{idkey=4570b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F688-rene-herde-na-mep-haci-tur-feitenonderzoek-pero-haci-e-tur-ora%3FItemid%3D101][title=Rene+Herd%C3%A9+na+MEP%3A+Haci+tur+%26quot%3Bfeitenonderzoek%26quot%3B+pero+haci%26%23039%3Be+tur+ora][desc=Tambe+ora+ta+toca+asuntonan+di+MEP.%26amp%3Bnbsp%3B+Tres+a%C3%B1a+despues+cu+a+cuminsa+cu+e+proyecto+di+renobacion+di+hospital%2C+un+presentacion+completo+na+Parlamento%2C+dos+reunion+cu+e+comision+di+expertonan+di+SOGA+den+Parlamento%2C+hospital+y+departamentonan+di+gobierno+encarga+cu+e+proyecto%2C+despues+di+tur+splicacion+y+transparencia%2C+awor+MEP+kier+haci+un+envestigacion+%28%26quot%3Bfeitenonderzoek%26quot%3B%29.+E+motibo+ta+cu+MEP+kier+para+e+proyecto+di+renobacion+di+hospital.+Segun+MEP+y+algun+den+PDR+lo+tin+corupcion+den+destah]}
Tambe ora ta toca asuntonan di MEP. 

Tres aña despues cu a cuminsa cu e proyecto di renobacion di hospital, un presentacion completo na Parlamento, dos reunion cu e comision di expertonan di SOGA den Parlamento, hospital y departamentonan di gobierno encarga cu e proyecto, despues di tur splicacion y transparencia, awor MEP kier haci un envestigacion ("feitenonderzoek"). E motibo ta cu MEP kier para e proyecto di renobacion di hospital. Segun MEP y algun den PDR lo tin corupcion den destaho di e proyecto. E acusacion di MEP ta dirigi directamente na e expertonan Arubiano. Nun di nan ta politico. Y ministernan mes no ta envolvi den e proyecto. Esaki ta otro preuba di con MEP ta sigui baha su nivel di politica. Pa falta di propio idea, plannan of maneho diferente, MEP ta tira sushi cu speransa pa crea intrankilidad na Aruba.

NIUN PREUBA
Sin niun indicacion, splicacion, argumento of preuba, pa di tanto biaha e partido MEP kier para e proyecto bou acusacion di corupcion! Den henter e storia di corupcion MEP kier hinca tur hende y tur instancia, lubidando cu ta e mes un expertonan Arubiano, den SOGA cu MEP mes a crea, ta encarga cu henter e proceso di preparacion y destaho publico. E rol di gobierno den henter e proceso aki ta di inicia e proceso di renobacion y paga e huur di e edifico mas oro. E edificio di hospital cu ta bay wordo renoba ta di SOGA. Den tur nan tiramento di sushi cu no ta na interes di niun otro partido cu ta MEP so. MEP ta bolbe lubida cu e sosten pa e hospital ta amplio. Den comunidad y bou personal y docternan di hospital mes. E meta di MEP ta pa para e proyecto y crea intrankilidad den hospital y den nos comunidad. Esey y nada mas! Yuda hiba Aruba dilanti no ta ni drenta nan cabez!

Como lider di e fraccion di AVP den parlamento mi a pidi e lider di MEP pa presenta sikiera un indicacion di corupcion. Maske ta un tiki preuba di su acusacionnan. A pidi'e pa presenta e preuba aki PROME cu e Reunion Publico di diahuebs mainta riba e tema aki. Pero te na e momento aki e lider di MEP no a cumpli (atrobe). MEP mes no tin preuba, ni niun indicacion, pero ta pidi pa bay haci envestigacion di e proyecto (=feitenonderzoek). Ta cla: MEP mes no tin niun preuba. E hendenan encarga cu e proyecto ta hende integro y responsabel. E motibo di e envestigacion di MEP ta pa tarda e proyecto y pone Aruba perde placa door di e tardansa.

CLARIDAD SEMPER
AVP semper ta na fabor di claridad y transparencia completo den tur asunto! Asina nos a traha y semper nos lo sigui traha asina. Pa MEP e transparencia y hacimento di envestigacion mester sosode ora ta toca otro hende y otro partido so. Den casonan di MEP si nunca kier "feitenonderzoek".  Den casonan manera di e accidente di e miembro di fraccion di MEP, no a ni laga polis yega pa por haci nan trabou di "feitenonderzoek". Den e caso di e cuenta di banco di e lider di MEP, e caso di desorden den un bar publico, den caso di dunamento di permiso y contract na oficina priva, e caso di firmamento di contract illegal pa huur edificio di famia, e caso di contract pa pone "sleeping polis" riba caya y tur e casonan cu ta wordo menciona den e raport di WODC, MEP no a wak necesidad di "feitenonderzoek". Pa MEP atrobe e regla di trato preferencial ta conta: ley ta conta pa tur, menos pa MEP! Segun MEP mester envestiga tur hende na Aruba y tur cos di otronan, menos ora ta trata di MEP.

Expresionnan haci den e articulo aki no necesariamente ta refleha opinion di ArenaPoliti.co