{idkey=8728b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4491-presidente-di-parlamento-mervin-wyatt-ras-satisfecho-cu-tratamento-di-presupuesto-2017-di-pais-aruba-ta-bai-vlot%3FItemid%3D101][title=Presidente+di+Parlamento+Mervin+Wyatt-Ras%3A+Satisfecho+cu+Tratamento+di+Presupuesto+2017+di+pais+Aruba+ta+bai+%E2%80%9Cvlot%E2%80%9D][desc=+Presidente+di+Parlamento%2C+Mervin+Wyatt-Ras%2C+ta+declara+di+ta+satisfecho+cu+tratamento+di+presupuesto+di+pais+Aruba+ta+bai+%E2%80%9Cvlot%E2%80%9D.+Dicho+presupuesto+e+anja+aki+a+keda+entrega+na+tempo+na+Parlamento+segun+nos+Constitucion+y+lo+kier+trata+esaki+tamb+na+tempo.+Segun+Wyatt-Ras+e+sistema+cu+a+skohe+pa+trata+e+presupuestonan+un+pa+un+y+cu+cada+parlamentario+tin+nan+90+minuut+den+promer+tanda+y+45+minuut+den+e+segunda+tanda+pa+haci+uzo+di+esaki+manera+cu+nan+ke+durante+e+tratamento+y+cu+griffier+ta]}
Presidente di Parlamento, Mervin Wyatt-Ras, ta declara di ta satisfecho cu tratamento di presupuesto di pais Aruba ta bai “vlot”. Dicho presupuesto e anja aki a keda entrega na tempo na Parlamento segun nos Constitucion y lo kier trata esaki tamb na tempo. Segun Wyatt-Ras e sistema cu a skohe pa trata e presupuestonan un pa un y cu cada parlamentario tin nan 90 minuut den promer tanda y 45 minuut den e segunda tanda pa haci uzo di esaki manera cu nan ke durante e tratamento y cu griffier ta tene conteo di esaki ta un forma cu ta cayendo na agrado. Ademas Wyatt-Ras hunto cu griffier ta conta e cantidad di preguntanan haci y ta calcula cuanto minuut/ora e minister tin mas o menos pa contesta pregunta. Den pasado Parlamentarionan ta papia tanto minuut mientras ministernan ta keda papia horanan den Parlamento. E biaha aki ministernan tambe tin cu tene nan mes na cierto limite di tempo pa nan discurso. A inicia cu tratamento dialuna y ya caba a finalisa 6 di e 9 ministerionan, esta di Finanzas, Economia, Justicia, Infrastructura, Asuntonan Social y Turismo. Pa otro siman ta keda Salubridad, Ensenjanza y Asuntonan General. Por spera cu e ultimo presupuesto lo capta mas atencion y por na final lo vota ariba e presupuesto. Presidente ta haya lastima cu atencion durante e siman cu a pasa no a bai pa e bon preguntanan cu Parlamentarionan a haci na gobierno y mocionnan cu a ser presenta sino na un discucion cu a tuma lugar entre dos parlamentario unda cu un a tira palabra pa e otro y e otro a reacciona y asina a start un tiramento di palabra pa otro.

Wyatt-Ras kier duna contesta na tur esnan cu enbez di wak kico a pasa a skohe pa critica e presidente den medionan social. Wyatt-Ras ta reitera cu cada parlamentario ta responsable pa su comportacion y actitud den Parlamento. Cada parlamentario ta elihi dor di pueblo di Aruba pa representa nan. Wyatt-Ras ta enfatisa cu e no ta lider di crèche cu tin cu pone parlamentarionan sinta keto of manda nan para den huki. Esun cu tira palabra pa otro por spera di haya contesta di e otro. Wyatt-Ras no ta aproba e forma aki, sinembargo Wyatt-Ras no ta deal cu mucha sino cu adultonan cu mester sa nan limite y para responsable pa nan actonan. Wyatt-Ras mes a wanta hopi palabra di abuso no mucho tempo pasa den parlamento y e no a tende niun hende sali na su defensa. E mes a sabi di maneha e situacion, sin cu niun hende a ser atendi ariba esaki. En bista cu reunionnan ta ser televisa henter pueblo por wak kico ta pasa y ken ta haci kico. Ademas un medailla semper tin dos banda. Natural ta keda si e actitud di e parlamentario ta hopi ofensivo of extremo tin cu actua segun reglement van orde ta indica y hasta por bai over na saca miembronan di parlamento for di sala. Wyatt-Ras ta spera cu otro siman bai manera eficiente manera e siman aki y cu pronto nos por keda cla pa asina tur e departamentonan di gobierno y fundacionnan por haya nan financiamento pa nan por haci nan trabou/ofrese servicio den bienestar di nos comunidad.

Expresionnan haci den e articulo aki no necesariamente ta refleha opinion di ArenaPoliti.co