{idkey=1196b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3587-ministerio-di-sector-primario-a-firma-e-decreto-pa-haci-sector-primario-completamente-liber-di-impuesto%3FItemid%3D101][title=Ministerio+di+Sector+primario%3A+A+firma+e+decreto+pa+haci+Sector+Primario+completamente+liber+di+impuesto][desc=Minister+Oduber+conhuntamente+cu+Minister+Bermudez+cu+anuncio+alentador+pa+Piscadonan%26amp%3Bnbsp%3BDialuna+mainta+durante+e+acto+oficial+di+firmamento+pa+embeyecemento+y+mehoracion+di+Zeewijk+%2F+Cura+Cabay+beach+Minister+Otmar+Oduber+a+anuncia+cu+oficialmente+Gobierno+a+firma+e+decreto+cu+ta+haci+e+sector+primario+completamente+liber+di+impuesto.Den+pasado+pa+locual+ta+trata+sector+primario+a+haci+cierto+artefactonan+liber+di+%26%23039%3Binvoerrechten%26%23039%3B+si+e+persona+cu+ta+practica+e+ofishi+ta+registra+na+Santa+Rosa+]}
Minister Oduber conhuntamente cu Minister Bermudez cu anuncio alentador pa Piscadonan 

Dialuna mainta durante e acto oficial di firmamento pa embeyecemento y mehoracion di Zeewijk / Cura Cabay beach Minister Otmar Oduber a anuncia cu oficialmente Gobierno a firma e decreto cu ta haci e sector primario completamente liber di impuesto.
Den pasado pa locual ta trata sector primario a haci cierto artefactonan liber di 'invoerrechten' si e persona cu ta practica e ofishi ta registra na Santa Rosa of na Camara di Comercio como tal. E mandatario encarga cu Sector Primario ta splica cu awor a bay un paso mas leu den incentiva e sector aki dor di haci pa piscadonan y criadonan di bestia liber di impuesto.
"Esey ta nifica cu tur material no algun material, manera anteriormente, pero tur material ta liber di impuesto. Esaki ta inclui tambe 'winstbelasting' y 'inkomstenbelasting'. Di e forma aki nos kier encurasha pa mas y mas hende practica e ofishinan aki den sector primario." Minister Oduber a indica.
Banda di incentiva mas hende pa practica tanto pesca como cria di bestia, kier logra tambe un aumento den produccion pa consumo di nos comunidad. Sr. Oduber ta comenta cu a dialoga e deseo aki cu hopi di esnan cu ta practica e ofishinan aki na varios ocasion y awor ta asina leu cu a logra esaki. "E ta un fase hopi importante y cu hopi satisfaccion nos por anuncia awe cu henter Sector Primario ta liber di impuesto."
E mandatario a sigui comenta cu ta trahando duro na bienestar di e sector aki unda tin dialogonan andando cu entre otro WEB Aruba NV y tambe D.O.W. pa soluciona e situacion di awa cu tin.
Aruba lamentablemente ta den un secura di basta aña cu tin tur e consecuencianan negativo cu ta bini cu ne specialmente pa e cunukeronan y esanan cu ta cria bestia. Minister Otmar Oduber ta spera cu dentro di poco lo por haci anuncio di e trabounan cu ta wordo haci riba e tema aki tambe unda cu lo por sigui incentiva mas hende den e sector primario. E mandatario ta bisa: "Si nos logra anuncia esaki lo por mira un biaha mas e cantidad di cunucunan planta, y mas bestianan cu por wordo cria."
E anuncio sigur a cay den hopi bon tera cerca e piscadonan presente. Romeo Janga cu ta un di e piscadonan presente, a indica cu e hecho cu awor e sector primario ta liber di impuesto ta yuda nan substancialmente den e labor diario cu nan ta ehecuta. Sr. Janga ta splica cu e ofishi di piscado no ta conta cu un entrada fiho, mirando cu tin biaha ta subi riba lama y ta regresa bashi of ta gara net suficiente pisca pa cubri gasto di por ehempel gasolin. Loke cu nan ta bende despues cu nan pisca den lama, practicamente no ta suficiente si nan mester paga belasting riba dje. Awor nan por practica pesca hopi mas trankilo mirando cu liber di impuesto lo traduci den reduccion substancial den prijs di ekiponan y materialnan cu nan mester pa eherce e ofishi.
Banda di haya e grato noticia cu henter e area di beach na Zeewijk / Cura Cabay lo conoce un embeyecemento y mehoracion na beneficio di henter e area, e piscado ta comparti cu e sorpresa agradabel aki ta algo cu tur ta aprecia masha hopi mes.

Expresionnan haci den e articulo aki no necesariamente ta refleha opinion di ArenaPoliti.co