{idkey=6545b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5474-rudy-richardson-mep-maneho-financiero-economico-versus-ideologia-politico%3FItemid%3D101][title=Rudy+Richardson+%28MEP%29%3A+Maneho+financiero+economico+versus+ideologia+politico][desc=Aruba+a+bin+ta+desaroya+su+mes+continuamente+den+varios+siglo%2C+ubica+net+central+entre+Noord+y+Sur+America+den+e+lama+Caribe%C3%B1o.+Un+pueblo+y+cultura+mescla+mescos+cu+tur+otro+pais+den+e+hemisferio+aki.+Logicamente+semper+un+grupito+kier+domina+e+panorama+economico%2Fpolitico+y+pesey+tambe+nos+lider+inmortal+Betico+Croes+a+expresa%3A+%26quot%3BNos+a+scoge+pa+Evolucion+y+no+Revolucion.%26quot%3B+E+isla+a+wordo+balota+pa+Europeano+y+tambe+pa+esnan+contemporaneo+den+structuranan+politico+di+pasado.+Asina+mes+Aruba+a+sa+d]}
Aruba a bin ta desaroya su mes continuamente den varios siglo, ubica net central entre Noord y Sur America den e lama Caribeño. Un pueblo y cultura mescla mescos cu tur otro pais den e hemisferio aki. Logicamente semper un grupito kier domina e panorama economico/politico y pesey tambe nos lider inmortal Betico Croes a expresa: "Nos a scoge pa Evolucion y no Revolucion." E isla a wordo balota pa Europeano y tambe pa esnan contemporaneo den structuranan politico di pasado. Asina mes Aruba a sa di duna un bida digno awe na mas di 100.000 alma. Tin varios maneho atraves di aña di diferente lidernan politico cu nan partido politico. Atraves di añanan forsanan ideologico versus forsanan economico a lanta cabes.

Diferencia MEP y AVP 
Den comienso di siglo 20 Aruba tawata un isla primitivo cu migracion primordialmente di Corsou, e capital colonial di Hulanda y paisnan den region. Desde establecimento di Refineria Lago, Aruba su pueblo a cambia drasticamente unda cu awe den siglo 21 a bira un pais desaroya den Caribe. Desde 1986 Aruba a bira un pais Autonomo den Reino Hulandes. Dos partido a domina nos panorama politico y algun biaha tawata tin coalicion di partidonan politico. AVP, un partido Cristian democrata tawata na mando di 1986-1989, MEP, Social democrata 1989-1994,  AVP 1994-2001, MEP 2001-2009 y AVP 2009-2017. Ora nos wak e maneho di e partidonan aki nos ta wak un diferencia masha grandi den maneho economico combina cu ideología. Si nos analisa 2001 te cu 2017, ta hopi bisto con AVP ta goberna atraves di un politica Neoliberal, ta privatisa servicionan di Gobierno y no ta traha riba nos Autonomia como pais semi-independiente.

Neoliberalismo y Privatisacion 
Ora AVP goberna ta fiesta cu fondonan publico: "Pegado di bandera" ta bira Director di companianan di Gobierno, interes special ta domina riba interes general. Algun ehempel: promesa di elimina BBO cu awo ta mas halto cu na 2007. Aumento di Serlimar pa recoge sushi ta mas halto cu locual a wordo propone bao gobierno di MEP, aumento di Schoolgeld y tuition/boekenfonds compara cu ora partido MEP ta na mando. Rosamento y partimento di tereno pa complace sponsornan di partido. Abusonan den companianan estatal, hasta a saca 17 Miyon florin di WEB y regala un compania priva mescos a sosode cu APA N.V. pa menciona algun ehempel di Neoliberalismo y Privatisacion. ANSA, Aruparking, Laboratorium, Cuido di nos grandinan afecta, Salud publico na werki (Hospital di 1 Biyon), deporte y arte elimina, cuido special elimina, cuido social manera Casa Cuna elimina, Serlimar, ATA, tur a wordo usa den un maneho Neoliberal. Ta aumenta impuesto directo y impuesto indirecto y pesey no tin poder di compra mas y nos economia ta stanca desde 2015. Segun Rapport di Centrale Financiele Toezicht (CFT), TUR Compania estatal ta den rood. 

MEP ta inverti den pueblo 
Ora MEP ta den gobierno ta usa nos forsa economico pa balansa e peso den e diferente clasenan economico di nos pais. Ta usa fondonan di nos companianan estatal pa alivia e costo di bida di nos pueblo. Gobierno di MEP a inverti den tecnologia nobo manera Parke Vader Piet, WEB y Elmar, Serlimar y Dump na Parkietenbos, soluciona problemanan den cuido medico, traha un Istituto Medico di San Nicolas, inverti den instrumentonan academico: biblioteca traha y renoba school, traha casnan social, duna tereno na pueblo, respeta trias politica, fortifica nos structura estatal, duna Arubanonan profesional honor di carga funcionnan halto den nos democracia. No laga AVP sigui manipula e realidad den maneho.

Corupcion organiza y structura
Entre 2001 y 2009 nos tawata tin recesion na Merca, caso Nathaly Holloway, 911 y nunca MEP a redobla e cantidad di ambtenaar y arbeidscontractantnan, duna hala di garantianan miyonario manera Citgo 500 Miyon florin, TRIPLIFICA nos debe nacional, aumenta nos deficit te na 9.6%, aumenta pensioen di biehes te na 65 aña y kita 60.000 florin den 5 aña di nos pueblo, perhudica nos pensionadonan di APFA, entrega nos Autonomia, maneho narcocomplaciente segun State Department di Merca, corupcion organiza y structura di varios Minister. Criminalidad, ilegalidad, desempleo y pobresa structural hamas bisto. 

Ta tempo pa cambio dia 22 di September. Vota pa Movimiento Electoral di Pueblo (MEP) cu ta buta interes general prome cu interes personal y special. No vota pa partidonan cu agenda scondi cu hala di comerciante den statuut pa sigui abusa di nos digno pueblo y enriquece nan mes.

Expresionnan haci den e articulo aki no necesariamente ta refleha opinion di ArenaPoliti.co