{idkey=7803b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F385-rene-herde-avp-reunion-entre-parlamentonan-di-reino-e-siman-aki-na-aruba%3FItemid%3D101][title=Rene+Herd%C3%A9+%28AVP%29%3A+Reunion+entre+parlamentonan+di+Reino+e+siman+aki+na+Aruba][desc=E+siman+aki+delegacionnan+di+e+parlamentonan+di+e+cuatro+paisnan+di+Reino+Hulandes+lo+reuni+aki+na+Aruba.+Riba+e+agenda+tin+temanan+%26quot%3Bcayente%26quot%3B%2C+%26quot%3Bpisa%26quot%3B+y+importante+pa+atende.+Normalmente+reunionnan+carga+cu+temanan+pisa+asina+ta+duna+motibo+pa+hopi+discucion+fuerte.+Apesar+di+esey%2C+Rene+Herde%26%23039%3B%2C+presidente+di+e+Comision+di+Asuntonan+di+Reino+di+Parlamento+di+Aruba%2C+ta+wak+e+reunionnan+di+e+siman+aki+cu+un+bista+hopi+opitimista+y+positivo.+Rene+Herde%3A+%26quot%3BE+agenda+di+e+reunionnan+e+siman+aki+ta+carga+]}E siman aki delegacionnan di e parlamentonan di e cuatro paisnan di Reino Hulandes lo reuni aki na Aruba. Riba e agenda tin temanan "cayente", "pisa" y importante pa atende. Normalmente reunionnan carga cu temanan pisa asina ta duna motibo pa hopi discucion fuerte. Apesar di esey, Rene Herde', presidente di e Comision di Asuntonan di Reino di Parlamento di Aruba, ta wak e reunionnan di e siman aki cu un bista hopi opitimista y positivo. Rene Herde: "E agenda di e reunionnan e siman aki ta carga cu temanan cu tabata of ainda ta punto di discucion fuerte entre paisnan di Reino. Pero nos no ta wak e discucionnan fuerte cu lo tin como punto final. Nan ta  discucionnan pa yega na acuerdonan y palabracionnan nobo con ta sigui hunto den e union di paisnan di Reino. Tin biaha den un relacion bo tin cu hiba discucionnan fuerte pa compronde otro miho. Sigur ora cosnan a bay malo. Cu e actitud positivo ey nos ta drenta e reunionnan e siman aki. Nos ta optimista cu na final lo tin mas claridad unda nos ta para y con pa sigui riba cada tema como parlamentonan di Reino."

TEMANAN PISA
Riba agenda tin temanan pisa manera e uzo di reglamento di orden di gobernador como base legal pa intervencion di gobierno di Reino. E punto di agenda aki a wordo proponi door di e delegacion di Corsow. E tema urgente di introduccion di un "geschillenregeling" (un sorto di Corte Constitucional pa Reino) pa atende cu diferencia di opinion riba interpretacion di Statuto di Reino tambe ta riba agenda. E "screening" di candidatonan pa bira minister y miembronan di parlamentonan, ta otro tema cu a bira urgente despues di e "KB" cu gobierno di Reino a duna gobernador di Sint Maarten aña pasa ora mester a forma gobierno. Esaki ta un tema cu Aruba a yega di pasa den dje den pasado. Esaki tambe ta riba agenda e siman cu ta bin. Tur e temanan aki ta urgente pasobra nan a causa hopi discucion entre paisnan den Reino. Rene Herde:" Si miembronan di Parlamentonan di e cuatro paisnan ta bini hunto, bo no por keda sin atende e asuntonan urgente. Pesey nan ta riba agenda y lo wordo discuti ampliamente, pero cu e meta pa siña di pasado, yega na palabracionnan nobo y mehora futuro. Pero banda di esey tin temanan importante pero menos polemico manera e estado di mucha y hobennan den paisnan di Reino, debe di studiantenan cu a studia na Hulanda, e cooperacion entre paisnan di Reino riba tereno di salubridad. Esakinan ta temanan cu tambe lo wordo trata pasobra nan ta asina importante pa tur nos paisnan."

CONCENSO
Pa prome biaha den masha hopi aña e tres partidonan den Parlamento di Aruba ta riba un liña di pensamento riba tur e temanan riba agenda. Esaki riba su mes ta un exito y un adelanto importante. E ta nifica cu durante di e reunionnan e siman aki, henter e delegacion di parlamento di Aruba, di tur tres partido, lo tuma un punto di bista comun. Independiente di ken hiba palabra pa e delegacion di Aruba. Contrario na pasado no lo tin discucion entre e tres partidonan di parlamento di Aruba. Si tin diferencia di opinion ainda, esaki lo wordo trata pafo di e reunion. No durante di e reunionnan plenario. A tuma basta preparacion pa yega na consenso riba tur e temanan "cayente" manera integridad den gobernacion, e screening di candidatonan pa minister y e "geschillenregeling". Pero tur partido a duna nan cooperasion y a yega na consenso. Esaki ta haci cu e chens pa e reunionnan duna resultado positivo ta ainda mas grandi.

Expresionnan haci den e articulo aki no necesariamente ta refleha opinion di ArenaPoliti.co