{idkey=9727b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4286-booshi-wever-upp-criminalidad-y-inseguridad-ta-un-refleho-di-e-mal-gobernacion-cu-nos-tin-aki-na-aruba-y-ta-rekeri-cambionan-drastico-pa-evita-derumbe-di-nos-democracia%3FItemid%3D101][title=Booshi+Wever+%28UPP%29%3A+Criminalidad+y+inseguridad+ta+un+refleho+di+e+mal+gobernacion+cu+nos+tin+aki+na+Aruba+y+ta+rekeri+cambionan+drastico+pa+evita+derumbe+di+nos+democracia][desc=Algun+siman+pasa+caba+UPP+a+mustra+bon+cla%2C+cu+e+solucion+di+criminalidad+aki+na+Aruba+no+ta+un+%E2%80%9Cquick+fix%E2%80%9D.+E+ta+algo+cu+mester+wordo+atendi+den+un+forma+holistico%2C+pues+mirando+tur+aspectonan+cu+por+tin.+Sigur+ta%2C+cu+un+solo+marcha+di+protesta+of+manifestacion+lo+NO+soluciona+e+problema+cu+nos+pais+ta+pasando+aden.+Mas+ainda+ora+cu+minister+di+Husticia+Arthur+Dowers%2C+SU+percepcion+di+e+realidad+actual+na+Aruba+ta+completamente+robes.+Su+posicion+intransigente+como+tambe+su+empe%C3%B1o+pa+keda+]}
Algun siman pasa caba UPP a mustra bon cla, cu e solucion di criminalidad aki na Aruba no ta un “quick fix”. E ta algo cu mester wordo atendi den un forma holistico, pues mirando tur aspectonan cu por tin. Sigur ta, cu un solo marcha di protesta of manifestacion lo NO soluciona e problema cu nos pais ta pasando aden. Mas ainda ora cu minister di Husticia Arthur Dowers, SU percepcion di e realidad actual na Aruba ta completamente robes. Su posicion intransigente como tambe su empeño pa keda culpa tur hende di e situacion di criminalidad y inseguridad reinante, lo NO tin como resultado un solucion favorabel pa e situacion cu nos ta aden.

UPP ta sostene e manifestacion di diahuebs awor, ya cu esaki tambe ta un forma democratico pa pueblo laga su voz rezona. Pero UPP kier adverti nos pueblo, cu e protesta aki no lo bay ta suficiente. Esaki lo no trece un solucion concreto y permanente, tanten cu no bin cu cambionan fundamental den nos sistema di goberna e pais aki. E nivel di criminalidad y inseguridad den un pais ta e refleho di e gobernacion di un pais. Mas malo un gobernacion, mas criminalidad lo tin.
UPP sigur ta kere cu criminalidad comun y esun organisa mester wordo atendi y ataca. Pero UPP ta mira tambe cu e criminalidad di mas grandi cu mester wordo atendi ta esun di mal gobernacion y di corupcion cu ta tumando lugar aki na Aruba. Esaki tambe ta un crimen cu ta tumando lugar contra nos pueblo, pero cu parse cu nos no kier atende debidamente. Desde su lantamento, UPP a vocifera cu tanten cu no bin cu e concepto di Bon Gobernacion, cu no mara man di e politiconan, nos lo sigui haya un gobernacion eratico y cu no ta dirigi riba e necesidadnan basico di un pueblo. Esta bienestar, progreso y seguridad.
P’esey UPP ta convenci cu na final di cuenta e unico intervencion poderoso pa atende y soluciona e problema di criminalidad lo ta un eleccion democratico, unda e pueblo ta haña e oportunidad pa laga su voz rezona.

