{idkey=9296b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5050-prome-minister-eman-a-keda-demostra-cu-riesgonan-tuma-pa-inverti-den-agricultura-no-tabata-en-vano%3FItemid%3D101][title=Prome+Minister+Eman%3A+A+keda+demostra+cu+riesgonan+tuma+pa+inverti+den+Agricultura+no+tabata+en+vano][desc=ORANJESTAD+%E2%80%93+Riba+diasabra+Prome+Minister+Mike+Eman%2C+encarga+cu+Sector+Primario%2C+a+haci+un+recorido+na+diferente+tipo+di+Cunucu.+A+cuminsa+na+e+Vi%C3%B1ero+di+Luis+Mechatti%2C+cu+ta+produci+1500+botter+di+bi%C3%B1a+mas+o+menos+cu+cada+cosecha%2C+y+a+sigui+cu+bishita+na+un+cunucu+na+Soledad+unda+ta+produci+Cilantro.+Tambe+a+pasa+na+un+laboratorio+di+produccion+di+mushroom%2C+e+hofi+di+Nelson+Sprok%2C+Cunucu+di+Jimmy%2C+Cunucu+%26%23039%3BAruba+Dushi+Tera%26%23039%3B+di+David+Kock%2C+pero+tambe+Cunucu+di+Henny%2C+su+ruman+mayor+sr.+Eman+y]}
ORANJESTAD – Riba diasabra Prome Minister Mike Eman, encarga cu Sector Primario, a haci un recorido na diferente tipo di Cunucu. A cuminsa na e Viñero di Luis Mechatti, cu ta produci 1500 botter di biña mas o menos cu cada cosecha, y a sigui cu bishita na un cunucu na Soledad unda ta produci Cilantro. Tambe a pasa na un laboratorio di produccion di mushroom, e hofi di Nelson Sprok, Cunucu di Jimmy, Cunucu 'Aruba Dushi Tera' di David Kock, pero tambe Cunucu di Henny, su ruman mayor sr. Eman y ex-Prome Minister di Aruba.

“Mi a keda hopi entusiasma y anima di mira e diferente iniciativanan cu tin na Aruba den un area cu no automaticamente lo haci inversion den dje riba un isla seco manera Aruba,” Eman a bisa na final di e recorido. Principalmente, el a bisa, pasobra hopi ta pensa cu e lo no ta un exito economicamente. Esaki ta un motibo adicional pa mustra aprecio pa e diferente iniciativanan cu ta wordo tuma riba e tereno aki, tumando riesgo, pa planta na Aruba, Eman a expresa.

Di tur e sitionan cu a wordo bishita, por a scucha for di e propio iniciadornan cu e riesgo cu nan a tuma no tabata en vano. Nan tin un negoshi cu ta produci placa pa nan, di cual un di nan ta e laboratorio den cual ta cultiva mushroom. Nan ta importa e compost cu wordo cultiva den un laboratorio scur cu airco y despues di 4 siman, e mushroomnan ta cla pa wordo manda supermercado. E grupo aki tin 80% di e mercado di mushroom cubri. Den caso di cunucu Pachamama, e cultivo primario ta cilantro y ta e entrada di doño Aristabal pa e sostene su famia.

Prome Minister Eman den e recorido a wordo compaña pa directora di Santa Rosa sra. Natalie Maduro. “Canando hunto cu e hendenan di Santa Rosa nos ta tende tambe e necesidad di e cunukeronan. Nos ta scucha cual ta nan retonan di mas grandi. Despues di e secura di basta aña toch tin un entusiasmo renoba pa motibo di e yobida cu a percura cu e damnan ta yen. Nos ta preparando Santa Rosa pa entrega awa na e cunukeronan y percura asina cu nan keda, despues di e periodo di awacero, cu e awa necesario pa sigui planta.”

E bishita di diasabra a finalisa na Cunucu di Henny, kende despues di su periodonan como Prome Minister a dedica su mes na cultivo di boonchi y pinda, kende tambe a pasa den duro den e temporada di secura ora cu no por a planta.  

Pa finalisa e mandatario a resumi e recorido bisando “nos kier encurasha nos hendenan pa sigui planta. Mescos cu nos kier yega na 100% di nos coriente produci di naturalesa, nos kier produci nos propio cuminda tambe. Awe sigur nos a haya un evidencia cu prueba cu esaki ta posibel.”

Expresionnan haci den e articulo aki no necesariamente ta refleha opinion di ArenaPoliti.co