{idkey=1593b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3780-mep-bao-di-gobernacion-di-avp-tur-trahador-di-tur-sector-ta-entrega-mas-awe-pa-haya-menos-manan%3FItemid%3D101][title=MEP%3A+Bao+di+gobernacion+di+AVP+tur+trahador+di+tur+sector+ta+entrega+mas+awe+pa+haya+menos+ma%C3%B1an][desc=Locual+Rene+Herde+no+ta+splica+pueblo%3A%26amp%3Bnbsp%3BNo+ta+salta+un+siman+cu+e+lider+di+fraccion+di+AVP%2C+Rene+Herde+ta+trece+padilanti+e+asunto+di+fondonan+social+di+SVB%2C+APFA+y+AZV.+Y+semper+den+su+frustracion+e+kier+venena+mente+di+pueblo+cu+ta+partido+MEP+lo+a+perhudica+e+fondonan+aki.+Mester+enfatisa+riba+e+echo+cu+na+final+di+2009+Gabinete+Oduber+a+laga+e+3+fondonan+aki+den+un+situacion+saludabel%2C+ya+cu+tur+hende+tabata+cobra+nan+pensioen+di+biehes+y+tambe+nan+pensioen+di+gobierno+completamente+y+es]}
Locual Rene Herde no ta splica pueblo: 

No ta salta un siman cu e lider di fraccion di AVP, Rene Herde ta trece padilanti e asunto di fondonan social di SVB, APFA y AZV. Y semper den su frustracion e kier venena mente di pueblo cu ta partido MEP lo a perhudica e fondonan aki. Mester enfatisa riba e echo cu na final di 2009 Gabinete Oduber a laga e 3 fondonan aki den un situacion saludabel, ya cu tur hende tabata cobra nan pensioen di biehes y tambe nan pensioen di gobierno completamente y esunnan cu tabata ricibi servicio di AZV tambe por a gosa di esaki den forma integral. Sinembargo constantemente por tende  Rene Herde sclama cu ta danki na Gabinete Eman cu a logra pa salba e fondonan aki. Pero nada di esaki ta berdad, ya cu ta e participantenan di e fondonan aki mes mester a sacrifica, sangra y paga pa tur e medidanan cu a ser imponi riba nan lomba. 

Pensioen di biehes, SVB 
Pa loke ta e fondo di SVB, Gabinete Mike Eman a impone e siguiente medidanan riba lomba di e participantenan: 1) A aumenta e prima di AOV cu 1% na 2014,  2) A aumenta e prima di AOV cu 1% mas na 2015, 3) A individualisa e prima di AOV pa parehanan casa. Consecuentemente e parehanan aki entrante 2011 ta perde di haya un suma di 4000, 5000 y te hasta mas cu 6000 florin di restitucion di AOV, 4) A aumenta e edad di pensioen di biehes di 60 te 65 aña. Cu e aumento aki un pensionado soltero durante 5 aña ta entrega un suma di Af. 64.920,00 y parehanan casa tambe ta entrega un suma di Af. 109.320,00 den e fondo di SVB. Si esaki no ta un medida cruel, ta con nos mester yama esaki anto? 
Y despues cu Gabinete Eman a suta e participantenan di SVB cu tur e medidanan menciona, recientemente nan a exonera nan mes di un debe di 61 miyon florin cu nan mester a paga na SVB. 

Pensioen di gobierno, APFA
Pa loke ta e fondo di APFA, Gabinete Eman a impone e siguiente medidanan riba lomba di e participantenan: 1) A aumenta e edad di pensioen di ambtenaarnan te 65 aña. Aki tambe e pensionadonan lo perde di haya un suma substancial di nan pensioen, 2) A aplica franchise y middelloonregeling y consecuencia di esey ta cu e participantenan lo haya un reduccion den nan suma di pensioen, 3) A reduci e Duurtetoeslag di e ambtenaarnan for di 36.1% te cu 17.7%, consecuentemente ora cu e ambtenaarnan bay cu pensioen nan lo bay sinti un reduccion substancial di nan pensioen, 4) E franchise a ser aumenta for di 14059 florin te cu 17616 florin y e porcentahe di acumulacion di pensioen a ser baha di 2.15% te cu 1.75%, pues aki tambe mas placa lo keda den fondo di APFA.
Tambe  Gabinete Eman a anuncia cu nan a hinca 170 miyon florin den APFA y p’asina yega na un porcentahe di cobertura di 100%. Pero aki tambe nan kier manipula mente di pueblo, ya cu e suma di 170 miyon florin nan a fia (!) for di e propio APFA y pa APFA hinca esaki bek den su fondo.  Ta den un gobierno di AVP so sorto di ehercicio y bagamunderia ta posibel!

Cuido medico, AZV
Pa loke ta e fondo di AZV, Gabinete Eman a impone e siguiente medidanan: 1) A aumenta e prima di AZV cu 1% entrante 2011, 2) A aumenta e BBO cu 1% pa AZV entrante 1 di december 2014, 3) A aumenta e BBO cu 1% pa AZV entrante 1 di juli 2015.  Pues den total 3%! Sinembargo a cambio di tur e medidanan aki, e pashentnan ta haya practicamente y solamente remedinan generico y fuera di esey nan tin cu warda lunanan largo pa haya un cita cu un specialista of haci cierto testnan medico y operacion.

Asina nos por mira cu finalmente ta e participantenan den SVB, APFA y AZV mes mester paga y sangra te muri debi na e gran cantidad di medidanan cu a ser imponi riba nan lomba y p’asina Rene Herde por  gaba tur dia cu ta nan a salba e tres fondonan aki. Alabes locual nan no ta conta pueblo ta cu nunca nan a lubida nan mal maña ya cu semper den nan gobernacion, den forma iresponsabel nan no tabata traspasa e fondonan di primanan di AOV, AZV y APFA cu ta ser reteni di e trahadornan, manera por ehempel na 2001 cu nan a laga un debe atras di 277 miyon florin den APFA y cu despues debi na interes esaki a aumenta te riba 600 miyon florin.
Hecho ta cu no ta ningun arte pa goberna di e forma mediocre asina, esta di crucifica e participantenan cu tur e medidanan y pa despues cana rond y pretende di ta e gran salbadornan di e fondonan aki.

Expresionnan haci den e articulo aki no necesariamente ta refleha opinion di ArenaPoliti.co