{idkey=1656b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F681-evelyn-wever-croes-reunion-urgente-na-cede-di-mep-ora-cero-a-yega-pa-salba-nos-refineria%3FItemid%3D101][title=Evelyn+Wever-Croes%3A+Reunion+urgente+na+cede+di+MEP.+Ora+cero+a+yega+pa+salba+nos+refineria.][desc=SANTA+CRUZ+%E2%80%93+Den+conferencia+di+prensa+di+MEP+Lider+di+MEP+Evelyn+Wever-Croes+a+elabora+riba+e+situacion+relaciona+cu+desmantelacion+di+refineria.+Nos+a+tuma+nota+di+e+desaroyonan+pa+cu+refinera%2C+y+planes+di+desmantelacion%2C+nos+a+tuma+nota+cu+gobierno+nunca+tabata+tin+intencion+serio+di+habri+e+refineria%2C+y+no+ta+hasiendo+intentonan+serio+pa+purba+un+re-apertura+di+nos+refiner%C3%ADa.+Nos+a+tuma+nota+cu+Valero+tampoco+tin+interes+pa+bende%2C+pasobra+nan+kier+keda+cu+e+waf+pa+transhipment%3B+es+mas%2C+no]}SANTA CRUZ – Den conferencia di prensa di MEP Lider di MEP Evelyn Wever-Croes a elabora riba e situacion relaciona cu desmantelacion di refineria.

Nos a tuma nota di e desaroyonan pa cu refinera, y planes di desmantelacion, nos a tuma nota cu gobierno nunca tabata tin intencion serio di habri e refineria, y no ta hasiendo intentonan serio pa purba un re-apertura di nos refinería. Nos a tuma nota cu Valero tampoco tin interes pa bende, pasobra nan kier keda cu e waf pa transhipment; es mas, nos a comprende cu gobernantenan mes lo ta repartiendo e bolo cu tin cu e desmantelacion aki.

HECHO TA cu Aruba su economia ta stagna y cu esey ta causa mas problema financiero, IMF a caba di confirma esaki un biaha mas; cu e UNICO forma pa stimula nos economia mesora ta cu re-apertura di e refineria; PUES e refineria no solamente ta importante pa desaroyo di San Nicolas, sino e ta e UNICO forma pa salba nos economia y asina salba Aruba; hecho ta tambe cu e refineria no ta solamente un compania, e ta e fuente di trabou pa miles di famia, y e ta e fuente di entrada principal pa gobierno, e ta e garantia pa nos reserva di devisas y pues pa nos florin no core peliger. E refineria ta trese hopi bienestar pa nos pais. Pesey nos di MEP ta conbensi cu e refineria ta di importancia vital pa salba nos pais. Puntra IMF, CFT, Fitch, S&P, Banco Central, TUR lo confirma esaki.

Y tin speransa, pasobra ainda tin hendenan interesa den re-apertura di nos refineria, na e momentonan aki mes! Cu riba termino mas largo nos kier desaroya un industria mas limpi, mas mihor pa medio ambiente, SIGUR. Pero prome nos mester rescata nos pais di e crisis financiero y economico, pa asina nos traha riba un vision di energia limpi realistico riba termino largo. Aruba merece mihor, mucho mihor.


ORA CERO a yega, nos mester tuma accion AWOR pa salba nos refineria y asina salba nos pais. Nos debe esaki na nos yiunan y nan yiunan. Nos mester evita desmantelacion, pasobra tanten cu no tin desmantelacion tin speransa pa re-apertura. Y re-apertura ta e UNICO manera pa salba nos economia y salba nos pais. Una bes a desmantela, nos tin wel di lubida.

CFT y IMF a duna gobierno algun scenario: economia MESTER crese OF mester bin MAS MEDIDA. Unico forma pa economia crese significantemente mesora ta cu re-apertura di e refineria. Esaki ta genera entrada y asina por scapa nos pueblo mas medida, y brinda nos pueblo e alivio cu e tin mester. Pa logra esey, nos mester actua AWOR

PESEY nos ta yama un reunion extra ordinario cu caracter di URGENCIA pa diabierna awor 7.30 p.m. na Cede di MEP pa presenta nos plan di accion na nos militancia y nos votadornan pa PARA DESMANTELACION di refinería.


Nos a asumi un posicion CAUTELOSO tur tempo. Nos a sostene activamente y pasivamente diferente protesta y manifestacion lidera pa otronan, entre otro di grupo di 7, FTA, CAN, Mimi Rosel. Pero awor nos mes mester asumi e liderazgo den esaki. Ora CERO  a yega. Si nos sinta man crusa, Aruba ta sink, nos pueblo ta sink. Y e futuro di nos yiunan ta wordo destrui pa hopi generacion. Aruba merece mihor, nos yuinan merece mucho mihor. Nos so no por hasi’e. Nos ta conta cu abo tambe, pa nos UNI como pueblo, pa bienestar di nos yiunan. Nos UNION ta nos forsa. Solamente e pueblo ta salba e pueblo.

ACUDI diabierna awor na un reunion extra ordinario cu caracter di URGENCIA 7.30 p.m. na Cede di MEP

Expresionnan haci den e articulo aki no necesariamente ta refleha opinion di ArenaPoliti.co