Banda di nos gobierno UPP tambe ta mira nos parlamento. Ainda ta fresco den nos memoria con un luna pasa partidonan y parlamentarionan por a uni den Parlamento pa yega na un “amienda di consenso” riba asunto di “union civil”. Pero den e caso di abuso di nos muchanan, desde 2010 ainda no por caba di trata e cambionan den nos codigo penal pa cu esaki.
Y mei mei di tur e criminalidad di ultimo dianan, nos ta observa e caso di pedofelia e siman aki, unda un persona ta wordo gara cu un criatura den auto. Mesora nos ta haya un discusion riba e situacion aki.

Desde 2010 a purba di bin cu cambionan den ley pa atende e situacion di abuso di mucha. Presidente di Parlamento di e tempo ey, sr. Paul Croes, a institui un comision special pa atende e asunto aki. Awe e mesun persona ta minister di hubentud y loke el a logra ta pa bin cu 500 poster pa pidi pa stop abuso di mucha. Nos por mira e presidente actual sra. Mervin Wyatt Ras, cu tambe tabata parti di comision aki, ta papia di e urgencia pa trata e reunion di criminalidad den vakantie. Nos a scucha sra. Eveline Wever Croes, kende a entrega e ley pa trece cambionan den nos codigo penal, keha riba e falta di atencion di parti gobierno y parlamento pa trata e asunto aki. Nos por conclui cu tur fraccion den parlamento ta comparti e opinion cu mester actua contra abuso di mucha. Pero, hunto tur e parlamentarionan aki, incluyendo sr. Andin Bikker, kende tin un candidata riba su lista cu ta bringa contra abuso di mucha, a uni pa yega na un amienda di consensus algun siman pasa. Y dicon no por a negosha e aspecto aki tambe? Pakico no a wak e urgencia pa yega na un conseso pa haci e cambionan necesario den nos codigo penal pa bringa abuso di nos muchanan, en bes di ta bin grita awor cu nada ta wordo haci?
UPP ta kere cu e agrupacionnan cu ta bringa contra abuso di mucha, tambe mester laga nan voz rezona riba e dia aki. Pasobra abuso di mucha tambe ta un crimen.

Pero UPP ta kere cu riba e dia aki, nos organisacionnan ambiental tambe mester mustra cara, mirando e destruccion contra nos natureleza cu ta tuma lugar dor di gobierno y en especial dor di ministernan Sevinger y Eman. Esaki tambe ta un crimen contra nos medio ambiente, nos futuro generacion y nos Aruba. Aruba Bird Conservation, StimAruba, y otronan mester laga nan voz rezona riba e dia aki.
Tambe e mayornan cu awor ta wordo obliga pa contribui cu un schoolgeld mas halto, mester laga nan voz rezona. Ya cu aki tambe ta trata di un crimen administrativo cu ta wordo cometi contra nos yuinan, cu tin derecho riba enseñanza liber, manera UNESCO ta propaga.
Pa UPP mes ta hopi importante tambe, pa tur esnan cu no tin confiansa mas den nos sistema di gobernacion, y cu ta para hunto cu UPP pa loke ta Good Governance, esta Bon Gobernacion, tambe laga nan voz rezona. UPP ta mira cu nos forma di gobernacion, e mal gobernacion cu tin, den proyectonan corupto, negoshi den tereno, negoshi cu permiso pa stranheronan, y awe e asunto di negoshi y traficacion di hende via nos imigracion, como aspectonan di criminalidad formalisa y oficialisa.
Si e protesta di diahuebs ta trata algo simplemente pa bringa e crimen comun y inseguridad cu ta existi, UPP ta keda skeptico pa loke ta e resultado. UPP ta exigi cu partidonan politico y gremionan aki na Aruba, reconoce cu mester bin cambionan fundamental den nos sistema di gobernacion di Aruba. Si esaki no sosode, anto nos lo haya cu aki algun luna nos ta mes un leu of mas peor ainda.


Partido UPP
Booshi Wever
12 oktober 2016

Expresionnan haci den e articulo aki no necesariamente ta refleha opinion di ArenaPoliti.co