{idkey=2404b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F573-mike-eman-un-etapa-nobo-di-progreso-pa-aruba%3FItemid%3D101][title=Mike+Eman%3A+Un+Etapa+Nobo+di+Progreso+pa+Aruba][desc=%E2%80%9CE+a%C3%B1a+nobo+nos+dilanti+ta+inicio+di+un+siguiente+etapa+grandi+di+progreso+social-economico+y+di+un+mision+noble+pa+un+sociedad+di+convivencia+y+di+solidaridad+entre+ciudadanonan.+Proyectonan+grandi+ta+inicia+ya+na+principio+di+2015.+Minister+President+Mike+Eman+den+cuadro+di+bishita+den+barionan+y+na+e+instalacion+grandi+di+panelnan+solar+riba+dak+di+fabrica+di+Balashi+a+repasa+proyectonan+grandi+cu+ta+bay+hiba+Aruba+den+un+etapa+nobo+di+progreso.+Infrastructura+E+a%C3%B1a+aki+trabounan+ta+cumi]}
“E aña nobo nos dilanti ta inicio di un siguiente etapa grandi di progreso social-economico y di un mision noble pa un sociedad di convivencia y di solidaridad entre ciudadanonan. Proyectonan grandi ta inicia ya na principio di 2015. Minister President Mike Eman den cuadro di bishita den barionan y na e instalacion grandi di panelnan solar riba dak di fabrica di Balashi a repasa proyectonan grandi cu ta bay hiba Aruba den un etapa nobo di progreso.

Infrastructura

E aña aki trabounan ta cuminsa riba Green Corridor, un avenida di cuater via pa San Nicolas. E proyecto ta inclui tambe un embeyecemento impresionante di e areanan di Sero di Mahuma pa Pos Chikito, Savaneta, Cura Cabay, Mabon, Brazil, Zeewijk te den Centro di San Nicolas. Green Corridor ta inclui un ‘fietspad’ acopla na ‘Linear Park’ di Playa te San Nicolas.

Un otro proyecto sumamente importante, cu hopi gobernacion a papia riba dje, pero nunca por a concretisa, ta cuminsa e aña aki: Ringweg 3. Extension di ‘Watty Vos boulevard, ta bay alivia e congestionamento cu tin den Oranjestad. E trafico cu mester bay pa area di Hotelnan y particularmente Noord, por haci uzo di Watty Vos Boulevard pa evita congestion den Oranjestad y alabes haci posibel cu por yega mas lihe nan destino den e parti mas panort di Aruba. E proyecto aki ta inclui fase 3 y 4 di Linear Park, cu ta extende for di Eagle Beach te na Palm Beach.

Mes importante ta e trabounan cu a cuminsa caba den barionan. Na Noord, Paradera, Santa Cruz, Savaneta y San Nicolas ta construyendo 5 edificio Multifuncional (MFA) moderno cu tin como meta principal mehoracion di acesso na servicio publico den cada districto. Adicionalmente e centronan aki ta bira facilidadnan di encuentro, recreo y formacion pa grandi y chikito. 

Hospital

Hospital a cuminsa caba cu construccionnan cu ta preparacion pa e trabounan grandi y mas visibel cu ta cuminsa e aña aki. E compleho medico actual ta bay wordo renoba den un centro medico totalmente nobo y ta construi un anexo moderno di e edificio actual di Hospital dr. Horacio Oduber. Modernisacion y expansion di e compleho medico na Aruba tin hopi aña riba mesa di planeamento, pero Gabinete Mike Eman i y II a pone hopi enfasis pa haci esaki un realidad.

Wafnan cu enfoke specialisa

Un otro proyecto cu ta hopi aña caba un necesidad serio pa Aruba su actividadnan portuario por desaroya debidamente ta bira un realidad. Na e momentonan aki, trafico maritimo di carga y di turista ta evita desaroyo optimal di cada uno. Cu construccion di Waf nobo di carga na Barcadera, e trafico di carga por cuminsa desaroya mucho mas efectivo y te hasta crea posibilidadnan nobo pa Aruba, como Hub den Caribe. Di otro banda, ta cuminsa tambe cu un proyecto di renobacion y embeyecemento impresionante di waf di Crucero na Playa, haciendo posibel mas desaroyo y mehoracion di e industria di crucero na Aruba.

Sosteniblidad

Aruba su strategia energetico ta pa bira uno sostenibel riba termino largo y cu finalisacion di e ‘Solar Park’ mas grandi den area di Caribe dilanti di Aeropuerto Reina Beatrix, Aruba ta mas cerca cu nunca na su meta. ‘Waste to Energy’ (W2E) ta un proyecto cu tambe ta aporta na esaki y ta esun di mas moderno den Caribe. E di dos Parke di Molina ta cuminsa y tambe desaroyo di Caribe su prome ‘Smart Community’: un area residencial totalmente auto sostenibel. Un otro proyecto importante y cu propositonan multiple ta instalacion di panelnan solar riba tur scol na Aruba. Hunto, tur e proyectonan sostenibel aki, ta trece Aruba cerca di 50% di energia sostenibel cu ta un cifra record den mundo y riba bon caminda pa 100% na 2020.

Enseñansa

Renobacion y modernisacion di enseñanza di nos yiunan tin prioridad mayor den e añanan nos dilanti. Scolnan preparatorio y basico solido. Un programa importante di introduccion di opvang atardi pa alumnonan di scolnan secundario. Educacion secundario cu ta prepara hobennan miho pa sigui studia of pa drenta mercado laboral. Educadornan ta haya un miho posicion huridico. Innovacion y desaroyo di ciencia na Aruba lo haya un luga strategico den e metanan di nos Pais. 

Minister President Mike Eman a expresa cu, “e experiencia cu nos a haya den e ultimo cuater añanan ta duna prioridad na mehora y renoba nos calidad di bida, cu revitalisacion di nos barionan, di nos centronan di ciudad, nos scolnan, espacionan publico, nos sosten pa esnan mas vulnerabel den comunidad, cu reparacion di poder di compra, nos programanan di formacion social, cu nos inversionnan di energia sostenibel, cu nos prome exitonan den haci Aruba un centro di conocemento y un Hub entre continentenan Europeo y Latino Americano, nos a constata cu a crea un sociedad mas uni, un sociedad sostenibel mester ta na alcance di Pais Aruba.” 

Segun Prome Minister Eman, “e meta ta pa duna awor e experiencianan aki, pilarnan y fundeshi fuerte, pa nan ta duradero y promove calidad di bida, progreso comparti y oportunidad husto pa nos hendenan por crece y prospera.”

Expresionnan haci den e articulo aki no necesariamente ta refleha opinion di ArenaPoliti.co