{idkey=3939b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5032-otmar-oduber-por-contento-di-mira-cu-proximamente-ta-inaugura-plaza-padu%3FItemid%3D101][title=Otmar+Oduber+%28POR%29%3A+Contento+di+mira+cu+proximamente+ta+inaugura+Plaza+Padu][desc=Dedica+na+e+tres+compositornan+di+nos+himno+Aruba+Dushi+Tera+%26amp%3Bnbsp%3B+%26amp%3Bnbsp%3BEx+Minister+di+Cultura%2C+Otmar+Oduber+ta+contento+cu+proximamente+lo+inaugura+Plaza+Padu+cu+ta+dedica+na+e+tres+compositornan+di+nos+himno+Aruba+Dushi+Tera.E+ex+Minister+a+bisa+cu+e+construccion+di+e+plaza+tabata+un+trayecto+hopi+largo%2C+un+proyecto+colectivo+unda+cu+Ministerio+di+Cultura+y+otro+ministerionan+y+departamentonan%2C+como+tambe+sector+priva+a+contribui+na+esaki.+Un+suma+di+algo+mas+cu+1.8+miyon+Florin+a+keda+inver]}
Dedica na e tres compositornan di nos himno Aruba Dushi Tera    

Ex Minister di Cultura, Otmar Oduber ta contento cu proximamente lo inaugura Plaza Padu cu ta dedica na e tres compositornan di nos himno Aruba Dushi Tera.

E ex Minister a bisa cu e construccion di e plaza tabata un trayecto hopi largo, un proyecto colectivo unda cu Ministerio di Cultura y otro ministerionan y departamentonan, como tambe sector priva a contribui na esaki. Un suma di algo mas cu 1.8 miyon Florin a keda inverti den e monumento historico aki y a wordo financia 100% atravez di e presupuestonan  di partnernan den sector priva, esta Aruba Tourism Authority (ATA), TPEF y Mondriaan Fonds. 

Intencion tabata pa e plaza keda cla pa fin di september aña pasa, pero en todo caso, dentro di poco e plaza aki cu ta honra e tres personahenan grandi cu a compone nos Aruba Dushi Tera lo keda inaugura pa tanto local como turista por disfruta di un monumento unico cu ta engrandece mas ainda nos historia cultural. 

E artista cu a realiza e obra di brons di e tres baluartenan ta nos artista renombra Ciro Abath. E ta un trabou masha grandi cu sr. Abath a haci unda cu el a pone su vision artistico tambe aden, pa asina duna e obra un elemento artistico y historico. 

Oduber ta bisa cu Plaza Padu ta uno importante pa nos localnan, pero tambe pa nos turistanan unda cu e bishitantenan lo por disfruta di un bunita infrastructura y lo crea e esfera pa por socializa mas cu nos localnan. Naturalmente no por laga afo e aspecto di brinda e oportunidad pa comparti e parti di nos historia y cultura cu por wordo aprecia no solamente cu e monumento na Padu Lampe, Rufo Wever y Hubert Lio Booi, pero tambe cu e diferente monumentonan cu a wordo renova rond di e plaza y e parte artistico den Cosecha. 

Finalizando Otmar Oduber ta pidi tur ciudadano pa aprecia y cuida no solamente Plaza Padu, pero tambe e otro plazanan, e monumentonan y e edificionan historico tur rond di nos isla, pasobra nan ta representa e parti visual di nos herencia, di nos cultura y di nos historia. 

Expresionnan haci den e articulo aki no necesariamente ta refleha opinion di ArenaPoliti.co