{idkey=694b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4171-evelyn-wever-croes-mep-preocupacionnan-pa-e-deal-di-citgo%3FItemid%3D101][title=Evelyn+Wever-Croes+%28MEP%29%3A+Preocupacionnan+pa+e+deal+di+Citgo][desc=Den+Parlamento+ta+tratando+e+ley+di+Citgo.+Lider+di+MEP+a+trese+padilanti+e+preocupacionnan+cu+ta+biba+den+comunidad.+Ami+tin+sentimento+mixto+pa+cu+e+reapertura+di+e+refineria.Naturalmente+ami+tambe+kier+mira+desaroyo+den+e+pais+aki.+Mi+kier+mira+desaroyo+economico.+Mi+kier+mira+mas+cupo+di+empleo.+Pero+a+costo+di+kico%3F+A+costo+di+cuanto%3F+Cuanto+futuro+generacionnan+mester+bay+carga+e+costonan+pa+e+deal+aki%3F+Pero+ora+mi+mira+kico+e+Gobierno+aki+a+negosha%2C+mi+ta+bisa+cu+nan+por+a+haci+un+miho+tr]}
Den Parlamento ta tratando e ley di Citgo. Lider di MEP a trese padilanti e preocupacionnan cu ta biba den comunidad.

Ami tin sentimento mixto pa cu e reapertura di e refineria.
Naturalmente ami tambe kier mira desaroyo den e pais aki. Mi kier mira desaroyo economico. Mi kier mira mas cupo di empleo. Pero a costo di kico? A costo di cuanto? Cuanto futuro generacionnan mester bay carga e costonan pa e deal aki?

Pero ora mi mira kico e Gobierno aki a negosha, mi ta bisa cu nan por a haci un miho trabou. Nos a lucha pa un refineria, no loke gobierno ta duna nos awor.
Tin diferente aspectonan den e contract aki, cu mi por a analisa den e corto tempo cu nos a haya, cu tin mi preocupa:

Garantia:
E refineria ta bin cu riesgonan financiero cu ne. Pasobra tin un garantia, cu apesar cu Mike Eman a declara cu Gobierno y pais Aruba lo no duna un cen na e refineria y cu Gobierno ni pais Aruba lo para garantia pa niun cen na e refineria, den e contract ta para cu Gobierno di Aruba ta bay para garantia pa 300 miyon dollar pa si algo mester bay malo y e refineria no por sigui opera na Aruba. Kiermeen tin un garantia financiero hinca den e contract cu anos tin pa bay carga pero tambe nos yiunan y nan yiunan.
Ami lo a prefera cu e Gobierno a firma e contract sin garantia manera a sosode tempo cu Coastal a bin, Gobierno di MEP no a firma niun garantia.
Y pesey mi a puntra Gobierno si por renegocia e parti aki?
E asunto di e garantia ta hopi delicado. Mi ta propone pa RDA sera un seguro cu un compania internacional pa cover cualquier claim incluyendo desaster natural.

Miedo ambiente:
Den e contract no tin compromisonan fuerte tocante medio ambiente. Gobierno deliberadamente no ta bin cu e ley di medio ambiente Parlamento, por lo tanto nan no ta mara e compania aki na ley di miedo ambiente tampoco. Nos kier mira un refineria cu ta opera na un manera limpi.

Labor:
Tin cupo di trabou pa 3 mil persona, minister a bisa cu 700 local so a solicita. E cifra aki ta parsemi hopi abou. Kiko nos a hasi pa stimula mas local pa solicita, Stimula nos hobennan, Stimula nos grandinan talves cu ta cu pensioen pero ainda por traha den refineria.Esnan cu ta fit y kier traha y tin e conosemento di e trabou. Maske ta part-time, p.e. elimina belasting riba pensioen di biehes manera nos ta pidiendo pa hopi tempo caba. Esey por ta un estimulo y nos no mester busca asina tanto hende for di exterior.
Y si mester bin cu mas di 2 mil persona di exterior, ta con nos ta bai hasi. Si no tin cas ni pa tur cu ta biba aki. Y nos infrastructura, hospital, caretera, scolnan. Mi a hasi e pregunta ey pero e contesta ta cu no tin ningun plan! Con porta cu bo no tin un plan. Ta 2000 hende nos ta papiando di dje, con nos ta bai hasi.

Benta di jet fuel, gasoline y diesel:
Awor aki e benta di jet fuel, gasoline y diesel cu ta cay bou di Valero Marketing and Supply. Gobierno ta bay haya e shares nan aki y lo bay tin e negoshi di e productonan aki den su man. Esaki ta algo bon pasobra porfin e prijs di gasolin na Aruba no ta bai ta den man priva, pero den man di gobierno. E fenomeno di prijsnan cu ta subi constantemente mientras prijs di crudo ta baha, lo por stop.
Sinembargo, e intencion di Gobierno ta pa bende esaki cu un tercera parti! Pakico si porfin Gobierno tin e deal aki den su man na unda e tin e monopolio di e prijs di gasoline, anto e kier bay bende of regale na un tercera parti pa atrobe nos mester depende di otro. No tin logica den esey. Ademas, na ken gobierno kier bai bende?

Inversion:
Parlamento kier sa ken ta bai hasi e inversion, y cuanto e inversion mester ta, tambe ki dia e inversion lo wordo hasi. Nos a puntra minister y ela contesta nos cu e no sa nada di esey. No ta logico cu gobierno ta verhuur un propiedad y e no sa si esun cu huur e por paga of no. Esey ta absurdo. Tambe tin e posibilidad cu e banco cu presta e placa (Lender) ta tuma over si Citgo no cumpli, y pesey ta imposibel cu gobierno ta pretende cu e no sa nada di e inversion.

Valero
Valero ta walk away cu un sonrisa grandi riba su cara. Minister a bisa cu nan lo bai paga cuantioso miyones, pero cuanto nan lo paga en realidad ta cu nan lo paga, $1 of $2 miyon?
Y un otro pregunta mas. E MoU entre Valero y Gobierno di 2011 cu nos a ricibi awor, dicon nunca gobierno a bin Parlamento cune? Ta para cu mester a bin Parlamento pasobra den e MoU ta duna cierto exoneracionnan di claim ambiental, y esey ta contra Comptabiliteitsverordening, pesey mester bin parlamento. Awor cu no a bin parlamento, ta otro acto castigabel di tur e ministernan.

Esakinan ta apenas algun di e preocupacionnan cu mi por a topa cune den e documentonan den e tempo cortico cu nos a haya pa studia e miles di pagina den algun dia. Mi ta spera cu gobierno realisa e preocupacionnan aki y duna contesta riba e preguntanan.

Expresionnan haci den e articulo aki no necesariamente ta refleha opinion di ArenaPoliti.co