{idkey=2839b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4814-evelyn-wever-croes-mep-aruba-mester-hasi-mas-pa-combati-y-trata-cancer%3FItemid%3D101][title=Evelyn+Wever-Croes+%28MEP%29%3A+Aruba+mester+hasi+mas+pa+combati+y+trata+cancer][desc=STA.CRUZ+%E2%80%93+Lider+di+MEP%2C+Evelyn+Wever-Croes%2C+mas+di+un+biaha+den+pasado+a+expresa+su+preocupacion+pa+cu+e+indice+di+e+malesa+cancer+na+Aruba.%E2%80%9CCancer+ta+un+malesa+cu+ta+toca+tur+famia%2C+y+e+ta+un+malesa+hopi+cruel.+Den+ultimo+dos+anja+mi+a+perde+tres+persona+hopi+serca+den+mi+famia+na+e+malesa+aki%2C+di+edad+relativamente+hoben.+Mi+tin+e+impresion+cu+awendia+tin+mas+hende+ta+sufri+di+cancer+y+na+edad+mas+hoben.+Mi+ta+desea+pa+aki+na+Aruba+nos+hasi+un+studio+na+indice+di+cancer%2C+y+compara+esaki+c]}
STA.CRUZ – Lider di MEP, Evelyn Wever-Croes, mas di un biaha den pasado a expresa su preocupacion pa cu e indice di e malesa cancer na Aruba.

“Cancer ta un malesa cu ta toca tur famia, y e ta un malesa hopi cruel. Den ultimo dos anja mi a perde tres persona hopi serca den mi famia na e malesa aki, di edad relativamente hoben. Mi tin e impresion cu awendia tin mas hende ta sufri di cancer y na edad mas hoben. Mi ta desea pa aki na Aruba nos hasi un studio na indice di cancer, y compara esaki cu paisnan den regio.
Mas aun, mi ta desea pa nos hasi estudio DICON tanto hende na Aruba ta sufri di cancer. Una bes cu nos conose a causa cu tanto hende na Aruba ta sufri di cancer, nos por enfoca mas directo riba preveni cancer. Nos sa cu factornan genetico ta hunga un papel importante, y tambe e ‘life style’ cu nos ta hibando. Pesey ta asina importante pa tin bon investigacion riba e situacion na Aruba mes, pasobra ta a base di e informacion ey, nos por bin cu strategianan pa maneha e problema.
Mi deseo di mas grandi ta pa na Aruba mes nos tin un centro oncologico, y mi ta contento cu IMSAN na San Nicolas lo wordo desaroya den e centro oncologico aki, y cu ta hayando aparatonan moderno pa combati e malesa efectivamente. E proyecto lo tarda poco tempo ainda pa drenta den ehecucion, pero nos tin speransa cu tur cos lo cana segun plan, y cu pronto nos tin e centro oncologico, manera tabata planea pa hopi anja caba.

Pero nos no mester lag’e te eynan. Na Aruba tambe nos mester cuminsa pensa riba tratamento alternativo, banda di e tratamentonan convencional di quimo y radiacion. Of un combinacion di ambos. Uso legal di azeta di cannabis bou control di dokternan tambe mester por wordo considera, apesar cu no tin hopi prueba cientifico cu e azeta di cannabis ta cura cancer, pero por lo menos e por duna e pacient un mihor calidad di bida, y en todo caso pa combati e dolornan cu e malesa cruel aki ta trese cun’e. Pero e forma mas eficas ta PREVENCION: ehercicio, movecion, come saludable, biba saludable ta e yabi pa prevencion.

Nos pacientnan di cancer merese e alternativanan aki, y den nos programa di campaña 2017 nos tin inclui pa desaroya IMSAN na San Nicolas den un centro oncologico, tanto pa tratamento convencional, manera quimo y radiacion, como pa tratamento alternativo manera ta conosi den otro paisnan. Di e forma aki nos kier desaroya San Nicolas pa atrae turismo medico, y asina amplia nos pilarnan economico y trese desaroyo real pa San Nicolas.

Cu bo sosten nos por logra nos meta, y den un gobernacion nobo na oktober 2017, nos por cuminsa traha riba e desaroyo di centro oncologico convencional y alternativo den San Nicolas”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co