{idkey=6953b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4709-luigi-bergen-mep-avp-ta-bay-aumenta-schoolgeld-mas-ainda-mep-ta-boga-pa-ensenansa-liber%3FItemid%3D101][title=Luigi+Bergen+%28MEP%29%3A+AVP+ta+bay+Aumenta+Schoolgeld+Mas+Ainda%21+MEP+ta+Boga+Pa+Ense%C3%B1ansa+Liber%21%21][desc=Atrobe+Aumento+di+Schoolgeld%26amp%3Bnbsp%3BCu+hopi+duele+na+mi+curason%2C+mi+por+a+scucha+cu+schoolgeld+ta+bay+aumenta+atrobe.+E+aumento+aki+lo+ta+pa+a%C3%B1a+escolar+2017-2018.+Mescos+cu+na+2015%2C+e+anuncio+aki+no+ta+wordo+haci+pa+Mike+y+AVP+su+mes.+Loke+si+Mike+y+AVP+ta+haci%2C+ta+aumenta+schoolgeld%2C+den+silencio%2C+pa+tur+scol+publico+tambe.Peso+Financiero+Pa+Mayor%26amp%3Bnbsp%3BAwor+caba+nos+por+constata+cu+hopi+mayor+no+por+cumpli+cu+e+aumento+di+75+florin+pa+175+florin+pa+a%C3%B1a+pa+mucha.+Un+aumento+di+133%25+riba+cada+mu]}
Atrobe Aumento di Schoolgeld 
Cu hopi duele na mi curason, mi por a scucha cu schoolgeld ta bay aumenta atrobe. E aumento aki lo ta pa aña escolar 2017-2018. Mescos cu na 2015, e anuncio aki no ta wordo haci pa Mike y AVP su mes. Loke si Mike y AVP ta haci, ta aumenta schoolgeld, den silencio, pa tur scol publico tambe.

Peso Financiero Pa Mayor 
Awor caba nos por constata cu hopi mayor no por cumpli cu e aumento di 75 florin pa 175 florin pa aña pa mucha. Un aumento di 133% riba cada mucha. Un medida di Mike y AVP di 100 florin (!) riba cada yiu di un famia. Manera cu esaki no ta suficiente, awor Mike y AVP ta bay cobra mas pa bay scol.

Contradiccion y Realidad 
Den un carta recien dirigi na mayor, un cabesante di scol ta indica cu “…SKOA ta bisa mi cu no tin placa p’e actividad …”. Den un entrevista director di SKOA ta indica cu “… SKOA tin suficiente fondo …”. Aparentemente klas 1 so por haci actividad, pasobra mayor tabata obliga pa paga. Segun mi tin un contradiccion den e declaracionnan aki. En todo caso, ta un realidad cu hopi mayor tin dificultad pa paga 175 florin di schoolgeld. Imagina kico ta bay pasa awor cu mas medida di Mike y AVP na caminda pa aña escolar 2017 – 2018.

Refresca Memoria
E aumento di schoolgeld ta basa riba un debe di Mike y AVP na SKOA. SKOA kier a hisa e schoolgeld di 75 pa 250 florin (aumento di 233%) pa aña escolar 2015 – 2016 y laga mayor paga e debe di AVP. Ministro a intermedia y a acorda un aumento di 75 pa 350 florin (aumento di 367%) parti den dos aña escolar, 2015 – 2016 y 2016 - 2017. Awor cu e debe supuestamente ta paga pa AVP, mayor mester bay paga mas tambe.

Decision di Hues
Tin un decision di hues ta indica cu, cualkier cambio den e suma di schoolgeld, mester bay den consulta cu comision di mayor. Pues Ministro no por aumenta e schoolgeld den forma dictatorial. E mesun decision aki ta indica cu pago di aircogeld no ta obligatorio.

Mama Soltera
E mama soltera, banda tur otro grupo cu tambe ta sufri, ta esun cu ta sufri mas door di e medida di Mike y AVP. E grupo aki constantemente ta wordo ataca y lastima pa AVP. E mama soltera ta wordo culpa door di AVP pa e criminalidad cu tin na Aruba. AVP ta bisa cu e mama soltera no por cria su yiu. Cu e mama soltera no ta siña su yiu manera y ta laga su yiu su so, pa e por bay ‘happy hour’. E atake di AVP riba mama soltera ta fuera di lugar.

Enseñansa Liber
MEP ta boga pa enseñansa accesibel pa tur mucha, irespecto entrada di e mayor di e mucha. Elimina schoolgeld y aircogeld ta un prome stap, na caminda pa enseñansa liber. Esaki sigur lo trece alivio financiero pa hopi y sigur e mama soltera.

Expresionnan haci den e articulo aki no necesariamente ta refleha opinion di ArenaPoliti.co