{idkey=2825b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4810-evelyn-wever-croes-mep-ban-hasi-nos-hendenan-orguyoso-atrobe-di-nos-dushi-aruba%3FItemid%3D101][title=Evelyn+Wever-Croes+%28MEP%29%3A+Ban+hasi+nos+hendenan+orguyoso+atrobe+di+nos+dushi+Aruba%21][desc=+MENSAHE+DI+ANJA+NOBO+DI+LIDER+DI+MEP+EVELYN+WEVER-CROES+%26amp%3Bnbsp%3B+%26amp%3Bnbsp%3B%26amp%3Bnbsp%3BNos+ta+biba+riba+un+pais+cu+nos+ta+stima%2C+un+pais+den+cual+nos+ta+custuma+di+biba+den+paz+cu+otro.+Contrario+na+otro+paisnan+caminda+tin+guera%2C+Aruba+ta+un+dushi+lugar+pa+biba.Nos+ta+un+pueblo+orguyoso%2C+orguyoso+di+nos+historia%2C+di+nos+logronan%2C+di+nos+dushi+pais.Pesey+na+comienso+di+un+a%C3%B1a+nobo+ta+importante+pa+para+keto+y+reflecciona+riba+locual+ta+bayendo+bon%2C+y+locual+ta+bayendo+menos+bon%2C+pa+asina+fiha+nos+des]}

MENSAHE DI ANJA NOBO DI LIDER DI MEP EVELYN WEVER-CROES     

Nos ta biba riba un pais cu nos ta stima, un pais den cual nos ta custuma di biba den paz cu otro. Contrario na otro paisnan caminda tin guera, Aruba ta un dushi lugar pa biba.
Nos ta un pueblo orguyoso, orguyoso di nos historia, di nos logronan, di nos dushi pais.
Pesey na comienso di un aña nobo ta importante pa para keto y reflecciona riba locual ta bayendo bon, y locual ta bayendo menos bon, pa asina fiha nos deseonan y metanan pa e aña nobo. Ami kier reflecciona riba tres area.

GOBERNACION INTEGRO
Nos pais ta sumamente orguyoso di su gobierno, y su gobernantenan cu a logra metanan grandi pa nos pueblo. Nos no ta un pais cu ta custuma cu escandalonan ni corpucion. Ta un biaha so den pasado un gobernante a wordo condena pa corupcion den gobernacion, y pesey e desaroyo di ultimo temponan tin nos preocupa, caminda un escandalo tras di otro ta bin na lus di dia. Nos deseo pa 2017 ta pa nos tin un gobernacion integro, sin escandalo ni corupcion. Pa logra esaki nos mester bin cu algun cambio. Cambio pa garantisa e gobernacion integro, y cambio den Parlamento pa asina e Parlamento realmente controla su gobierno. Pueblo kier mira parlamentarionan cu voz y autoridad pa cuestiona su gobierno, y kier mira esnan cu mas votos drenta gobierno. Pa esaki mester cambia leynan. Nos ta compromete nos mes pa bringa pa e cambionan aki pa nos cuidadanonan por ta orguyoso atrobe di nan gobierno y nan parlamento.

PROTECCION Y BIENESTAR DI E SER HUMANO CENTRAL
Nos ta biba den un pais cu semper tabata sigur y dushi pa biba aden, sinembargo esey a cambia ultimo tempo. E proteccion y siguridad no tey mas. Tampoco e bon cuido di salud, of cuido di nos grandinan. Ultimo tempo e prioridad a wordo poni na hasi Aruba bunita, na inversion den klinker y asfalt. Ta momento awor pa nos cambia e prioridadnan y pone e ser humano central un biaha mas. Nos deseo pa 2017 ta pa proteccion y siguridad di e cuidadano tin prioridad mas halto. Cuminsando cu control estricto na nos fronteranan y despues pone orden paden den cas. Proteccion di nos muchanan contra abuso sexual mester haya mas atencion. Cuido di salud y cuido di nos grandinan mester conose un dimension nobo: hiba e cuido mas serca di e cuidadano, elimina e listanan di espera y percura pa ningun cuidadano mester cana un caminda di cruz pa haya cuido mas. Nos ta determina pa lucha pa e cambionan aki pa cada cuidadano por bira orguyoso bek di ta biba na Aruba

ECONOMIA BRIYANTE UN BIAHA MAS
Nos pueblo ta hopi orguyoso di e desaroyo economico cu nos pais a conose desde cu nos a bira pais na 1986, y di gobiernonan cu a logra maneha e pais aki, manteniendo e debe nacional dentro di standardnan internacionalmente acceptable. Sinembargo den ultimo 7 añanan e debe nacional a redobla, y esey a pone cu nos economia a stagna. E turista no ta gastando mes hopi mas cu antes. E consequencia ta e tantisimo medidanan cu gobierno a introdusi, y centenares di mama y tatanan di famia cu a perde trabou; tambe pobresa a conose limitenan nunca antes visto.
Nos deseo pa 2017 pa desaroya nos economia, crea cupo di trabou, pa asina combati pobresa y baha nos debe nacional. Baha e edad di pensioen, pa crea mas cupo di trabou pa nos hobennan, y elimina e peso di belasting pa nos grandinan. Ta asina nos por hasi e Arubiano orguyoso atrobe di nos pais.

Cada comienso nobo ta trese speransa y oportunidadnan nobo, y ta na cada un di nos pa hasi bon uso di e oportunidadnan aki, y realisa e cambionan cu nos ta propone. Aña 2017 ta brinda e oportunidad pa e cambio aki. No warda pa otronan trese e cambionan pa bo, ta nos mes mester ta e cambio. Cu 2017 trese hopi bendicion pa abo y bo famia, pas harmonia felicidad, y pa Aruba e cambio tan anhela.

Expresionnan haci den e articulo aki no necesariamente ta refleha opinion di ArenaPoliti.co