{idkey=7504b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F511-evelyn-wever-croes-criminalidad-entre-hoben-ta-hopi-mas-grandi-cu-nos-mes-ta-kere%3FItemid%3D101][title=Evelyn+Wever-Croes%3A+Criminalidad+entre+hoben+ta+hopi+mas+grandi+cu+nos+mes+ta+kere][desc=Y+gobierno+no+ta+hasiendo+suficiente+pa+yuda+nos+hobennan+y+nan+famiaLider+di+MEP+den+parlamento+durante+debate+cu+minister+Dowers+a+enfoca+hopi+riba+hobennan+problematico+y+cu+ta+cai+den+e+circuito+di+criminalidad.+Mas+y+mas+hoben+di+edad+jong+ta+drenta+gang%2C+ta+involucra+den+violencia+of+ta+comete+atraco.+Locual+a+hala+hopi+atenci%C3%B3n+tabata+na+momento+cu+Lider+di+MEP+a+bisa+cu+ya+no+por+manda+hobennan+problem%C3%A1tico+Corsou+mas%2C+pasobra+Aruba+no+ta+paga+su+cuentanan+eynan%2C+y+ya+a+cuminsa+manda+c]}
Y gobierno no ta hasiendo suficiente pa yuda nos hobennan y nan famia
Lider di MEP den parlamento durante debate cu minister Dowers a enfoca hopi riba hobennan problematico y cu ta cai den e circuito di criminalidad. Mas y mas hoben di edad jong ta drenta gang, ta involucra den violencia of ta comete atraco. Locual a hala hopi atención tabata na momento cu Lider di MEP a bisa cu ya no por manda hobennan problemático Corsou mas, pasobra Aruba no ta paga su cuentanan eynan, y ya a cuminsa manda cliente Aruba bek. E minister no kier a contesta e pregunta con grandi e debe ta y con lo soluciona esaki. Evelyn Wever-Croes a hasi hopi pregunta con ta para cu tres di e instancianan cu ta encarga cu cuido di nos hobennan.

Voogdijraad: ta un departamento cu falta masha hopi personal, y awor ta kitando mas trahador social; si awor caba nan no tin suficiente hende pa hasi e trabou, dicon ta kita mas? Tin centenares di caso pendiente, algun desde 2012, pero e minister no kier a duna e parlamentario cifras exacto di cuanto caso tin pendiente, y con esaki ta influencia bienestar di nos hobennan.

Fundacion Guiami: tin apenas dos persona ta traha, y no por cu tur e trabou, y sin un aprobacion di e fundacion aki no por brinda ayudo na hobennan ni nan famia. Cuanto caso tin pendiente e minister no kier a divulga, ni tampoco con e lo soluciona e problema aki.

Orthopedagogisch Centrum (OC): e cas aki den cual ta ubica e hobennan, ta completamente yen y tin lista di espera largo. Cuanto hende ta riba e lista di espera, e minister no kier a bisa, ni tampoco con e ta bai soluciona e problema aki. Unico cos cu e minister a bisa ta cu mundialmente e OC-nan ta bahando cantidad di cama, pero esey ta OC-nan cu semper tabata tin suficiente lugar, y no manera e caso na Aruba.

“Nos tur conose e problema di criminalidad bou di nos hobennan si nos no actua, nan ta drenta circuito di criminal. Tin listanan di espera hopi largo na cada un di e instancianan ey, y ami kier wak accion wordo tuma mesora. Lamentablemente e minister mes no a mustra interes. P’e esaki no tin prioridad, y mi ta lamenta esey. Mi a segura e minister cu e por conta riba nos sosten pa kita placa di otro caminda y ubike den su ministerio, pa e por yuda e hobennan aki. Nos a hasie caba na juni 2012 caminda nos a saca 8.9 miyon for di otro gasto di gobierno, y ubike den ministerio di husticia pa yuda e minister combati criminalidad, pero e fraccion di AVP a vota contra! Nos kier mira un solucion, pasobra e realidad na Aruba ta doloroso.

Fraccion di MEP ta reuniendo cu varios instancia den nos comunidad pa scucha nan experiencianan, y especialmente pa scucha con por yuda nan. E tipo di reunionnan aki ta sumamente fructifero pa nos prepara pa tipo di reunionnan asina, y tambe pa tratamento di presupuesto. Nos ta wordo critica door di cierto parlamentarionan cu nos no tey pa reunionnan interno, pero nos ta duna prioridad na conoce e dolornan real den nos comunidad. Aruba merece mihor, nos hobennan merece mihor, y pesey nos kier pa prioridad wordo duna na nan”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co