{idkey=8643b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F613-rene-herde-avp-e-resultadonan-ta-motiva-pa-sigui-nos-no-ta-cla-ainda-falta%3FItemid%3D101][title=Rene+Herd%C3%A9+%28AVP%29%3A+E+resultadonan+ta+motiva+pa+sigui.+Nos+NO+ta+cla%21+Ainda+falta%21][desc=E+resultadonan+di+e+maneho+cu+gabineten+Mile+Eman+I+y+II+a+hiba+a+duna+resultadonan+concreto+cu+ta+wordo+se%C3%B1ala+den+e+raport+di+IMF+di+siman+pasa%3A+nos+economia+a+sali+di+e+abismo+di+e+caida+di+13%25+di+GDP%2C+desempleo+a+baha+for+di+12%25+pa+7%25%2C+forsa+di+compra+a+stop+di+baha%2C+inversionnan+den+nos+pais+a+crece%2C+turismo+a+crece+y+carga+nos+pais%2C+fondonan+di+pensioen+a+wordo+salba+y+e+consecuencianan+social+a+keda+limita.+Esaki+ta+e+resultadonan+den+li%C3%B1a+grandi+di+cinco+a%C3%B1a+di+maneho+di+e+gobierno+di]}
E resultadonan di e maneho cu gabineten Mile Eman I y II a hiba a duna resultadonan concreto cu ta wordo señala den e raport di IMF di siman pasa: nos economia a sali di e abismo di e caida di 13% di GDP, desempleo a baha for di 12% pa 7%, forsa di compra a stop di baha, inversionnan den nos pais a crece, turismo a crece y carga nos pais, fondonan di pensioen a wordo salba y e consecuencianan social a keda limita. Esaki ta e resultadonan den liña grandi di cinco aña di maneho di e gobierno di AVP, sosteni pa e fraccion di AVP den Parlamento. E resultadonan concreto aki, sigur si bo compara nan cu loke a y ta sostene den paisnan grandi y chikito rond di nos y den resto di mundo, ta duna bon motibo pa sigui cu e maneho actual. E maneho di inverti pa stimula economia y crea trabou, di sostene forsa di compra, di crea un sector economico nobo, di reforma finansa publico y sector publico gradualmente, ta esun cu ta duna e resultado aki. E alternativa cu oposicion (MEP/PDR/CFT) kier ta uno cu lo a hiba Aruba den problemanan financiero, economico y social grandicimo. Pasobra e ta un maneho cu no ta tene cuenta cu pueblo. Djis wak den paisnan den Reino y den mundo, pa bo wak kico e maneho ey a haci cu e paisnan. Conclusion: Aruba ta riba e bon caminda cu e maneho balansa di gobierno di AVP. Pero nos no ta cla ainda!

KICO FALTA
Loke gobierno di AVP a bisa cu lo bay haci pa saca nos pais for di e crisis, a sosode. A usa fondonan publico (placa di pueblo) pa inverti den nos pais, den forsa di compra, den rescata fondonan di pensioen, den inverti den infrastructura y crea trabou. Awor cu economia ta crece atrobe, mester sanea finansa publico. Nos mes a bisa esey prome cu nos a bay eleccion pa pueblo mes ta na altura. Awor ta ehecutando e reforma di finansa publico. Pa logra esey tin cu haci diferente cos hunto of tras di otro: baha gasto di operacion di aparato di gobierno gradualmente; reforma e sistema di belasting di Aruba pa crea un sistema mas balansa di entrada pa cubri tur e gastonan miho; reforma di e sistema di subsidio cu gobierno ta duna; reforma di e sistema di personal den servicio di gobierno; sigui baha gastonan di operacion di gobierno pa esaki cuadra miho cu e nivel di entrada di gobierno awor y den futuro. Saneamento di finansa publico mester bini di e combinacion di mehora entrada y baha gasto hunto. AVP a scohe pa haci esaki den un forma gradual pa evita consecuencianan economico, laboral y social indesea. Segun IMF nos ta bay yega na un situacion di finansa publico balansa na 2018. Hasta cu un surplus chikito. Pero nos no lo ta cla ainda. Pa sigura cu a largo plazo finansa publico keda balansa, e reformanan mester ta structural. No temporal pa algun aña so. Na mes un momento mester sigura cu sector priva ta sigui inverti den nos pais. Pasobra ta solamente si economia sigui crece nos pais ta sigui crea trabou, crea entrada y balansa tur su gastonan. Esey ta e caminda cu nos a scohe. Esey ta e caminda cu nos tin pa cana ainda. E resultado final lo ta un pais economicamente fuerte, financieramente stabiel, cu fondonan social cu ta sigura pensioen y cuido medico, y un gobierno cu finansa publico den balansa.

Expresionnan haci den e articulo aki no necesariamente ta refleha opinion di ArenaPoliti.co