{idkey=6685b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F486-evelyn-wever-croes-cobramento-di-health-tax-ta-un-caos-nos-a-avisa-gobierno%3FItemid%3D101][title=Evelyn+Wever-Croes+Cobramento+di+HEALTH+TAX+ta+un+caos%2C+nos+a+avisa+gobierno%21][desc=%E2%80%9CTa+duel+mi+di+mira+e+caso+cu+tin+rondo+di+e+cobranza+di+health+tax%2C+pero+loke+ta+duel+mi+mas+ta+cu+nos+a+avisa+gobierno+cu+e+caso+aki+lo+causa+hopi+dolor.+Locual+ta+masha+inhusto+den+tur+esaki+ta+cu+e+cuidadano+ta+wordo+perhudica+pasobra+e+gobierno+aki+ta+sigi+cu+su+maneho+con+cu+ta%E2%80%9D%2C+asina+lider+di+MEP+a+duna+di+conoce.E+ley+di+health+tax+of+BAZV+a+wordo+aproba+den+Parlamento+den+november+2014%2C+apenas+algun+dia+prome+cu+su+introduccion+dia+1+di+december+2014.+Durante+e+debate+fraccion+di+M]}“Ta duel mi di mira e caso cu tin rondo di e cobranza di health tax, pero loke ta duel mi mas ta cu nos a avisa gobierno cu e caso aki lo causa hopi dolor. Locual ta masha inhusto den tur esaki ta cu e cuidadano ta wordo perhudica pasobra e gobierno aki ta sigi cu su maneho con cu ta”, asina lider di MEP a duna di conoce.

E ley di health tax of BAZV a wordo aproba den Parlamento den november 2014, apenas algun dia prome cu su introduccion dia 1 di december 2014. Durante e debate fraccion di MEP den Parlamento tabata hopi critico y a avisa gobierno cu e forma con cu ta aki di goberna no ta bai resulta. Minister Schwengle tabata masha arogante y a bari tur esaki for di mesa, y a bruha cos un poco mas. Minister Bermudez claramente no por a contesta tur pregunta, y awor nos tur por mira e confusion grandi cu tin.

Mas tristo ta cu e presidente di parlamento Marisol Lopez-Tromp y e fraccion di AVP dia di e debate a scohe pa hunga politica barata, nengando derecho constitucional di parlamentarionan di MEP, djis pa bulldoze e ley aki.

“Nos a avisa nan, nos a taha nan, pero nan no kier a scucha. Nan a scohe pa hunga politica sushi, di lastra hende drechi cu no ta den Parlamento pa defende nan mes, di insulta y di keda pega den pasado, en bes di atende cu e problema real: e medida di aumento di BBO. Tur confusion cu tin awor por a wordo evita si e parlamentarionan di fraccion di AVP y presidente di parlamento a hasi nan trabou di controla gobierno manera constitucion ta prescribi.  Ta tristo ora bo mira hende grandi, algun di nan hasta profesional, ta actua na un forma asina y en bes di pone interes di pueblo prome, a scohe pa interes di nan lider Mike Eman”, Evelyn Wever-Croes a bisa.

Pasobra minister Bermudez avisa bon cla cu e no ta na fabor di e health tax, y si e tabata tin mas tempo lo el’a djis aumenta e BBO. Lo awor bo no tin tur e confusion cu a costa pueblo hopi mas placa. Pero ta Mike Eman ta esun terco y cu no kier tene di hisa e BBO, y a exigi pa bin cu e medida nobo aki, causando tanto dolor den pueblo.

“Nos ta spera cu pronto bin claridad, y cu departamento di Impuesto por hasi ‘instructie controles’ na e negoshinan pa splica nan con mester administra e belasting aki. Esey nan mester hasi awor, pa asina segura cu tur hende ta aplica e ley manera mester ta. Y especialmente pa asina evita di cobra e cuidadano demasiado belasting. Aruba merece mihor, Aruba merece un sistema di belasting hopi mas simple y husto, y esey nos di MEP lo traha riba dje: un sistema sensiyo y husto”, Evelyn Wever-Creos a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co