{idkey=7235b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4576-evelyn-wever-croes-mep-mep-a-vota-contra-presupuesto-2017%3FItemid%3D101][title=Evelyn+Wever-Croes+%28MEP%29%3A+MEP+a+vota+contra+presupuesto+2017][desc=E+NO+TA+REALISTICO+Y+NO+TIN+PRIORIDADNAN+CORECTO+%26amp%3Bnbsp%3B%26amp%3Bnbsp%3BORANJESTAD+--+Lider+di+MEP+Evelyn+Wever-Croes+a+splica+dicon+fraccion+di+MEP+a+vota+contra+e+presupuesto+2017.%26quot%3BE+presupuesto+no+ta+realistico%2C+pero+mas+serio+ta+cu+e+no+ta+refleha+e+prioridadnan+cu+pueblo+kier+mira.+E+ta+refleha+e+mesun+fiestamento+y+derochamento+di+placa+cu+den+ultimo+a%C3%B1anan%2C+sin+atende+cu+problemanan+urgente+manera+di+criminalidad%2C+problemanan+social%2C+problemanan+cu+cuido+di+salud%2C+y+un+punto+cu+pa+nos+ta+hopi+impor]}
E NO TA REALISTICO Y NO TIN PRIORIDADNAN CORECTO   

ORANJESTAD -- Lider di MEP Evelyn Wever-Croes a splica dicon fraccion di MEP a vota contra e presupuesto 2017.

"E presupuesto no ta realistico, pero mas serio ta cu e no ta refleha e prioridadnan cu pueblo kier mira. E ta refleha e mesun fiestamento y derochamento di placa cu den ultimo añanan, sin atende cu problemanan urgente manera di criminalidad, problemanan social, problemanan cu cuido di salud, y un punto cu pa nos ta hopi importante, tampoco e ta atende cu e problema di abuso sexual di muchanan", lider di MEP Evelyn Wever-Croes a duna di conose.

PRESUPUESTO NO TA REALISTICO
E presupuesto a haya consehonan negativo di tanto Raad van Advies como CAFT. Principalmente pasobra gobierno a tene cuenta cu un cresemento economico pa 2017 demasiado halto. CAFT y Raad van Advies a bisa gobierno ci e 6.1% cu gobierno a tene cuenta cun'e, ta demasiado halto. Banco Central a calcula e cresemento economico pa 2017 na 3.2%, pero asina mes gobierno a tene cuenta cu 5.3%, cual ta algo sumamente iresponsabel pa hasi.
Ademas, siman pasa gobierno a anuncia un cantidad di promesa cu ta baha belasting, lo hisa pensioen, lo hisa bijstand, etc, pero ningun di esakinan ta den e presupuesto 2017.
Esakinan ta e puntonan principal cu ta hasi e presupuesto aki irealistico. E bala awor ta den scochi di CAFT si ta duna e gobierno "green light" pa sigi cu e presupuesto irealistico, of si ta pone gobierno hasi cambionan. Si CAFT nenga e presupuesto, ta un berguensa grandi pa Gobierno y pa Parlamento, pero ami no ta preocupa pa esey pasobra nos di MEP a vota contra.

PRIORIDADNAN EQUIBOCA
Mi ta mas preocupa pa e hecho cu e presupuesto aki no ta mustra cu ta atende cu dolornan den nos comunidad. E prioridadnan ta equiboca.
Locual mi a haya falta di dje ta atencion pa e dolornan real den Pueblo. Hopi a sinta warda pa wak si sr. Eman lo a anuncia algo pa cu dolornan ey.
Por ehempel CRIMINALIDAD: tur hende a pensa, ya cu tin placa, cu gobierno lo a compromete e 10 miyon extra pa combati criminalidad. Pa duna Cuerpo Policial fondo pa combati criminalidad, pero NADA. Pa propaganda di gobierno si, pa Polis NO.
COSTO DI BIDA haltisimo, pueblo a kere cu gobierno lo duna alivio, baha e peso di belasting of controla prijs, pero NADA.
SALUBRIDAD den decadencia. Pueblo a kere cu gobierno lo a pone mas fondo pa esey, pa cumpra material pa operacion, pa traha mas shifts den hospital pa hendenan no mester warda lunas pa hasi testnan of pa mira dokter. Pero NADA.
CUIDO DI NOS GRANDINAN cu falta di fondo y fundacion SABA ta suplica pa no cambia e sistema di subsidio, sino nan mester manda algun di e grandinan cas. Nan a manda gobierno carta siman pasa, y pueblo a kere cu lo a haya oido di gobierno, pero NADA.
PROBLEMANAN SOCIAL Y DI HOBENNAN. Pueblo a kere cu lo gobierno a pone mas fondo disponible pa e fundacionnan y pa Reclassering cu ta traha cu nos hobennan, pero net contrario. Gobierno a aproba e cambio di subsidio cu ta bai afecta e fundacionnan y ta bai crea mas pobresa. Gobierno sa di e problema, pasobra nan a manda un carta pa gobierno siman pasa, pero NADA.

Esakinan ta e motibonan principal pa cual nos a vota contra e presupuesto, sinembargo nos lo sigi lucha si pa e cambionan bin. Si no ta den e gobierno aki, en todo caso, den gobierno nobo di cual MEP lo forma parti. MEP ta preparando pa e cambio. Uni bo mes na e #Cambio 2017", palabranan di Lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co