{idkey=3519b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F604-karel-maduro-mep-unda-e-splicacion-di-placa-a-keda%3FItemid%3D101][title=Karel+Maduro+%28MEP%29%3A+Unda+e+splicacion+di+placa+a+keda%3F][desc=Pueblo+di+Aruba+semper+tawata+tin+un+bon+relacion+cu+e+isla+ruman+Bonaire%2C+sin+di+ta+interesa+di+intermedia+den+politica+di+Bonaire+ni+tampoco+den+e+politiconan+Boneriano.+Un+hermandad+di+amor%2C+sinceridad+y+di+calor.+Pero%2C+awor+cu+lider+di+partido+MPB%2C+sr.+Elvis+Tjin+Atjoe%2C+no+a+contradeci+e+ponencia+cu+su+persona+ainda+posiblemente+ta+ricibiendo+un+suma+cuantioso+di+alrededor+di+12.500+florin+pa+luna+como+coordinador+di+Mike+Eman%2C+nos+mester+sigui+cu+e+caso+aki.+Mas+aun%2C+awor+cu+gobierno+di+Aru]}Pueblo di Aruba semper tawata tin un bon relacion cu e isla ruman Bonaire, sin di ta interesa di intermedia den politica di Bonaire ni tampoco den e politiconan Boneriano. Un hermandad di amor, sinceridad y di calor. Pero, awor cu lider di partido MPB, sr. Elvis Tjin Atjoe, no a contradeci e ponencia cu su persona ainda posiblemente ta ricibiendo un suma cuantioso di alrededor di 12.500 florin pa luna como coordinador di Mike Eman, nos mester sigui cu e caso aki. Mas aun, awor cu gobierno di Aruba, den cual sr. Elvis tambe a of ta forma parti ainda, tin plannan serio pa suta e pueblo di Aruba cu medida, door di malgobernacion cu a hiba na crecemento di e debe nacional. Hasta un KB (Koninklijk Besluit) e gobierno di Aruba a haya for di Hulanda como consecuencia. Cos no por ta malo pa e pueblo di Aruba, siendo cu e fondonan di Aruba ta wordo paga na hendenan cu no ta traha ni biba na Aruba!? Nos por compronde si for di unda e oferta a sali, ya cu tanto sr. Otmar Oduber como sr. Mike Eman nan ta dos mandatario iresponsabel y sin consenshi cu no ta importa nan con nan ta gasta e placa di Aruba, contal nan por haya nan gusto complaci. Honestamente mester menciona cu Sr. Elvis tin su estudio, amplio conocemento y experiencia riba su tereno, haciendo cu sr. Elvis no mester di haya placa facil for di ningun gobierno na mundo! Pero aki sr. Elvis a laga su caracter briya manera di ta un probechador. Ta su señora a haya trabow na Aruba na ATA, pero lo mester a bin algun condicion riba mesa durante deliberacion pa e trabow, e.o. cu sr. Elvis tambe tin cu wordo ge-fix pa nan por bin Aruba. Pregunta: kico sr. Elvis a haci durante cu e tawata na Aruba como coordinador di sr. Mike Eman? Un trabow cu a sobresali ta, cu su persona a biaha na 2013 pa Riohacha, Colombia, representando gobierno di Aruba, pa deal cu sr. Kiko Gomez kende tawata gobernador, pa regla e tramitenan pa firma un Memorandum of Understanding (MOU) p’asina gobierno di Aruba e.o. habri un “embahada” na Riohacha. Tambe a ofrece e hendenan di Kiko Gomez, inmunidad politico ora di drenta Aruba! Pasa bay numa na Aeropuerto sin cu ningun hende por controla nan, ni cu si nan ta geplak of si nan ta carga! Actualmente Sr. Kiko Gomez ta cera na Colombia acusa di a laga mata mas cu tres persona. Sr. Mike Eman y sr. Elvis Tjin Atjoe por a busca y haya e credencialnan dudoso di e homber aki, pasobra for di 2008 e ta ser acusa di ta meti den mundo di droga y arma cu e para-militarnan na Guajira. Soort zoekt soort? Na Aruba, mester start un investigacion financiero, un audit di e departamento di ATA. Pasobra tin motibonan suficiente di deroche di placa cu gobierno mes no tin control riba dje. ATA ta e baca di lechi cu sr. Otmar Oduber ta chica na ordo di dia, cu un reserva di alrededor di 80 miyon florin, sin cu ningun instancia tin algo di bisa con e fondonan aki por wordo uza. Un motibo ta cu ATA probablemente tin Tera Group ta haciendo trabownan di marketing pa nan, cobrando schat di placa y tambe tin tur indicacion cu Tera Group lo bay y a haci trabownan tambe na Bonaire pa MPB, si nan drenta gobierno. Di kende Tera Group ta? Kendenan ta haya placa como comision pa campaña politico? Finalmente, sr. Elvis ta gosa di un magno apoyo for di AVP, no laga ningun hende gaña boso! Bonaire mester haya miedo di confía sr. Elvis Tjin Atjoe cu nan voto door cu na Hulandes nan ta bisa: “Wie met pek omgaat, wordt ermee besmet”. AVP a mal goberna Aruba mand’e bancarota y sr. Elvis tawata hunto cu nan como coordinador, y no di ken cu ta, sino di e propio Prome Minister! Nos tin prueba na cantidad di riba potret di hendenan uniforma cu t-shirt di AVP na Aruba y e mesun personanan aki uniforma cu t-shirt di MPB na Bonaire. Kende a paga pa nan bay Bonaire, cu ki meta, nan tambe ta  riba payroll di gobierno di Aruba? Tambe un sostenedor di e propio Otmar Oduber di fam Croes, ta forma parti di e campaña politico di sr. Elvis Tjin Atjoe. Den e storia di Compa Nanzi, probablemente, sr. Elvis Tjin Atjoe mes ta e Cha Tiger. Punto ta cu credencial di un lider maximo mester ta halto, den tur forma y den tur sentido di palabra. Con otro e lo por guia y goberna su pueblo? Bonaire paga tino!

Expresionnan haci den e articulo aki no necesariamente ta refleha opinion di ArenaPoliti.co