{idkey=4579b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4100-gabinete-me-ii-presidente-lagarde-di-imf-ta-afirma-cu-e-forma-con-aruba-a-atende-cu-e-crisis-tabata-esun-miho%3FItemid%3D101][title=Gabinete+ME+II%3A+Presidente+Lagarde+di+IMF+ta+afirma+cu+e+forma+con+Aruba+a+atende+cu+e+crisis+tabata+esun+miho][desc=Aruba+ta+haya+razon+atrobe%21%26amp%3Bnbsp%3BPercura+pa+reparticion+husto+di+entrada+y+inversion+pa+stimula+economia%21%21%26amp%3Bnbsp%3BORANJESTAD+-+Si+compara+e+Aruba+di+awe+cu+e+Aruba+bandona+y+den+decadencia+na+fin+di+2009%2C+por+mira+y+sinti+un+diferencia+grandi.+Tabatin+asina+tanto+asunto+cu+a+bay+robes+riba+casi+tur+nivel+den+e+a%C3%B1anan+prome+%282001-2008%29%2C+cu+e+trabounan+pa+pone+e+isla+aki+bek+riba+pia+tabata+inmenso.+E+decadencia+tabata+bisto+y+tabata+causa+infelicidad+den+comunidad.+Riba+dje+dos+crisis+tabata+asota]}
Aruba ta haya razon atrobe! 
Percura pa reparticion husto di entrada y inversion pa stimula economia!! 

ORANJESTAD - Si compara e Aruba di awe cu e Aruba bandona y den decadencia na fin di 2009, por mira y sinti un diferencia grandi. Tabatin asina tanto asunto cu a bay robes riba casi tur nivel den e añanan prome (2001-2008), cu e trabounan pa pone e isla aki bek riba pia tabata inmenso. E decadencia tabata bisto y tabata causa infelicidad den comunidad. Riba dje dos crisis tabata asotando Aruba na mes momento. E crisis mundial y e crisis na cas unda e refineria a cera su portanan lagando un cantidad grandi di tata y mama di famia sin trabou.

Por bisa cu Aruba tabata pasando den un di su peor momentonan. Gabinete Mike Eman I a tuma rienda y mesora a anuncia cu no por pone e carga di e crisisnan riba lomba di pueblo y a scoge pa haci hustamente lo contrario. A dicidi pa stimula economia y fortifica e poder di compra enbes di austeridad. E pasonan tuma door di Aruba a haya critica severo y hasta tabatin confrontacion fuerte cu Hulanda. Aruba a mantene su postura. Awe e instituto mas poderoso na mundo IMF ta elogia e direccion cu paisnan manera Aruba a tuma. Inversion y no austerisacion. Esaki tabata e bon decision y miho escogencia.

Presidente di IMF, sra.Lagarde, ultimamente a adverti gobiernonan di e mundo desaroya pa enfoca nan atencion den aumenta nan sosten pa empleadonan cu tin un entrada abou, disminuyendo asina desigualdad entre e 'olanan di malcontento' cu tin contra globalisacion.

Lagarde a recomenda metodonan cu ta provee mas sosten pa empleadonan di entrada abou, tambe inversionnan publico grandi, un red mas grandi di siguridad social manera seguridad na momento cu un hende ta sin trabou pa e tin un entrada y un politica di impuesto y entrada mas husto, manera reduccion di BBO. Un pa un Gabinete Mike Eman a haci locual awe ta wordo mira como un necesidad, pasobra paisnan cu a haci lo contrario ta mirando un desigualdad grandi y creciente den entrada di ciudadanonan. Hopi gobierno na mundo a neglisha e aspecto social aki y awe tin un desekilibrio grandi den reparticion di entrada. Hopi hende cu ta bibando den pobresa den e paisnan ey cu a neglisha di haci loke Prome Minister Mike Eman a haci hunto cu partnernan social den Dialogo Social. Aruba a bin cu reparatietoeslag pa esnan di salario minimo y di entrada menos cu Afl. 2500, = pa luna. A bin cu reparatietoeslag pa pensionadonan.A aumenta via di indexering y voorjaarspremie y najaarspremie entrada di tur empleado publico y pensionadonan di APFA. A aumenta bijstand cu 25% y introduci schoolkinderentoeslag di Afl. 200,= pa luna pa cada mucha den un famia cu ta depende di bijstand. Un mama soltero cu 2 jiu cu bou di Gabinete Oduber tabata haya Afl. 605,= pa luna, bou di Gabinete Mike Eman a wordo redobla na Afl. 1135,= pa luna.

Cu reparatietoeslag pa empleadonan, aumento di minimumloon, reparatietoeslag pa pensionadonan, aumento di bijstand cu 25% y introduccion di schoolkinderentoeslag y indexering Gabinete Mike Eman a percura pa sostene e poder di compra locual hopi otro pais a faya di haci, segun IMF. E siguridad di rednan social cu IMF ta recomenda paisnan awe, loke Gabinete Mike Eman a haci, manera aumento di bijstand, mantencion di gelijkbedrag pa pensionadonan, reduccion di prijs di utilidad y bin cu programanan di sosten manera schoolkinderentoeslag. Esaki a yuda esnan di menos recurso grandemente y ta pone cu economia a draai miho.

Ta un orguyo grandi pa Aruba di tende awe di e Presidente di IMF cu paisnan tin cu haci inversionnan grandi den infrastructura pa stimula economia y creacion di trabao.

Hustamente loke ta inversionnan publico grandi cu Gabinete Mike Eman a haci cu mehoracionnan inmenso den Centronan di Ciudad, barionan a haya un upgrade tanto fisico como tambe a provee un miho calidad di bida pa e habitantenan, a renoba scolnan, espacionan publico a wordo construiy proyectonan grandi, entre nan esun di hospital, waf di container, Green Corridor y mucho mas y ainda tin mas pa bin. Sra. Lagarde ta recomenda Merca pa  - mescos Aruba a haci - hisa minimumloon, reduci e tarifanan di utilidad, introduci un sistema di reparatietoeslag pa di e forma aki mehora e mercado laboral. Aruba por ta orguyoso awe cu e instituto prestigioso IMF a duna e gobierno razon den su forma di a atende cu e crisis mundial y cu e crisis cu tabatin aki mes.

Durante e reciente conferencia di Minister di Turismo riba e importancia pa un pueblo tin felicidad (Happiness) profesornan di Harvard y otronan tambe a enfatisa e temanan cu Aruba durante e añanan di Gabinete Mike Eman a duna hopi atencion pa tin un ekilibrio mas husto den entrada cerca pueblo y enfoke riba calidad di bida.

Ta un satisfaccion grandi, sigur si tene na cuenta cu awe no unicamente a logra saca Aruba for di crisis social-economico cu e vision aki, pero el a resulta tambe e miho maneho pa finanzas publico, pasobra recuperacion economico tin su refleho atrobe den caha di gobierno. Gabinete Mike Eman a haya Aruba cu un defict di 5% y awe a reduci esaki na un deficit di 0,5%, algo cu no tabatin antes.  

Expresionnan haci den e articulo aki no necesariamente ta refleha opinion di ArenaPoliti.co