{idkey=6702b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4359-rene-herde-avp-pakico-hulanda-no-kier-un-areglo-di-conflicto%3FItemid%3D101][title=Rene+Herd%C3%A9+%28AVP%29%3A+Pakico+Hulanda+no+kier+un+areglo+di+conflicto][desc=Ora+dos+hende+of+dos+compania+tin+un+conflicto+of+un+disputa+cu+otro%2C+nan+ta+bay+corte+di+husticia.+Tur+dos+ta+haya+oportunidad+pa+trece+nan+punto+di+bista+dilanti.+Ora+corte+tuma+su+desicion+riba+ken+tin+rason%2C+tur+dos+persona+of+compania+ta+accepta+e+desicion+di+corte.+Esey+ta+ancra+den+leynan+di+nos+pais.+Nos+tur+mester+tene+nos+mes+na+e+desicion.+E+desicion+di+corte+ta+percura+pa+un+diferencia+di+opinion+entre+dos+persona+no+bira+un+pleito+mas+grandi+y+asina+corte+ta+percura+pa+despues+di+un]}
Ora dos hende of dos compania tin un conflicto of un disputa cu otro, nan ta bay corte di husticia. Tur dos ta haya oportunidad pa trece nan punto di bista dilanti. Ora corte tuma su desicion riba ken tin rason, tur dos persona of compania ta accepta e desicion di corte. Esey ta ancra den leynan di nos pais. Nos tur mester tene nos mes na e desicion. E desicion di corte ta percura pa un diferencia di opinion entre dos persona no bira un pleito mas grandi y asina corte ta percura pa despues di un disputa, trankilidad ta sigui reina den pais. Ta asina ta soluciona diferencianan di opinion den nos comunidad.
Ora dos pais tin un diferencia di opinion riba por ehempel e frontera entre nan dos, nan ta bay Corte Internacional. Ora e corte dicta sentencia e dos paisnan ta accepta e desicion y biba cun'e. Ta asina den mundo ta soluciona disputanan entre paisnan.
Ora entre e paisnan di Reino Hulandes tin un disputa of diferencia di opinion, NO TIN UN CORTE cu nos por bay busca un veredicto cu tur pais den Reino ta accepta. Ora tin un diferencia di opinion of un disputa entre Aruba of Corsow of Sint Maraten cu Hulanda, ta gobierno di Hulanda - bisti cu e mascara di Gobierno di Reino - ta dicidi! E otro paisnan - Aruba, Corsow of Sint Maarten - por protesta, scirbi carta pa presenta su punto di bista, por hasta subi avion y bay Hulanda. Pero na fin di dia ta Gobierno di Hulanda ta dicidi. Hasta si nan comete un eror of viola ley, no tin niun instancia pa corrigi nan. Nan por keda para riba nan desicion. Pasobra tog no tin niun instancia pa pone nan cambia nan desicion.

AREGLO PA SOLUCIONA CONFLICTO
E echo cu pa e paisnan di Reino Hulandes no tin un corte di Husticia of un "areglo con pa soluciona un conflicto" (= geschillenregeling) ta haci cu e paisnan Aruba, Corsow y St. Maarten, mester accepta desicionnan di gobierno di Hulanda, hasta ora nan ta incorecto, illegal y inhusto. Den e ultimo añanan tabata tin basta di e desicionnan incorecto, inhusto y hasta illegal di gobierno di Hulanda. Den casi tur e casonan gobierno Hulandes a djis pone e protesta di Aruba, Corsow of Sint Maarten un banda. Den e caso cu gobernador di Aruba a wanta e presupuesto aproba riba instruccion di Hulanda na 2014, Raad van State a duna un "conseho" (= no un veredicto!) despues cu Parlamento Hulandes a stroba e proceso pa haya e conseho pa henter un aña! E conseho di Raad van State a bisa bon cla cu gobierno Hulandes a actua incorecto y illegal. Pero como cu e tabata solamente un "conseho" y e no tabata na fabor di Hulanda, gobierno Hulandes a pone e "conseho" aki un banda! Den e caso cu gobierno di Hulanda kier a dicidi ken por bira minister na Aruba (= tabata trata di Glenbert Croes), gabinete Henny Eman a protesta. Gobierno Hulandes tabata tin e desencia di instala un comision cu a dicidi cu Hulanda tabata completamente fout. Gobierno Hulandes a accepta e conseho ey. Pero esey tabata e ultimo biaha cu gobierno Hulandes a mustra respet pa Statuto di Reino y Constitucion di nos pais. E nombracion di e gobernador di Aruba siman pasa, contra di e procedura palabra y sin aprobacion di gobierno di Aruba, ta djis otro ehempel di e falta di respet total pa ley y Statuto di Reino. E gana di por mete den asuntonan interno di Aruba, Corsow y Sint Maarten ta keda fuerte, pasobra gobierno Hulandes ta sigui kere cu nan por dicidi miho pa nos kico tin cu sosode den nos paisnan. E casonan di metemento directo den asuntonan di Corsow y St Maarten ta fresco den nos memoria. Tanten cu e arogancia di por viola ley y e gana di mete ta prevalece, tanten cu e falta di respet pa Statuto di Reino y Constitucion di nos pais keda existi na Den Haag, no lo tin un areglo pa soluciona conflicto cu ta duna un veredicto manera un corte di husticia. Un "areglo di conflicto" lo stroba nan di tuma desicionnan asina. Pero tanten cu tin partidonan -manera MEP- cu ta hasta aplaudi desicionnan incorecto, inhusto y illegal manera e wantamento di e presupuesto na 2014 y e nombracion di e gobernador na 2016, Gobierno di Hulanda lo sinti nan mes reforsa pa sigui dicidi den e forma colonial, dictatorial y illegal aki. Nan no lo sinti ni e necesidad pa un "areglo di conflicto", pasobra tin hende ta sostene y aplaudi nan desicionnan illegal y nan forma di trapa riba nos paisnan. 

Expresionnan haci den e articulo aki no necesariamente ta refleha opinion di ArenaPoliti.co