{idkey=6720b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3583-fraccion-avp-turismo-sostenibel-pa-tur%3FItemid%3D101][title=Fraccion+AVP%3A+Turismo+sostenibel+pa+tur][desc=E+debate+publico+riba+hotelnan+cu+ta+opera+riba+e+base+%26quot%3Ball+inclusive%26quot%3B+y+e+impacto+di+esaki+riba+turismo+y+economia+di+nos+pais%2C+a+presenta+un+diversidad+di+punto+di+bista+di+diferente+sector+di+nos+comunidad.+Esaki+ta+hiba+na+un+conclusion+importante%3A+turismo+ta+di+vital+importancia+pa+nos+tur+na+Aruba.+Nos+tur+ta+depende+di+turismo.+Pesey+kico+cu+dicidi+riba+e+tema+di+%26quot%3Ball+inclusive%26quot%3B%2C+mester+tene+bon+cuenta+cu+nos+tur+na+Aruba%2C+mester+por+keda+participa+directamente+na+e+economia+di+turismo+pa]}E debate publico riba hotelnan cu ta opera riba e base "all inclusive" y e impacto di esaki riba turismo y economia di nos pais, a presenta un diversidad di punto di bista di diferente sector di nos comunidad. Esaki ta hiba na un conclusion importante: turismo ta di vital importancia pa nos tur na Aruba. Nos tur ta depende di turismo. Pesey kico cu dicidi riba e tema di "all inclusive", mester tene bon cuenta cu nos tur na Aruba, mester por keda participa directamente na e economia di turismo pa nos trabou, nos negoshi y pa nos entrada.

E debate publico riba "all inclusive" ta wordo hiba entre sector di hotel y otro sectornan di nos economia manera e importadornan di productonan, taxistanan, operadornan di tour, restaurant y tiendanan, cu ta depende di turistanan pa nan benta, cantidad di trahado y nan entrada.
E debate publico tambe ta wordo hiba entre sector di hotel y gobierno di Aruba. E aspecto aki di e debate ta toca e interesnan priva legitimo di doñonan di hotelnan y e interesnan general di henter nos comunidad - legitimo y crucial - cu gobierno di Aruba tin cu cuida.

Fraccion di AVP a reuni cu diferente organisacion cu ta directamente envolvi den e debate y cu instancianan cu pa motibo di nan responsabilidad y conocemento, por yuda tur hende comprende e impacto economico, laboral y social di e fenomeno di turismo "all-inclusive". Basa riba e reunionnan sumamente informativo aki y riba tur otro informacion cu nos a acumula, fraccion di AVP a yega na un punto di bista riba e tema aki. E punto di bista di fraccion di AVP por wordo resumi den e siguiente puntonan:

1. E riesgo o beneficionan di operasion di hotelnan riba un base di "all-inclusive" ta depende pa un gran parti di e condicionnan di infrastructura fisico, nivel di desaroyo economico y laboral, e nivel di integracion di turismo den henter economia di un pais y e grado di dependencia di economia di turismo. Economia di Aruba ta depende pa mas cu 85% di turismo. Economia di Aruba ta haltamente integra cu turismo. Mas cu 70% di forsa laboral ta directamente envolvi den turismo. Entradanan di nos pais ta depende pa un parti grandi di entradanan directo y indirecto di turismo. Esaki ta nifica cu cualkier cambio den turismo tin un impacto grandi den henter nos economia.

2. Envestigacionnan haci rond di mundo ta indica cu turismo "all-inclusive" tin e tendencia di concentra maneho, operacion y uso di servicio y facilidadnan serca un grupo chikito di operador y facilidad. Consecuencia di esaki ta cu enbez cu tur compania y hende por participa, competi y beneficia di e economia di turismo, esaki ta wordo limita cu turismo "all-inclusive". E caracter di turismo "all-inclusive" ta pesey un riesgo pa e caracter habri di nos economia, pa competencia liber den economia, pa sostenebilidad di turismo y reparticion di e beneficionan di turismo den henter nos comunidad.

3. Operacion di hotelnan den forma di "all-inclusive" ta aumenta lihe rond di mundo. Aruba tambe ta sinti e efecto di e trend aki. E desaroyo aki ta bini door di cu organisacionnan comercial grandi y financieramente fuerte, cu kier opera hotelnan den forma di "all inclusive", ta cumpra hotelnan existente y construi hotelnan nobo, cu nan meta comercial na bista. Si no tene cuenta cu e interes economico general y haci lo maximo pa sigura e participacion directo y liber di tur compania den nos economico y sigura cu tur hende y tur sector sigui beneficia di nos economia, e desaroyo di mas "hotel all-inclusive" por tin efecto indeseabel y grandi pa economia di nos pais.

4. Mester tene bon cuenta cu e interesnan legitimo di inversionistanan den nos economia y turismo en particular. AVP semper tabata y ta di opinion cu e forma pa stimula desaroyo di nos pais, ta door di stimula nos economia, door di crea espacio y incentivonan pa inversion den nos economia, sea di inversionistanan local, internacional of di sector publico. Nos meta ta pa sigura cu inversionnan den nos pais ta haltamente rendabel. Pasobra e inversionnan ey ta genera trabou y entrada pa henter nos economia y nos pais.

5. Sinembargo, keda sin haci nada den lus di e aumento di hotelnan "all-inclusive" den turismo y su riesgonan pa interes economico general, no ta un opcion. Mester actua pa proteha e interes general, pa sigura cu henter nos comunidad ta sigui haya e beneficionan di nos economia di turismo. E caracter di nos economia ta asina inter-relata cu turismo, cu mester dirigi e desaroyo di turismo, pa sigura cu tur hende ta sigui haya e beneficionan di turismo. Pa e motibo aki un of otro forma di regulacion di e desaroyo fisico, economico y laboral di turismo ta necesario.

6. Den e ultimo 7 aña e maneho di gobierno di Aruba (AVP), di stimula inversionnan den turismo y promove Aruba como un destinacion di hospitalidad di calidad halto, a percura pa e aumento den cantidad di turista cu ta bin y keda riba nos isla, e aumento considerabel di entrada pa empresanan den turismo, e crecemento economico di nos pais y pa e beneficionan di e exito grandi den turismo yega na tur sector di nos economia y tur hende den nos pais. Pa e motibo aki nos tin pleno confiansa cu e maneho pa yega na un regulacion di "all-inclusive" tambe ta basa riba e mes un metanan di sigura crecemento di entradanan di turismo pa e empresanan den turismo y pa henter nos comunidad.

7. Regulacion di e sector di turismo no lo sosode sin mas y semper mester tin e interes economico general como base. Regulacion di "all-inclusive" no ta nifica cu hotelnan ta wordo limita den nan forma di opera te cu awor. Ta e tendencia incalculabel di hotelnan opera a base "all-inclusive" y su riesgonan economico, laboral y social, ta loke nos mester controla, pa sigura cu e beneficionan di turismo pa henter nos comunidad keda sigura.

E posicion di e fraccion di AVP, ta basa riba tur informacion cu ta disponibel via tur canal di informacion local y internacional te awor aki. Manera den tur debate riba tur tema, e fraccion di AVP ta keda habri pa tur otro informacion basa riba analysisnan racional, tanten cu e interes di henter nos comunidad y tur sector di nos economia y mercado laboral keda salvaguardia.

Fraccion di AVP

Aruba, 18 juni 2016

Expresionnan haci den e articulo aki no necesariamente ta refleha opinion di ArenaPoliti.co