{idkey=6148b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3479-sr-guillfred-besaril-mep-awe-nos-ta-cosecha-loke-a-wordo-planta-durante-e-ultimo-6-ananan%3FItemid%3D101][title=Sr.+Guillfred+Besaril+%28MEP%29%3A+%26quot%3BAwe+nos+ta+cosecha+loke+a+wordo+planta+durante+e+ultimo+6+a%C3%B1anan%21%26quot%3B][desc=Durante+conferencia+semanal+di+Partido+MEP%2C+Parlamentario+Besaril+a+elabora+riba+e+noticia+cu+diferente+compania+importante+di+barconan+crucero+ta+preocupa+cu+e+situacion+di+criminalidad+na+Aruba.+Parlamentario+Besaril+a+declara+lo+siguiente%3A%26quot%3BNo+tabata+un+sopresa+pa+nos+fraccion+di+tende+se%C3%B1or+Otmar+Oduber+a+sali+bin+pa+dilanti+cu+e+informacion+cu+ta+existi+un+preocupacion+real+pa+cu+e+situacion+di+criminalidad+y+falta+di+siguridad+riba+nos+isla.+Loke+a+hala+nos+fraccion+su+atencion+ta+e+echo+c]}
Durante conferencia semanal di Partido MEP, Parlamentario Besaril a elabora riba e noticia cu diferente compania importante di barconan crucero ta preocupa cu e situacion di criminalidad na Aruba. Parlamentario Besaril a declara lo siguiente:

"No tabata un sopresa pa nos fraccion di tende señor Otmar Oduber a sali bin pa dilanti cu e informacion cu ta existi un preocupacion real pa cu e situacion di criminalidad y falta di siguridad riba nos isla. Loke a hala nos fraccion su atencion ta e echo cu e gritonan a sali e biaha aki for di un sector importante di e industria turistico di Aruba, esta e companianan di barconan crucero.

Recientemento minister Oduber tabata na Miami caminda el a ricibi e noticia cu companianan importante manera Royal Caribbean y Carnival Cruises a vocifera cu nan ta preocupa cu e tendencia alarmante na Aruba. Esaki ta caminda cu lamentablemente nos fraccion ta keda haña rason dicon nos no tin confiansa mas den e minister actual di Husticia y cu Prome Minister di Aruba mester tuma accion y pone un hende tanto capacita como firme mas lihe posibel na cabez di Ministerio di Husticia.

Awe pueblo di Aruba ta cosecha loke AVP a sembra pa mas di 6 aña! Na diferente ocasion a critica e maneho reactivo di e minister actual di Husticia. Con por ta posibel cu ta start cu un plan y na caminda ta tuma decisionnan politico cu ta destrui tur e bon intencionnan di e plan? Na 2010 a elimina e "Private-Public-Partnership" den cual Visibility Team tabata opera. A bira pone e responsabilidad completamente den man di Cuerpo Policial, pa despues keda 3 aña largo sin tuma ni un solo polis nobo na Scol pa Polis!

Tres tratamento di presupuesto tras di otro nos fraccion a keda cuestiona cu a duna Cuerpo Policial un tarea adicional, pero cu si no keda tuma aspirante (MBO-2) den servicio pa haci e trabao di vigilancia di orden publico mane cu Visibility Team tabata haci prome cu 2010, a lo largo e falta di continuidad aki lo habri caminda pa insiguridad den areanan turistico importante di nos isla. Nos fraccion no kier a haña rason riba e punto aki. Nos no ta nada contento cu e noticia cu companianan crucero ta preocupa cu e desaroyo actual. Nos fraccion ta consciente cu mester keda haci tur esfuerzo pa percura pa nada negativo afecta nos unico pilar economico, esta Turismo.

Ta pa e motibo aki fraccion di MEP den Parlamento, lo sigui e desaroyo na Scol pa Polis di cerca. Nos fraccion ta spera cu e aña aki na final di Augustus nos por yama un "Bon Bini" na tanto un klas di aspirante nivel MBO-4 como un klas di aspirante nivel MBO-2. Nos fraccion ta comparti e preocupacion cu ta reina tanto den e sector turistico como den Pueblo! No tin espacio mas ni pa "Percepcion" mucho menos pa "High Season". Pueblo ta sclama "Ta basta!" Pueblo kier e gobernantenan actual cuminsa na convivi cu nan!",  Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co