro nobo cu lo bira e IT Centrum pa tur na Aruba’, cu lo costa entre 250-300 miyon florin (Bon Dia, 30 Mei 2016).

Unda nos a wak y tende algo parecido anteriormente? Ah si, algun ehempel: e dos proyectonan di camaranan di siguridad banda di hotelnan (uno di hopi aña pasa y uno mas recien). E proyecto di camara banda di e luznan di trafico. E IT proyecto miyonario di e departamento di impuesto cu no tin un fin di termina of tampoco cu ta funciona. Pero keto bay miyones ta wordo paga na ‘consultants’ y tur hende ta keda keto, incluso parlamento.

Tambe e ‘argumentacion/hustificacion’ di e minister di Enseñansa cu: ‘Un condicion clave lo ta cu e PPP lo solamente cubri gastonan relaciona cu e inversion, pero no lo cambia ken ta e doño di e edificio’, tambe ta un locura y un forma di manipula y mal informa pueblo. E minister di Infrastructura tambe a uza e ‘argumentacion/hustificacion’ aki ora e la ‘YUK’ pueblo un debe adicional di casi 1.6 biyon florin pa su cabay di campaña ‘Camindanan ‘Scur’. Interesante pa tende e opinion di su colega, e minister di Husticia (ex-mandatario di Enseñansa) y di e presidente di Staten (tambe un ex-mandatario di Enseñansa) riba e asunto cu 70% di e edificionan ta den un mal estado, p’esey awor tin cu privatisa enseñansa pa haya un ‘IT-Centrum’ pa vigila studiantenan.

Tristo pa mira cu atrobe nada a wordo siña di e pasado y keto bay e enfasis ta wordo poni riba show, populismo y decoracion pa probecho politico, enbes di riba e mucha y su educador.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co