{idkey=4320b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5366-booshi-wever-upp-dicon-conseho-consultativo-rva-a-haci-entrega-di-jaarverslag-2017-na-gobernador-cu-tanto-publicidad%3FItemid%3D101][title=Booshi+Wever+%28UPP%29%3A+Dicon+conseho+consultativo+%28RvA%29+a+haci+entrega+di+jaarverslag+2016+na+gobernador+cu+tanto+publicidad][desc=+UPP+a+tuma+nota+di+un+relato+cu+a+sali+publica+ayera+den+NoticiaCla+cu+ta+carga+como+titulo%3A+RvA+critico+riba+efectividad+supervision+financiero+y+areglo+conflicto+pa+paisnan+den+Reino.+E+relato+ta+haci+mencion+cu+e+jaarverslag+a+wordo+entrega+na+nos+gobernador+sr.+Boekhoudt.%26amp%3Bnbsp%3BPregunta+ta+pakico+e+Conseho+a+tuma+e+desicion+pa+haci+entrega+di+e+jaarverslag+na+nos+gobernador+cu+tanto+publicidad%2C+loke+normalmente+no+ta+ser+haci%3F%26amp%3Bnbsp%3BLoke+tambe+a+yama+nos+atencion+ta+hecho+cu+den+nan+relato]}

UPP a tuma nota di un relato cu a sali publica ayera den NoticiaCla cu ta carga como titulo: RvA critico riba efectividad supervision financiero y areglo conflicto pa paisnan den Reino. E relato ta haci mencion cu e jaarverslag a wordo entrega na nos gobernador sr. Boekhoudt. 
Pregunta ta pakico e Conseho a tuma e desicion pa haci entrega di e jaarverslag na nos gobernador cu tanto publicidad, loke normalmente no ta ser haci? 
Loke tambe a yama nos atencion ta hecho cu den nan relato e Conseho ta mustra riba diferente topiconan cu segun nan ta rekeri mas seriedad y sentido di responsabilidad di parti di parlemento y gobierno. 
E Conseho a mustra entre otro riba e falta di reflexion y maneho pa proteha e flora y fauna na unda nos simbolo nacional di nos pais e choco ta biba. E Conseho ta señala cu mester bin leynan cu lo mester reglamenta y controla proteccion di nos medio-ambiente y naturalesa. 
Mas explicito, sinembargo, nan critica tabata riba e forma con nos finanzas publico ta wordo maneha y principalmente e falta di efectividad pa locual ta trata e supervision financiero cu ta ser haci dor di Caft. NoticiaCla ta menciona con e Conseho ta constata cu: e normanan di e Ordenansa estatal di supervision financiero temporal Aruba (Landsverordening Aruba tijdelijk financieel toezicht) no ta efectivo y cu ta haci masha poco pa un finanzas publico duradero y sostenibel. 
Mas claro no canta un gallo. No tin supervision financiero efectivo door di CAft.
Y esaki ta trece nos back na e pregunta dicon e jaarverslag a wordo entrega na gobernador cu tanto publicidad? Por ta cu di e forma aki e Conseho kier a expresa nan disgusto y preocupacion con  Hulanda y Aruba ta manehando nos finanzas publico?
Cu entrega na gobernador cu hopi publicidad e Conseho lo kier a dal “twee vliegen in één klap, pasobra e gobernador tin dos petchi bisti. Esta esun como representante di Corona y otro tambe como hefe di estado di Aruba. Pues di e forma aki nan ta sigur cu nan raportahe ta yega na Hulanda tambe y ta kier mustra cu tanto gobierno Hulandes como e gobierno Arubano ta culpabel y responsabel pa e debacle huridico y financiero actual. E ultimo aki camufla pa parlamentarionan cu ta purba tapa solo cu un dede, dor di gaba cu Caft ta elogia e situacion financiero di Aruba.

Un otro splicacion ta cu e Conseho, fada di e forma con gobierno y parlemento ta keda constantemente ignora nan funcion y posicion den nos Estado di Derecho, a disidi di "make sure" cu e raport aki no ta wordo scondi.
Obviamente otro punto ta cu e gobernador, mirando con su persona tambe ta wordo ignora door di e gobierno, a tuma e postura di pone “de puntjes op de i” y obliga asina e gobierno di formalmente tene cuenta cu e ta e hefe di Estado y cu mester respeta su posicion.

Whatever lo por ta e splicacion UPP ta constata cu tin un falta di liderazgo y maneho adecuado di nos pais, loke por tin como consecuencia cu nos lo sigui cay den e abismo financiero y economico sin tin speransa pa un salida efectivo y e pueblo  lo sali e gran perdedor.
Aki un biaha mas UPP kier mustra cu introduccion di reglanan estricto di Good Governance no solamente ta nos unico salida pa trece ordo back den nos finanzas publico pero tambe pa recobra nos autonomia cu nos a logra desde nos Status Aparte.

Partido UPP
Booshi Wever
30 di maart 2017

Expresionnan haci den e articulo aki no necesariamente ta refleha opinion di ArenaPoliti.co