{idkey=8856b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3841-karel-maduro-mep-aruba-ta-na-candela%3FItemid%3D101][title=Karel+Maduro+%28MEP%29%3A+Aruba+ta+na+candela%21][desc=Pueblo+di+Aruba%2C+si+bo+mester+analisa+tur+e+sucedidonan+cu+ta+tumando+lugar+na+Aruba%2C+bo+por+bisa+cu+nos+pais+practicamente+ta+na+candela.+Mas+tristo+di+tur+esaki+ta%2C+cu+esnan+cu+pueblo+a+scoge+pa+ta+nan+gobernante%2C+no+ta+haciendo+lo+minimo+pa+alivia+of+drecha+e+situacion.+Resumiendo+e+sucedidonan%2C+bo+por+cuminsa+na+bisa+cu+Aruba+ta+bao+di+un+curatela+financiero+causa+pa+mal+maneho+gubernamental.+Gobiernonan+di+AVP+a+usa+hopi+mas+placa+pa+%E2%80%9Cgoberna%E2%80%9D+cun%E2%80%99e%2C+cu+tabata+tin+disponibel+den+caha.]}
Pueblo di Aruba, si bo mester analisa tur e sucedidonan cu ta tumando lugar na Aruba, bo por bisa cu nos pais practicamente ta na candela. Mas tristo di tur esaki ta, cu esnan cu pueblo a scoge pa ta nan gobernante, no ta haciendo lo minimo pa alivia of drecha e situacion. Resumiendo e sucedidonan, bo por cuminsa na bisa cu Aruba ta bao di un curatela financiero causa pa mal maneho gubernamental. Gobiernonan di AVP a usa hopi mas placa pa “goberna” cun’e, cu tabata tin disponibel den caha. Tambe e uso di e placa versus kico e pais a haya pe. Un (1%) porciento so a bay den inversion segun IMF. E resto den malgastamento pa propaganda di e mandatarionan di AVP. Cumpramento di hende dunando nan trabao den gobierno. Manipula e pueblo cu reparatietoeslag cu ta refleha bek den e debe nacional. Pues, e pueblo ta bay paga bek tur loke cu el a haya anto cu interes riba dje. Goberna pa un Prome Minister cu kier a mata su curpa y despues ta sali bay core auto na Merca, anto contento. Minister Otmar Oduber ta bay Gobernador entrega su supuesto retiro. Criticando su lider sr. Eman y varios otro ministernan severamente. Consecuentemente, minister Oduber ta tuma over e trabaonan di Minister di Husticia, di Minister di Economía, di Minister di Infrastructura y di Minister di Finansa,  transformando su mes den e super-minister. Pa su motibo tin un guera feroz entre ATA (bank) y AHATA. Aki pasobra e super-minister kier mata all inclusive na Aruba. Sin worry cuanto placa e inversionistanan a hinca den wega pa nan proyecto. Den Aruba Gastronomic Association tin guera pa motibo di minister Oduber. E grupo cu Oduber ta sostene, kier sali for di e asociacion manera AHATA a sali for di ATA su bestuur. Tambe cinco minister di e gabinete Eman 2 NO kier mira e super-minister ni riba papel sanitario pinta! Aki pa motibo di e miyones di florin cu e super minister ta dispone di dje via su ATA bank! E resto di e ministernan mester bay na rudia y mendiga manera choller na pia di e super-minister pa haya placa. Esaki ta sumamente humiyante pa algun di nan. Muy en particular e Minister di Husticia. Otro candela ta e partimento di tereno door di Minister di Infrastructura na un grupo privilegia di radio. Hasta un programa tin na e radio cu yama “90 mil metro cuadra bisa mi”. Casonan den corte cu e ministernan di AVP ta perdiendo, reiterando con corupto nan ta. Keto bay e menasa di parti di e super-minister ta valido. Posiblemente den e dianan aki, e dos “master mind”nan den politica sushi, esta sr. Mito Croes y sr. Henny Eman, ta reuniendo den forma maratonico cu e super minister pa e keda den AVP. Bisando e super minister cu si e bay riba su mes, e lo no saca mas cu 1 asiento den parlamento. Asina demotivando e super minister pa e no bay pasobra e ora si AVP lo keda na werki. Riba un otro front, gobierno a hedge na WEB, costando Aruba mas cu 500 miyon florin, cual por a bay den e economia di pais Aruba. No papia mes di e proyectonan di PPP. Con e pueblo ta bay paga bek? Via e financial transfer tax di sr. Mike Eman? ABB di 20% na caminda! Con ta sigui cu e proyecto di e refineria? CITGO ta asisti cu e parti tecnico, PDVSA ta suministra e petroleo y kende ta para garantia pa e mas cu US$ 600 miyon pa reactiva e refineria? Aruba atrobe? Gobierno di AVP a firma un monton di palabracionnan, sin antes a keda cla cu e doñonan di e refineria mes! Con competente (sabi) esaki ta laga e gobierno di AVP mustra atrobe? E asunto mas tristo di tur cos ta, cu e reportero Speed, kende a fungi pa chaperonne di PM, ta na guera cu e super-minister. Aruba ta na candela y e Prome Minister, kisas door di locura, no ta ni wak patras riba kendenan ta benta abao, kendenan a keda sin come, ta malo di salud y of ta den problema financiero. No tin tempo pa Aruba, ta su propio imagen ta loke ta conta. Djis brasa e ta brasa hende y nada mas. Anto ainda falta mas candela!

Expresionnan haci den e articulo aki no necesariamente ta refleha opinion di ArenaPoliti.co