{idkey=5917b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3917-parlamentario-mr-xiomara-maduro-mep-e-ley-di-all-inclusive-mester-sirbi-interes-general-di-nos-pueblo-y-no-djies-e-interes-di-sponsers-di-avp-cu-ta-den-guerra-cu-otro%3FItemid%3D101][title=Parlamentario+mr.+Xiomara+Maduro+%28MEP%29%3A+E+Ley+di+All+Inclusive+mester+sirbi+interes+general+di+nos+Pueblo+y+no+djies+e+interes+di+sponsers+di+AVP+cu+ta+den+guerra+cu+otro][desc=Diabierna+pasa+Parlamento+a+cuminsa+trata+e+cambionan+den+e+Ley+General+di+Permiso+pa+asina+por+acomoda+e+cambionan+pa+regula+e+uso+All+Inclusive+na+e+hotelnan+na+nos+Pais.+E+tratamento+di+e+Ley+aki+a+wordo+presidi+pa+un+guerra+mediatico+entre+Minister+Oduber+y+e+organisacionnan+cu+ta+representa+e+sector+turistico+na+nos+Pais+na+unda+via+medionan+di+communicacion+a+presenta+diferente+argumento+pro+of+contra+y+den+cual+a+presenta+na+Pueblo+e+preocupacion+cu+tin+cu+e+regulacion+di+All+Inclusive+de]}
Diabierna pasa Parlamento a cuminsa trata e cambionan den e Ley General di Permiso pa asina por acomoda e cambionan pa regula e uso All Inclusive na e hotelnan na nos Pais. E tratamento di e Ley aki a wordo presidi pa un guerra mediatico entre Minister Oduber y e organisacionnan cu ta representa e sector turistico na nos Pais na unda via medionan di communicacion a presenta diferente argumento pro of contra y den cual a presenta na Pueblo e preocupacion cu tin cu e regulacion di All Inclusive den e forma con Minister Oduber kier regle. Pero nos a compronde cu tras di e Ley aki tin mas cos cu Pueblo tambe mester ta na altura di dje. E Ley di All Inclusive mester sirbi interes general di nos Pueblo y no djies e interes di sponsers di AVP cu ta den guerra cu otro.

Sponsers di AVP tin guerra cu otro
Nos a compronde cu e motibo real cu a conduci pa bin cu regulacion di All Inclusive na Aruba ta sinta den e hecho cu algun tempo pasa a surgi un problema di competencia entre dos compania local, conoci pa ta sponsers of sostenedornan fuerte di AVP, cu ta prove producto pa un High Rise Hotel na Aruba. E problema a escala na momento cu Minister Oduber, conoci pa ta wordo sosteni den su campania electoral pa un di e companianan aki, sin haci e investigacion necesario a propone pa bin cu e cambionan di ley pa bay regula All Inclusive cu ta mishi net cu e concepto di negoshi di e High Rise Hotel en cuestion y e otro hotelnan cu sa haci uso di e concepto di All Inclusive pa mantene nan ocupacion di hotel stabiel. E problema a escala na un nivel mas grandi y a bira mas visibel pa comunidad ora cu un di e companianan envolvi den e disputa a haci uso di su contactonan den organisacionnan cu ta representa e sector turistico pa asina hiba un guerra mediatico contra Minister Oduber y su plan pa regula All Inclusive.

Minister Oduber ta bay menciona e nombernan
Nos mes no tin prueba pa sustancia e veracidad di e origin di e guerra aki entre sponsers di AVP, pero Minister Oduber durante e tratamento di e Ley di All Inclusive a duna un declaracion cu ta sustancia basta locual nos ta trece dilanti. Minister Oduber a cuminsa na splica e modus operandi con capitalistanan tras di cortina ta menasa y dirigi gobernacion di Gabinete Eman na nos Pais. E mandatario a duna como ehempel esnan cu ta donio di hotel den cercania di Parlamento y cu ta encarga cu carga na nos Pais como un di e podernan tras di cortina y a sigura Parlamento di bay menicona e nomber di tur e otronan cu ta stroba gobernacion na nos Pais di e mesun forma.

Ta Aruba su interes mester wordo sirbi
Kiko tin di berdad, ta tempo lo mustra nos. Pero ta bon pa Pueblo tene cuenta si cu locual ta pasando rond di nos, esta e wega y e guerra di poder cu ta bira cada dia mas visibel. Pa locual ta trata e regulacion di All Inclusive, pa tuma un decicion cu ta sirbi interes general di e Pueblo di Aruba, mester tin un investigacion haci pa e situacion di Aruba como punto di salida y no djies un guerra entre sponsers di AVP. Pesey ta ora pa Minister Oduber saca e rapport cu Price Waterhouse Coopers a traha riba e situacion di All Inclusive na Aruba y duna Parlamento pa asina por tuma un decicion cu realmente ta sirbi interes di Aruba.

20 augustus 2016

Expresionnan haci den e articulo aki no necesariamente ta refleha opinion di ArenaPoliti.co