{idkey=3118b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5490-upp-mayoria-absoluto-no-ta-e-formula-di-gobernacion-cu-nos-pueblo-ta-warda-riba-dje%3FItemid%3D101][title=UPP%3A+%E2%80%9CMayoria+Absoluto%E2%80%9D+no+ta+e+formula+di+gobernacion+cu+nos+Pueblo+ta+warda+riba+dje][desc=+Den+careda+di+siman+pasa+y+fin+di+siman+tabata+tin+expresionnan+haci+tocante+e+meta+di+un+mayoria+absoluto+di+partidonan+politico.+UPP+ta+reacciona+aki%2C+no+pa+contradeci+of+coregi+e+partido+politico%2C+ni+e+candidatonan+of+parlamentario%2C+cu+a+haci+e+expresion+aki%2C+ya+cu+ta+nan+bon+derecho+pa+tin+nan+opinion%2C+deseo+y+forma+di+hiba+campa%C3%B1a.+Na+final+e+mester+keda+e+decision+di+e+electorado.%26amp%3Bnbsp%3BUPP+ta+referi+aki+na+e+declaracionnan+%26amp%3Bnbsp%3Bdi+varios+integrantenan+di+e+partidonan+cu+ta+considera+]}

Den careda di siman pasa y fin di siman tabata tin expresionnan haci tocante e meta di un mayoria absoluto di partidonan politico. UPP ta reacciona aki, no pa contradeci of coregi e partido politico, ni e candidatonan of parlamentario, cu a haci e expresion aki, ya cu ta nan bon derecho pa tin nan opinion, deseo y forma di hiba campaña. Na final e mester keda e decision di e electorado. 

UPP ta referi aki na e declaracionnan  di varios integrantenan di e partidonan cu ta considera nan mes awor como "partidonan grandi", tocante e rumbo cu e partidonan aki ta bayendo, esta di un mayoria absoluto. Expresionnan di  politiconan dota cu un populismo extremo, primintiendo hopi cos y hungando riba sentimento di hende. Pa colmo, enbes di a suavisa e expresion aki, por a ripara reaccion riba e comentario rond di expresionnnan aki, den defensa di un e deseo di un mayoria absoluto. Esaki tambe ta loke  a wordo vocifera diasabra durante  programanan radial. Aki a elabora riba esaki, basa riba e criticanan cu lo a sali contra e expresion di mayoria absoluto. A referi na radio cu un gobierno di coalicion lo ta uno zwak, mientras cu un gobierno basa riba un mayoria absoluto, esta di un partido so, lo ta uno fuerte y na unda cu bo por haci loke bo kier haci den gobernacion (pero tambe deshaci). Cu otro palabra e rumbo di un mayoria absoluto, ta e forma y e caminda pa realisa e cambionan necesario. 

UPP su reaccion ta mas bien pa informa e pueblo riba resultado te awor di un gobierno basa riba un mayoria absoluto. Desde su fundacion na 2012 UPP a vocifera esaki. Sigur mirando e periodo di 8 aña di MEP, unda a keda sin haci loke mester a wordo haci, pa a evita loke nos como pueblo a bin experiencia e 8 aña di AVP. UPP a mustra caba na 2013 cu tabata tempo, pa pueblo bolbe experiencia un gobierno di coalicion y si ta posibel di un mayoria cualifica (2/3 parti) cu por trece e cambionan legislativo necesario, particularmente na nivel di gobernacion, pa asina logra e Good Governance.

UPP na 2014 y na 2015 a propone pa medio di un Compromiso Nacional, pa bin cu un Frente Nacional, na unda den un Cumbre Nacional, haci palabracionnan concreto pa asina nos por enfrenta e retonan di nos pais, y tambe enfrenta Hulanda pa salbaguardia nos autonomia. Pero e propuesta ey lamentablemente a wordo ingnora dor di TUR partidonan di oposicion.

UPP ta sinti, cu pueblo, incluso den seno di e sostenedornan di e partidonan grandi mes, ta biba e pensamento cu un gobierno di un mayoria absoluto, lo no ta sirbi e interes di nos pueblo, mirando kico a wordo logra te cu awor. Nos por mira con 4 aña mas di AVP, cu un sosten di un mayoria absoluto, a hiba nos mas leu di cas. UPP ta bolbe ripiti loke el a presenta na 2013, cu ta tempo atrobe pa un gobierno di coalision haya e oportunidad pa goberna e pais aki. Por medio di un coalision lo tin e oportunidad pa tin un balance den gobernacion. UPP no ta referi aki na un oportunidad di “yabi”, no na uno di “chantigista” cu any time ta cla pa saca e plug, sino di partidonan cu ta boga pa un Bon Gobernacion basa riba e reglanan di Good Governance, y cu ta vigila cu esakinan ta wordo cumpli cu ne. Asina aki UPP ta kere cu por controla, trece stabilidad y solucionnan, contribuyendo asina na bienestar y trankilidad di e pueblo Arubiano. UPP ta cla pa e reto aki. Y esun cu ta sinti su mes yama pa sostene e reto aki, por tuma contacto cu nos partido na This email address is being protected from spambots. You need JavaScript enabled to view it..


Partido UPP/24 april 2017

Expresionnan haci den e articulo aki no necesariamente ta refleha opinion di ArenaPoliti.co