{idkey=2223b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3887-benny-nisbet-ppa-oranjestad-quo-vadis-oranjestad-nos-capital-tin-un-potencial-enorme-cu-mester-worde-mercadea-y-projecta-den-tur-libertad-posibel%3FItemid%3D101][title=Benny+Nisbet+%28PPA%29%3A+%E2%80%9COranjestad%E2%80%A6.Quo+vadis+%28%3F%3F%3F%29+Oranjestad+nos+capital+tin+un+potencial+enorme+cu+mester+worde+mercadea+y+projecta+den+tur+libertad+posibel%21%21%E2%80%9D][desc=Na+anja+2007+PPA+a+saca+un+comunicado+cu+e+titulo+aki+tambe+%21%21+For+di+e+tempo+ey+tabatatin+hopi+preucupacion+cu+Oranjestad+nos+capital+lo+a+bai+atras+y+tabatatin+mester+di+atencion+serio+di+parti+di+gobierno.For+di+e+tempo+ey+PPA+como+e+prome+y+kizas+%E2%80%98unico%E2%80%99+organisacion+politico+a+saca+varios+comunicado+dedica+na+e+topico+importante+aki.+PPA+a+accentua+cu+Oranjestad+lo+tabatatin+mester+di+un+inversion+serio+pa+ponele+bek+riba+pia.+No+kabe+duda+cu+un+desaroyo+cu+a+affecta+nos+capital+di+Oran]}
Na anja 2007 PPA a saca un comunicado cu e titulo aki tambe !! For di e tempo ey tabatatin hopi preucupacion cu Oranjestad nos capital lo a bai atras y tabatatin mester di atencion serio di parti di gobierno.

For di e tempo ey PPA como e prome y kizas ‘unico’ organisacion politico a saca varios comunicado dedica na e topico importante aki. PPA a accentua cu Oranjestad lo tabatatin mester di un inversion serio pa ponele bek riba pia.

No kabe duda cu un desaroyo cu a affecta nos capital di Oranjestad tabata e desaroyo dilanti di nos hotelnan grandi na Noord. Si e turista tin tur cos su dilanti e no mester sali bishita nos capital mas manera antes. Pa cambia esaki un inversion tabata necesario y PPA tabata e partido politico cu a presenta e ‘idea’ di un sistema di ‘streettrolley’ cu nos ta orgulloso di e idea aki y e hecho cu e actual gobierno a ejecuta esaki ta demonstra e capacidad di partido PPA como un partido visionario.

Naturalmente locual PPA no ta contento cune ta e hecho cu gobierno a usa fondo necesario pa ejecuta e otro vision cu PPA a presenta como mocion den parlamento di Aruba y cu a worde aproba unanimamente esta pa construi un Mavo/Havo/VWO den districto di Noord.

Pa colmo locual a kaba di mata e centro di Oranjestad ta e introduccion di un ‘aru-parking’ den centro di Oranjestad cual tin miles y miles di ciudadano cu NO ta bishita centro di Oranjestad mas.

Awor e pregunta ta: Kiko por worde hasi pa duna Oranjestad como nos capital e bida commercial bek cu el a cosecha di dje den pasado ??

1. Na prome lugar gobierno lo mester elemina e Sistema di Aru-parking inmediatamente y cambia e organisacion aki den uno di siguridad pa e pueblo y pa e turista bishitante….uno cu ta juda e ciudadano/turista jega na un parkeerplaats sin cu mester paga algo y uno cu ta duna e ciudadano/turista e informacion unda por haya un cierto negoshi y/of producto cu nan ta en busca di djele !!
2. Na di dos lugar gobierno a dedica basta atencion na accentua e sitionan cultural/historico den centro di Oranjestad esey ta un punto positivo cu mester hasi bon uso di djele awor.
3. Na di tres lugar gobierno mester crea un presupuesto pa mercadea nos capital Oranjestad awor cu a permiti un competencia di otro mundo pa desaroya su mes enfrente di nos hotelnan. Un presupuesto for di cual lo accentua e centro commercial di Oranjestad como un sitio cu ta worde conseja pa bishita prome cu bandona Aruba. Mescos cu PPA tabata boga pa un trato asina esta cu lo tin un fondo pa mercadea centro di San Nicolas y cu MEP a vota contra di esaki e tempo ey den parlamento y cu AVP awor cu nan ta den gobierno no a tuma over….! Esta mercadea San Nicolas tambe como sitio pa e turista bishita.

E critica cu mas ta tende ta cu e turista no ta baha for di e ‘streettrolley’ na cabez di caya grandi/caya Gilberto Francois Croes.

4. Pa PPA esaki ta masha logico……na cabez di e caya principal di e centro di Oranjestad aki NO tin negoshi cu ta projecta locual ta na interes di un turista na prome lugar. PPA ta di opinion cu gobierno mester stimula inversion di ‘entrepreneur’ pa inverti den negoshinan cu ta ‘jamativo’ pa un turista !! Stimula negoshi di souvenir y arte den e parti pariba di caya grandi. Stimula desaroyo kizas di un Mercado di Arte y cultura na unda e ‘street-trolley’ ta jega final di caya…..Pone musica crioyo arubano sona pa crea un ambiente….!! Stimula inversion den producto tanto pa e local como pa e turista cu ta stimula desaroyo economico di nos capital di Aruba !! Projecta e historia cu tin tras di centro di Oranjestad….bende y mercadea esaki mas hopi cu ta responsablemente posibel y PPA ta convenci cu cos lo cambia !! Parcialmente gobierno a inicia cu algun di e puntonan menciona pero no ta ejecutando esaki debidamente mientras cu e aru-parking ta strobando esaki tambe.
Pero tur cos ta cuminsa si cu eliminacion y cambio di e organisacion di aru-parking…pueblo tin un rabia riba esaki pasobra pueblo nunca e accepta ni pordona e partimento di ‘klem’ riba propiedad di pueblo anto pa sumanan originalmente chikito pero cu ta desaroya den un abuso di otro mundo.

PPA ta convenci cu Oranjestad como nos capital di Aruba tin hopi pero hopi mas potencial cu ta worde projecta na e momento aki !! Pero esaki ta basa riba nos historia, nos cultura, nos arte y nos libertad como pueblo. E momento cu tin e senjal di abuso di poder den forma di ‘aru-parking’ esaki ta worde rechasa pa pueblo cu consecuencia negativo pa e centro di Oranjestad.

Oranjestad, Quo Vadis ?? PPA ta ripiti Oranjestad tin un potencial enorme pero mester permiti esaki pa desaroya su mes den un ambiente liber usando su forza historico, cultural y di arte na un forma fuerte como parti di e producto turistico di pais Aruba.

Aruba, 15 di augustus 2016
Lider Politico di PPA

Expresionnan haci den e articulo aki no necesariamente ta refleha opinion di ArenaPoliti.co