{idkey=1262b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5186-prome-minister-eman-islanan-miembro-di-octa-por-duna-nan-relacion-cu-union-europeo-mas-balor%3FItemid%3D101][title=Prome+Minister+Eman%3A+Islanan+miembro+di+OCTA+por+duna+nan+relacion+cu+Union+Europeo+mas+balor][desc=Prome+Minister+Eman+den+discurso+di+OCTA+%26amp%3Bnbsp%3B+%26amp%3Bnbsp%3BORANJESTAD+%E2%80%93+Prome+Minister+Eman+na+apertura+di+e+conferencia+di+%26%23039%3BAssociation+of+Overseas+Countries+and+Territories%26%23039%3B+di+Union+Europeo+%28UE%29%2C+OCTA%2C+aki+na+Aruba%2C+a+papia+di+e+relacion+entre+paisnan+cu+tabata+colonianan+di+paisnan+Europeo+mester+sigui+pa+fortifica+otro.+Den+su+discurso+e+mandatario+a+mustra+riba+e+importancia+di+continuidad+di+e+relacionnan+aki+pa+ambos+banda.+%E2%80%9CNo+den+contexto+di+e+acuerdo+cu+tin+entre+OCTA+y+UE+pa+loke+ta+p]}
Prome Minister Eman den discurso di OCTA    

ORANJESTAD – Prome Minister Eman na apertura di e conferencia di 'Association of Overseas Countries and Territories' di Union Europeo (UE), OCTA, aki na Aruba, a papia di e relacion entre paisnan cu tabata colonianan di paisnan Europeo mester sigui pa fortifica otro. Den su discurso e mandatario a mustra riba e importancia di continuidad di e relacionnan aki pa ambos banda.

“No den contexto di e acuerdo cu tin entre OCTA y UE pa loke ta presupuesto pa desaroyo di nos region y islanan. Continuidad di e relacion ta importante.” E mandatario a bay un poco atras den tempo y historia, mencionando e base di e relacion cu tin awendia entre estadonan miembro y UE. Por ehempel mayoria di e miembronan di OCTA tabata colonia di un miembro di UE y cu transcurso di aña a desaroya den un relacion cu “nos mesun miembro estado”. El a splica cu tin isla a haya nan independencia, kendenan no ta presente den e conferencia y otronan a opta pa  tin un status autonomo of ta miembro estado di UE, basa riba un escogencia propio di e pueblo. “Nos tur tabatin e chens pa bira totalmente independiente di nos madre patria. Nos a scoge pa mantene un tipo di relacion cu Estadonan miembro, den e caso aki Hulanda,” Prome Minister Eman a splica.

Eman a papia di e relacion cu a crea cu Hulanda, e concepto di traha riba cosnan mas grandi, unda cierto temanan so a keda como un asunto di Reino. Ta logico cu pa un isla chikito e gastonan di su propio defensa lo ta inmenso. Pesey sea ta traha cu un cantidad di pais, of ta yega na un areglo cu ex madre patria pa regla nan defensa. Esey ta loke Aruba a haci. “Bibando den un region cu awendia ta hopi turbulento, nos ta hopi contento di por a yega na e areglo ey. Specialmente mirando e discusionnan continuo riba e fronteranan di paisnan. E unico forma cu e paisnan tin pa defende nan mes, ta acudiendo na Nacionnan Uni, sperando hopi aña riba resolucionnan pa mira cual pais tin razon y cual ta robez. Den nos caso, si un pais traspasa nos frontero, lo tin un conflicto y Nacionnan Uni lo para nos tras.” Asina tin varios otro motibo cu a scoge pa sigui cu cierto lazo cu Hulanda, manera e Embahadanan di Reino rond di mundo cu por yuda Aruba sin cu ta paga pa esaki.

E ehempelnan di e beneficionan di e relacion cu a keda mantene cu Reino Hulandes, apesar di e conflictonan interno cu por tin, ta cu ta invirti den cosnan bon por evita conflictonan. Esey tabata tema di e discurso, esta e cosnan bon. “Hopi biaha nos ta mira e cosnan bon como loke ta bini den e envelop. Europa ta papia hopi di nos potencialnan pa e Union pero ta haci poco of nada riba e tema aki. Tur nos discusionnan awor ta bay riba e placa,” e mandatario a trece dilanti.  

Prome Minister a bisa cu si e unico motibo pa mantene un relacion entre OCT y UE ta riba placa, e miembronan nobo di UE cu no tabata colonia, lo no mira e motibo pakico di relacion cu e islanan OCT. Na di dos luga, den e Estadonan Miembro mes tin un generacion multicultural cu a bini di otro caminda cu no ta identifica nan mes cu e historia di colonisacion. Nan no tin e sentimento moral pa bay den un relacion cu miembronan OCT.

Pesey ta momento pa cambia e concepto cu tin awor. Mester evita cu ciudadanonan di e paisnan miembro di UE yega na e conclusion cu nan no ta interesa den un relacion cu OCT cu no ta beneficia nan pais. Ta confrontando cu e aceptacion pa e actual concepto ta birando menos localmente, pasobra bataya pa ayudo, discusion riba autoridad di cada banda, ta friccionnan cu ta causa hopi debate. Esey tabata domina e relacion y no laga e paisnan por haci hunto. “Si nos friccionnan sigui defini e relacionnan, hopi lihe lo no tin fundeshi pa un relacion. Si tin balor pa e relacion, mester cambia e motibo di e relacion di awendia,” e mandatario a splica. Esaki mester ta e pensamento di e relacion di miembronan di OCT pa cu UE.

Ora ta papia di relacion adicional, a menciona por ehempel establecimento di tecnologia nobo, un economia nobo cu ta exporta conocemento, cu ta interesante pa paisnan di Europa. Asina el a duna ehempel di companianan nobo estableci na Aruba, dunando un balor agrega pa e paisnan Europeo. Algun ta TNO, KLM, ArboUnie, Philips, Schiphol Group, Port Amsterdam, pero tambe relacion cu ciudadnan ruman. Esaki ta ehempel cu e relacion entre Aruba y Hulanda no ta basa riba placa cu mester pero uno di beneficio pa ambos banda. 

Expresionnan haci den e articulo aki no necesariamente ta refleha opinion di ArenaPoliti.co