{idkey=3367b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4125-booshi-wever-upp-dowers-cu-argumentonan-di-shisheria-y-infantil-kier-tapa-su-incapacidad-pa-para-e-ola-di-criminalidad-na-aruba%3FItemid%3D101][title=Booshi+Wever+%28UPP%29%3A+Dowers+cu+argumentonan+di+shisheria+y+infantil+kier+tapa+su+incapacidad+pa+para+e+ola+di+criminalidad+na+Aruba%21%21][desc=Na+comienso+di+siman+UPP+a+saca+un+comunicado+di+prensa%2C+na+unda+nos+a+mustra+cu+e+ola+di+criminalidad+cu+ta+asotando+nos+pueblo+y+nos+pais%2C+no+ta+wordo+soluciona+zomaar%2C+pero+ta+rekeri+un+analysis+y+trato+holistico+%28pues+den+su+totalidad%29.+Y+alabes+nos+a+trece+algun+sugerencianan+realistico+y+factibel.+Ora+cu+nos+a+kere+cu+Dowers+lo+a+sikiera+tuma+su+tempo+pa+lesa+e+sugerencianan+y+comenta+riba+esakinan%2C+ela+scohe+pa+bay+scop+den+mi+direccion.Den+un+declaracion+haci%2C+ela+insinua+cu+mi+lo+a+come]}
Na comienso di siman UPP a saca un comunicado di prensa, na unda nos a mustra cu e ola di criminalidad cu ta asotando nos pueblo y nos pais, no ta wordo soluciona zomaar, pero ta rekeri un analysis y trato holistico (pues den su totalidad).
Y alabes nos a trece algun sugerencianan realistico y factibel.
Ora cu nos a kere cu Dowers lo a sikiera tuma su tempo pa lesa e sugerencianan y comenta riba esakinan, ela scohe pa bay scop den mi direccion.
Den un declaracion haci, ela insinua cu mi lo a comete un infraccion cu mi boto, y cu esey lo por ta un di e causanan di e tantisimo matansanan , asesinatonan of atraconan cu tin e ultimo 7 añanan aki na Aruba.
Den su afan di trata di hustifica e falta di maneho riba e tereno di combatimento di criminalidad, ela scohe pa bin cu shisheria, bisando cu mi persona lo ta trece ilegalnan Aruba of cosnan ilegal.
Mira con leu un hende mester bay pa purba di hustifica su incapacidad!

Loke Dowers mester bisa nos pueblo, ta cu su persona ta esun cu a bay di acuerdo pa kita e visa pa e Colombianonan!
Su accion tabata tin como consequencia cu tur hende por drenta nos Isla sin cu nan ta wordo gescreen.
Ta p'esey un scicario por drenta Aruba y bin regla asunto aki na Aruba, matando un conciudadano.
Un di e culpabelnan ta Dowers, pasobra si ela scucha di su propio hende e tempo ey, cu tur a conseha negativo riba e kitamento di e visa aki, probablemente e scicario aki lo no por a haya visa.
Y manera un hipocrita e ta bay na e sitio pa wak kiko a pasa, siendo cu e mes a percura pa e asesino por a drenta Aruba libremente.
Y pa purba di desvia atencion, e ta bay yora cu nan a menase cu morto.
A otro perro con este hueso, Arturo!.

Un otro caso ta e matansa cu a tuma lugar un par di aña pasa dilanti di Parlamento, na unda dos Colombiano a wordo sefta cu bala dor di polis.
E dos personanan cu a fayece den esaki ta hendenan cu a keda Aruba GRACIAS na Arthur Dowers.
Unda bo tabata ora cu un di nan a sali for di prison?
Dicon bo no a percura pa sake for di Aruba despues cu ela sinta su castigo?? Of esaki tambe bo kier hustifica cu e supuesto infraccion cumi lo a comete cu mi boto??

E otro persona cu a ser mata ta uno cu a drenta via lama ilegalmente, y tabata bezig cu e tramitenan pa haya su permiso pa keda Aruba.
Con esaki por ta posibel? Mi supuesto infraccion ta e motibo di esaki tambe?

En bes cu realmente Dowers trata na combati e criminalidad aki na Aruba, e ta bini cu shisheria.
Dicon Dowers no ta duna ordo pa para e tantisimo casonan di matrimonio ficticio cu Korpschef sa di nan?
Of esaki tampoco ta combiniele?
Kiko ela haci cu e doñonan di empresanan cu tabata tin ilegalnan trahando? Of esakinan ta amigonan of sponsornan?
Esaki tambe ta pa motibo di mi supuesto infraccion?
Kiko ela haci cu e denuncia di e hendenan cu ta drenta cu paspoort falso y ta wordo permiti drenta despues cu imigracion ta haya ordo di ariba pa laga nan pasa? No un caso tin, pero varios.

Na aña 2009 e mesun Dowers a bisa cu nan tin un plan pa combati criminalidad, sinembargo kiko nos ta mira? E pueblo ta biba den panico, cu miedo, nan tin miedo di subi caya, y pakiko?
E pakiko tin nomber y faam: ARTHUR DOWERS, y e partido cu e ta forma parti di dje: AVP. E ta esun responsabel pa tur e matansanan y asesinatonan cu ta tumando lugar aki na Aruba y no Booshi Wever, cu segun Dowers ta e culpabel door cu mi a comete un supuesto infraccion cu te cu awe no a ricibi ningun notificacion al respecto.

Pues tur loke Dowers a trece dilanti ayera, un biaha mas ta demostra cu e no ta sirbi, y aki mi ta duna Otmar Oduber razon, cu e mester move, pero no bay su so, pero hiba tur su coleganan hunto cune.
Eynan si mi por yude cu mi boto. Cu hopi gana lo mi hiba nan un isla pa nunca mas nan bolbe pa masacra nos pais.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, september 21, 2016

Expresionnan haci den e articulo aki no necesariamente ta refleha opinion di ArenaPoliti.co