{idkey=5543b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3702-elton-lioe-a-tjam-abo-nos-docentenan-ta-importante-ban-duna-nan-locual-nan-merece%3FItemid%3D101][title=Elton+Lioe-A-Tjam+%28ABO%29%3A+Nos+docentenan+ta+importante.+Ban+duna+nan+locual+nan+merece][desc=Un+otro+a%C3%B1a+escolar+a+pasa+y+awo+e+preparacionnan+pa+un+otro+a%C3%B1a+escolar+lo+cuminsa.+Den+e+periodo+aki%2C+tambe+lo+cuminsa+e+campa%C3%B1a+anual+di+gobierno+pa+ripiti+cuanto+placa+a+wordo+hinca+den+verfmento+di+scol.+No+ta+importa+gobierno+cu+ya+pa+3+a%C3%B1a+caba+su+minister+ta+pasa+saca+potret+na+e+mesun+scolnan+of+ta+ripiti+e+mesun+storia+bieu.+Nos+gobierno+ta+convenci+cu+e+tiki+placa+cu+e+ta+inverti+pa+mehora+e+infrastructura%2C+cu+e+mes+a+laga+bay+atras%2C+ta+realmente+un+inversion+den+educacion.+Honest]}
Un otro aña escolar a pasa y awo e preparacionnan pa un otro aña escolar lo cuminsa. Den e periodo aki, tambe lo cuminsa e campaña anual di gobierno pa ripiti cuanto placa a wordo hinca den verfmento di scol. No ta importa gobierno cu ya pa 3 aña caba su minister ta pasa saca potret na e mesun scolnan of ta ripiti e mesun storia bieu. Nos gobierno ta convenci cu e tiki placa cu e ta inverti pa mehora e infrastructura, cu e mes a laga bay atras, ta realmente un inversion den educacion. Honesto bisa, un pensamento un tiki dom, di parti di gobierno. Pasobra hustamente e sector di educacion, ta e sector unda tin un concentracion di inteligencia. Pues con gobierno por pensa cu e por gaña tur e hendenan inteligente aki cu e mesun triki, ta keda un misterio. A menos cu gobierno ta convenci cu e por sigui domina e sector aki cu e colgamento di wortel dilanti algun di nan pa laga nan kere cu e biaha aki nan ‘si lo bin na beurt’, manera a pasa cu algun docente of cabesante cu a bira parlamentario of inspector. Otro misterio, pasobra tur hende sa cu e puestonan aki ta limita, a wordo duna caba of lo wordo duna na un grupito. Pero asina mes lo tin algun educador lo cay den e mesun trampa bieu aki.

E responsabilidad cu un docente tin den e sociedad, ta uno hopi grandi y cu hopi peso. Hopi mas cu hopi hende kier reconoce awendia. Antes un docente tabata un persona respeta den comunidad. Awendia no. Pa esaki tin varios motibo. Un di nan sigur ta e falta di respet y e decadencia structural cu nos ta mirando den nos sociedad.

Nos sociedad ta cambiando hopi lihe y cu esaki e retonan tambe pa e docente. Antes e klasnan tabata mas chikito, awendia nan ta mas grandi. Antes e docente por a dedica mas atencion na e mucha, awendia no mas. Antes e klasnan tabata consisti di mayoria mucha cu a nace akinan, awendia e klasnan ta hopi multicultural. Antes e docente su trabou principal tabata pa duna les, awendia casi tur a bira un trahado social of un ‘fundraiser’ pa scol. Awendia e presion riba e docente ta mas grandi cu antes, pero hopi biaha nos sociedad no ta mira esaki. Awendia tin algun mayor ta pensa cu educa y forma e mucha, ta e trabou di e docente enbes cu e ta nan responsabilidad na prome luga. Lamentabel pa constata cu tin biaha algun miembro di nos sociedad ta lubida cu e docente tambe ta un persona, un mayor of cu e mester tempo pa su mes y su famia.

Un docente ta hunga un rol importante y esencial den un sociedad. E docente mester wordo respeta y balora atrobe, manera antes. Docentenan local, no por wordo discrimina mas pa cualkier funcion of den salario, a costo di uno cu a bin for di exterior.  Mester bin un cambio radical den e pensamento cu inversion den verfmento di edificio, ta un mehoracion di educacion. E accento di inversion mester wordo poni riba e ser humano (studiante, docente y mayor), enbes di propaganda politico. Nos sistema educacional ta den un problema serio y mester di atencion urgente y structural. Si esaki no pasa, Aruba lo keda dependiente di otro nacionalidadnan pa su desaroyo y tur e consecuencianan socioeconomico, demografico y cultural cu esaki ta trece. Pa nos di partido ABO, esaki no ta un opcion. Aruba mester inverti y kere den su mesun hendenan, pa asina semper mantene su destino den su propio man. Nos si ta kere den nos docentenan y nos lo bay duna nan, locual nan merece!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co