{idkey=6775b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4348-gabinete-me-ii-minister-sevinger-ta-aplaudi-e-15-miyon-cu-fcca-a-hinca-den-proyectonan-pa-pueblo%3FItemid%3D101][title=Gabinete+ME+II%3A+Minister+Sevinger+ta+aplaudi+e+15+miyon+cu+FCCA+a+hinca+den+proyectonan+pa+pueblo][desc=+Cas+pa+Senioren+ta+forma+parti+importante+di+maneho+di+FCCA.%26amp%3Bnbsp%3B+ORANJESTAD+%E2%80%93+Minister+encarga+cu+asuntonan+di+Infrastructura+di+Pais+Aruba%2C+a+firma+diferente+contracto+na+balor+di+15+miyon+florin+durante+un+ceremonia+di+FCCA+diabierna+ultimo.+E+contractnan+ta+debi+na+un+serie+di+proyectonan+cu+ta+cuminsa+bou+auspicio+di+FCCA+cu+ta+inclui+e.o.+cas+pa+nos+grandinan%2C+casnan+social+den+diferente+bario+y+areanan+di+recreacion+pa+barionan+di+FCCA+rond+di+Aruba.+%E2%80%9CE+proyectonan+aki+sigur+ta+impo]}
Cas pa Senioren ta forma parti importante di maneho di FCCA. 

ORANJESTAD – Minister encarga cu asuntonan di Infrastructura di Pais Aruba, a firma diferente contracto na balor di 15 miyon florin durante un ceremonia di FCCA diabierna ultimo. E contractnan ta debi na un serie di proyectonan cu ta cuminsa bou auspicio di FCCA cu ta inclui e.o. cas pa nos grandinan, casnan social den diferente bario y areanan di recreacion pa barionan di FCCA rond di Aruba.

“E proyectonan aki sigur ta importante pa maneho di Gobierno, pa loke ta e vision di unda kier hiba nos pais, mehorando calidad di bida pa nos hendenan. Awe nos a firma hunto cu FCCA, SETAR, TNO, ELMAR, Utilities, WEB y diferente compania di construccion contractonan riba proyectonan cu ta bay cuminsa bou presupuesto di FCCA.” Algun di e proyectonan ta Cas pa Grandinan (Senioren Woning den Savaneta, Cunucu Abou y Kiviti), pero tambe cas di Smart Community, canchanan di futbol cu ta bay wordo construi (e.o. na Noord Cura Cabay). “Tur ta proyectonan cu ta bay contribui na e vision total di Gabinete Mike Eman II pa mehora calidad di bida di nos ciudadanonan. Pues e ta algo masha importante y nos ta papia di 15 miyon florin.” E inversion di 15 miyon ta nifica alabes, e mandatario a agrega, mas movecion di placa den e economia, mas entrada pa trahadonan y na final mas hende cu lo ta feliz di haya un cas pa biba aden den nan mesun bario, den nan mesun ambiente.

Minister Sevinger a señala cu cifranan ta mustra cu e personanan cu ta bay cu pensioen ta duplica den e proximo añanan y esaki ta nifica cu mester di mas vivienda cu ta adapta na personanan di edad, pa nan por biba independiente sin cu nan ta biba den un Cas di Anciano. Mirando e reto aki cu ta na caminda, FCCA a enfoca riba e grupo menciona pa nan tin e vivienda adecuado. “E ultimo añanan hunto cu FCCA a enfoca riba drechamento di barionan, verf e casnan social, drecha e infrastructura, cu ta parti di e combinacion riba e vision pa mehora calidad di bida pa nos ciudadanonan. Loke cu FCCA ta ehecutando aworaki tambe ta forma parti di e pensamento di nos Gobierno.”

Jose Paula, hoofd sector Bouwtechniek, ta e persona bou ken coordinacion di e proyectonan ta cay. El a papia di total 9 proyecto cu a firma, cuminsando cu esun di construccion di 36 cas pa senioren. “E “vergrijzing” ta birando basta grandi, pesey nos a cuminsa concentra riba e grupo aki. Na Cunuco Abou nos tin 18 cas pa Senioren. E idea tras di esaki ta cu FCCA kier construi den tur e barionan facilidadnan pa e hendenan di edad, pa e personanan no sali di nan bario, ya cu mayoria ta prefera di keda eynan,” Paula a splica.   

FCCA a siña di nan experencia di pasado, esta Cas pa Senioren na Paradera, unda cu a constata cu e casnan aki tabata demasiado grandi pa e clientenan di edad. Esaki ta e motibo cu a dicidi di trece algun ahuste den e proyecto piloto di Paradera. E casnan na Paradera ta mucho grandi y no ta tur grupo por haci uzo di nan, pesey den renobacion di casnan social na Juwana Morto, Jara y Pos Chiquito, a percura cu e clientenan por drenta cu un rolstoel den e bañonan, e portanan a wordo adapta tambe. Basa riba esaki, a dicidi baha e grandura di e casnan te na 42 M2. Esaki ta nifica cu hopi mas hende cu ta 60+ lo por bini na remarca pa un di e tipo di casnan aki. “Esaki ta e concepto cu nos a cambia, basa riba loke nos a cuminsa cu ne na Paradera. E idea ta cu mayoria di e cas pa senioren, FCCA mes lo percura pa maneha nan,” Paula a duna di conoce.

Expresionnan haci den e articulo aki no necesariamente ta refleha opinion di ArenaPoliti.co