{idkey=4836b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4066-gabinete-me-ii-gobernador-fredis-refunjol-a-enfoca-riba-e-mercado-laboral-cu-ta-mustra-positivo-na-2017-cu-cifranan-hopi-bou-di-desempleo%3FItemid%3D101][title=Gabinete+ME+II%3A+Gobernador+Fredis+Refunjol+a+enfoca+riba+e+mercado+laboral+cu+ta+mustra+positivo+na+2017+cu+cifranan+hopi+bou+di+desempleo][desc=ORANJESTAD+-+Tur+a%C3%B1a%2C+riba+e+di+dos+diamars+di+luna+di+september%2C+Gobernador+di+Aruba%2C+den+nomber+di+Rey+Willem+Alexander+y+como+cabez+di+gobierno+di+Aruba%2C+ta+habri+e+A%C3%B1a+Parlamentario.+E+a%C3%B1a+aki+Gobernador+Refunjol+ta+haci+esaki+pa+ultimo+bes.+Den+su+bunita+discurso+el+a+repasa+varios+topico.+El+a+papia+entre+otro+riba+sostenibilidad%2C+reapertura+di+e+refinieria%2C+di+calidad+di+bida+di+henter+comunidad%2C+di+e+presupuesto+cu+a+keda+entrega+na+tempo+cu+un+deficit+di+0%2C5%25+%26amp%3Bnbsp%3By+varios+otro+tema]}
ORANJESTAD - Tur aña, riba e di dos diamars di luna di september, Gobernador di Aruba, den nomber di Rey Willem Alexander y como cabez di gobierno di Aruba, ta habri e Aña Parlamentario. E aña aki Gobernador Refunjol ta haci esaki pa ultimo bes. Den su bunita discurso el a repasa varios topico. El a papia entre otro riba sostenibilidad, reapertura di e refinieria, di calidad di bida di henter comunidad, di e presupuesto cu a keda entrega na tempo cu un deficit di 0,5%  y varios otro tema cu ta regarda Aruba henter. 

Pa loke ta Turimso Gobernador a bisa lo siguiente. "Hunto cu e Organisacion Mundial di Turismo di Nacionan Uni, Aruba ta anfitrion di e Conferencia Happiness 360, dunando asina atencion na e importancia di nos hendenan pa un industria turistico sostenibel.

Prosperidad y sostenibilidad ta inalcansabel si inversion den nos hendenan keda atras. Un economia basa riba conocemento ta fundamental pa yega un bienestar sostenibel pa un y tur. Mes importante ta e formacion di miembronan di e sociedad aki pa convivi y comparti cu otro."

E enfoke riba enseñansa a resalta. "Tur e esfuersonan cu nos haci awor pa mehora y reforma tur loke ta necesario den nos sistema di enseñansa, lo paga dividendo pa generacionnan nos dilanti. Man den man cu educadornan, Gobierno ta creando un sistema di enseñansa cu ta reconoce y maximalisa e diversidad di talentonan den nos hendenan y di cada alumno y studiante." Tambe Gobernador a bisa cu den e aña cu ta cuminsa awe, ta bay pone atencion special na formacion profesional adicional. Esaki ta rekeri inovacion y cambio den e sistema di enseñansa y formacion di adultonan. "Adultonan cu pa decadanan a sirbi nos, pero cu awor mester refleha mas e necesidadnan y posibilidadnan di formacion di e tempo moderno y globalisa cu nos ta biba aden. Durante e ultimo aña a sigui inverti den drecha infrastructura di scolnan, como tambe mehora nos sistema educacional pa inclui mas y mas alumno y studiante y no exclui ningun."

"Dos aspecto importante di e composicion social di nos comunidad ta e practica di deporte y mantene nos cultura bibo continuamente. E maneho integral di cultura lo salvaguardia y renoba nos herencia cultural y monumentonan historico. Lo sigui promove e sinergia entre cultura y enseñansa y turismo. Den cooperacion cu sector priva, lo introduci un dimension nobo den nos actividad economico principal cu lo contribui na un miho calidad di producto Aruba. Hopi ta esnan cu ta disfruta di deporte diariamente y cu ta beneficia di e oportunidadnan di desaroyo personal y social cu esaki ta ofrece, sea cu ta practica deporte como atleta activo, como entrenador, dirigente, boluntario of como observador." Pa loke ta Weganan Olimpico Gobernador a bisa cu no menos cu shete atleta di nos pais a demostra di ta dispone di e nivel pa por a cumpli cu e exigencianan di clasificacion pa e Weganan Olimpico. "E participacion di e prome representante di nos pais na Weganan Paralimpico, ta muestra cu nos sociedad ta birando cada biaha mas inclusivo y ta sirbi como motivacion pa mas persona cu un limitacion fisico bira activo y disfruta di e beneficionan cu deporte ta ofrece."

Gobernador tabata hopi optimista pa loke ta nos mercado laboral na 2017. "Den cooperacion estrecho cu sector empresarial y gremionan pa aumenta e participacion di mas ciudadano den nos mercado laboral, e perspectivanan pa mas empleo den nos pais ta hopi positivo pa 2017. Ta calcula cu e cifra di desempleo lo baha significantemente compara cu e cifranan di añanan anterior." Esaki sin duda ta un observacion alentador.

Expresionnan haci den e articulo aki no necesariamente ta refleha opinion di ArenaPoliti.co