{idkey=2338b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3526-ministerio-di-cultura-rapport-pa-trece-union-bou-musiconan-a-keda-presenta%3FItemid%3D101][title=Ministerio+di+Cultura%3A+Rapport+pa+trece+union+bou+musiconan+a+keda+presenta][desc=AMAA+-Asociacion+di+Musiconan+y+Artistanan+Aruba.%26amp%3Bnbsp%3BORANJESTAD+%28AAN%29+Minister+encarga+cu+asuntonan+di+Cultura+a+reuni+diasabra+atardi+cu+un+grupo+grandi+di+musiconan%2C+na+unda+a+presenta+e+contenido+y+conclusion+di+e+rapport+pa+organisa+musico+y+artistanan+na+Aruba.+Despues+di+un+estudio+haci+pa+expertonan+nombra+den+un+triumverato%2C+Gobierno+a+ricibi+e+Conseho+triumviraat+2016+for+di+man+di+e+miembronan+Edwin+Tromp%2C+Robert+Jeandor%2C+Edwina+Werleman%2C+Glen+Penniston+y+Robert+Maduro.+Den+conseho+d]}
AMAA -Asociacion di Musiconan y Artistanan Aruba. 

ORANJESTAD (AAN) Minister encarga cu asuntonan di Cultura a reuni diasabra atardi cu un grupo grandi di musiconan, na unda a presenta e contenido y conclusion di e rapport pa organisa musico y artistanan na Aruba. Despues di un estudio haci pa expertonan nombra den un triumverato, Gobierno a ricibi e Conseho triumviraat 2016 for di man di e miembronan Edwin Tromp, Robert Jeandor, Edwina Werleman, Glen Penniston y Robert Maduro. Den conseho di Minister a aproba e Conseho di triumviraat 2016 aki unda awor a yega e momento pa pone den practica. Diasabra cu un grupo interesa di musiconan a cera conoci cu AMAA cu ta e Asociacion di Musiconan y Artistanan Aruba. E rapport aki tabata necesario, e mandatario a splica, pasobra tabatin mester di un acercamento integral di musiconan aki na Aruba. No ta importante cu e rapport ta bisa cu mester tin un asociacion, pero mas importante ta loke mester ta contenido di e asociacion aki. Ehecucion di e rapport aki, e Minister Oduber a bisa, lo percura pa e musiconan haya nan balor, mas ainda debi na e trabou duro cu cada un musico ta eherce den e mundo di awendia. Como Minister di Cultura, e mandatario a bisa esnan presente, e mester wak tur e tempo cu musiconan ta hinca den proyectonan grandi internacional y pa nan haya e debido reconocemento pa esakinan. Mas ainda pasobra hopi biaha e musiconan no ta haya e reconocimento financiero adecuado y no tin e recursonan pa haci mas cu nan produccionnan. “Hopi biaha nos hendenan ta brasa e artistanan internacional y ta simplemente klap man pa esnan local,” Oduber a trece dilanti. Pesey e ta kere den un asociacion nobo cu lo trece e union cu ta buscando. Pero asina mes e ta kere cu mester wak atras y siña di erornan cu a wordo cometi den pasado y evita esakinan den futuro. “Si nos kier vence, bira grandi y bira conoci, nos mester brasa otro. Nos mester manda un señal hopi cla na comunidad cu mester sostene nos musiconan. Nos musiconan mester por haya number 1, 2 y 3 riba e topnan di tur siman na Aruba pa di eynan nos por wordo reconoci internacionalmente. Ademas di e reconocemento pa e musiconan, tambe ta importante e apoyo di Gobierno y e Ministernan. Esaki pasobra biaha no tabatin un maneho, cu e ta spera cu e por logra awor si. No solamente di su Ministerio pero por ehempel e maneho di labor pa cu proteccion di e musico como trahado, di asuntonan economico pa e proteccion di e produccion di e musiconan. Pero tambe cerca e Minister di Integracion, cu ta esun cu ta firma pa artistanan di afo bini Aruba. Sin un maneho coherente entre e Ministernan, no ta logra e union ni e reconocemento cu kier logra cerca e Musiconan. Si tin un union bou di e musiconan den un asociacion, por logra e respet necesario pa e trabou di musico. E mandatario a expresa di ta contento di mira un variacion di musico di diferente genero presente den e encuentro unda cu a papia di contenido di e rapport. El a gradici di triumverato cu el a instala cu a traha riba e rapport cu lo mester ta e guia pa trece e union asina busca bou di e musiconan di Aruba.  Y a expresa na e musiconan cu nan tin tur su apoyo y e tin confiansa cu e trabou cu e asociacion lo sigui haci na bienestar di e grupo aki.

Expresionnan haci den e articulo aki no necesariamente ta refleha opinion di ArenaPoliti.co