{idkey=8241b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4475-booshi-wever-upp-mike-eman-riba-lomba-di-otmar-oduber-ta-hunga-populismo-den-optima-forma%3FItemid%3D101][title=Booshi+Wever+%28UPP%29%3A+Mike+Eman+riba+lomba+di+Otmar+Oduber+ta+hunga+populismo+den+optima+forma][desc=Partido+UPP+ya+caba+den+un+articulo+anterior+a+mustra+riba+e+problema+di+Otmar+Oduber+y+AVP%2C+unda+cu+Mike+Eman+a+demostra+falta+di+liderasgo+no+solamente+den+su+partido%2C+sino+tambe+na+nivel+di+nacional+di+gobernacion.+Nos+a+mustra+riba+e+hecho+cu+Mike+Eman+den+su+declaracion+a+bisa+cu+ningun+minister+no+por+a+traha+cu+Otmar+Oduber.+Y+como+ehempel+el+mustra+e+situacion+di+AruParking%2C+cu+Otmar+Oduber+no+kier+a+mira+cu+e+maneho+di+parkeo+tabata+tin+mester+adaptacion.+Nos+a+mustra+cu+den+forma+truin]}
Partido UPP ya caba den un articulo anterior a mustra riba e problema di Otmar Oduber y AVP, unda cu Mike Eman a demostra falta di liderasgo no solamente den su partido, sino tambe na nivel di nacional di gobernacion. Nos a mustra riba e hecho cu Mike Eman den su declaracion a bisa cu ningun minister no por a traha cu Otmar Oduber. Y como ehempel el mustra e situacion di AruParking, cu Otmar Oduber no kier a mira cu e maneho di parkeo tabata tin mester adaptacion. Nos a mustra cu den forma truinfal Mike Eman ta anuncia, cu awor cu Otmar Oduber no ta un estorbo mas, lo bin cu cambio di maneho den asunto di AruParking. Esaki mas bien mester ta un berguensa como lider di un gobierno, y cu “for the sake” di su partido y pa wanta su gobernacion hunto, no tabata tin e “guts” pa atende e problema di AruParking pa por suavisa e maneho.

Mientras AruParking ta bay haci dos aña y cu a caba y ta cabando cu centro di nos ciudad y principalmente Caya Betico Croes, Mike Eman no a percura pa convence y mustra su minister cu lo mester cambia e maneho di AruParking. Pero Mike Eman, pa scapa su partido y gobierno te na unda cu tabata por, a prefera di sacrifica nos comerciantenan y nos trahadornan den Playa y laga Otmar Oduber sigui cu su capricho. Awor Mike Eman kier bin hunga heroe, y a haci anuncio importante tocante cambio di maneho.

Importante ta e reaccion di Otmar Oduber, kende a keda asombra pa loke ta e cambio aki, ya cu e maneho di parkeo el a laga sa cu ta Conseho di Minister completo a bay di acuerdo cu ne. Pues pa UPP ta obvio cu awor aki Mike Eman, riba lomba di Otmar Oduber, kier pa hunga heroe, practicando asina un populismo total pa loke ta AruParking.

E simpel ehempel aki di AruParking ta muestra cu Mike Eman no tin liderasgo den su gobierno ni di e pais aki. Y cu pa beneficio partidario el a sacrifica comerciante y trahadornan di Oranjestad. E tipo di populismo aki tambe nos por a scucha for di parlamentarionan di oposicion, na unda cu tin di nan a bay asina leu di bisa cu lo mester elemina e parkeermeternan totalmente.

Otmar Oduber ta bisa cu e AruParking N.V. ta un compania cu su intencion ta pa financia operacion di Arubabus N.V. Pero nos por mira cu ta bayendo di dos aña, na unda cu ya caba e prome aña a sera cu perdida cu gobierno, lesa pueblo, mester a subsidia.

UPP den su programa pa campaña electoral a presenta su punto di bista pa loke ta transporte publico. UPP ta mira cu transporte publico mester wordo subsidia, y ta gratis pa pueblo. Esaki tin hopi bentaha, manera un mobilidad di nos trahadornan sin e presion di costo di transporte, transporte gratis pa nos hobennan cu ta bay school y mescos pa nos grandinan. Tambe esaki lo pone menos presion riba nos careteranan di Aruba y ta contribui na un medio ambiente mas sano.

UPP como partido tambe ta contra cu sin mas ta hisa benta cu eleminacion di “inversionnan” cu ya a wordo haci. UPP ta contra “destruccion di capital” (kapitaalvernietiging). Esaki ta loke ta sosode na momento cu bay na kita y benta e parkeermeternan den deposito di Arubus.

Loke UPP ta mira ta un adaptacion di e maneho y ehecucion di plan di parkeo. UPP ta kere cu AruParking N.V. lo mester wordo elemina y pasa un parti di e trahadonan pa e departamento di Transporte Publico (DTP). E departamento aki lo haya un tarea mas, esta esun pa controla e situacion di parkeo.

Lo elemina partinan di parkeermeter (y pone esaki otro caminda). Asina nos por pensa tur e cayanan poco aleha di centro, lo mester bolbe na e normalidad di parkeo cu nos a conoce. Esaki ta duna oportunidad pa hendenan por para den areanan un tiki mas leu for di centro di ciudad sin tin nodi paga nada. Na mes momento adapta tarifanan y laga cierto partinan dilanti cierto negoshinan, cu e parkeermeternan pa asina duna oportunidad na clientenan pa yega mas cerca di negoshinan. Esaki lo percura pa un mobilidad den e centro directo di Oranjestad. Hunto cu esaki lo mester traha sitionan di parkeo, garashi di parkeo, den cercania di concentracionnan di negoshinan unda tanto cliente como trahadornan por para nan auto, na un prijs rasonabel.

UPP no ta kere cu AruParking lo ta e solucion pa financia e operacion di Arubus. Esaki a keda demostra caba, unda cu juist esaki a bin un peso extra riba gobierno su finanzas pa cubri perdidanan.
Pero awe nos lo wak con POPULISMO den gran forma lo wordo hunga simplemente pa por mitiga e daño cu e retiro di Otmar Oduber.


Partido UPP
Booshi Wever
9 november 2016

Expresionnan haci den e articulo aki no necesariamente ta refleha opinion di ArenaPoliti.co