{idkey=3044b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F803-mep-awor-chris-dammers-kier-pa-pueblo-kere-cu-ta-mas-cu-890-miyon-florin-a-ser-inverti-den-e-economia-arubano%3FItemid%3D101][title=MEP%3A+Awor+Chris+Dammers+kier+pa+pueblo+kere+cu+ta+mas+cu+890+miyon+florin+a+ser+inverti+den+e+economia+Arubano][desc=Segun+CFT+menos+cu+1%25+di+gastonan+di+gobierno+a+bay+na+inversionnan%21%26amp%3Bnbsp%3BTa+increibel+con+partido+AVP+kier+sigui+manipula+y+troce+mente+di+pueblo+y+awor+den+nan+ansha+y+desesperacion+kier+pinta+un+panorama+sumamente+bunita+di+e+supuesto+inversionnan+miyonario+cu+nan+a+haci+den+e+economia+Arubano+durante+e+ultimo+a%C3%B1anan.+Hecho+ta+cu+despues+cu+CFT+den+su+rapport+di+29+december+2014+a+declara+cu+menos+cu+1%25+di+e+gastonan+total+di+gobierno+a+ser+usa+pa+inverti+den+e+pais+aki+na+2014+%26amp%3Bnbsp%3By+tambe]}
Segun CFT menos cu 1% di gastonan di gobierno a bay na inversionnan! 

Ta increibel con partido AVP kier sigui manipula y troce mente di pueblo y awor den nan ansha y desesperacion kier pinta un panorama sumamente bunita di e supuesto inversionnan miyonario cu nan a haci den e economia Arubano durante e ultimo añanan. Hecho ta cu despues cu CFT den su rapport di 29 december 2014 a declara cu menos cu 1% di e gastonan total di gobierno a ser usa pa inverti den e pais aki na 2014  y tambe despues cu den e rapport di IMF di dia 13 di februari 2015 a enfatiza cu tin un tardansa enorme den ehecucion di proyectonan di gobierno (“investment delays”), diripiente AVP a manda su parlamentario Chris Dammers haci ‘damage control’ riba tur e declaracionnan aki haci door di CFT y IMF.

Proyectonan PPP
Den un comunicado emiti na cuminsamento di e siman aki, Chris Dammers un biaha mas kier manipula mente di pueblo treciendo padilanti un lista di proyectonan di Gabinete Eman cu ta suma na un total di 897 miyon florin na inversion den nos economia durante e ultimo 5 añanan.

Analisando e lista di proyectonan cu su gobierno di AVP lo a inverti den economia nos ta haya proyectonan PPP (Pa Pueblo Paga) manera Hospital (253 miyon), Green Corridor (135 miyon?), Ringweg 3 (185 miyon?), 5 MFA (22.8 miyon?), cualnan tur ta proyectonan cu nan gastonan absolutamente NO ta core pa presupuesto di gobierno ya cu e proyectonan PPP lo bay cuminsa wordo paga aki algun aña mediante e medida di Financial Transfer Tax cu gobierno kier bin cune ainda.

Proyectonan FDA
Den e lista di Chris Dammers ta aparece tambe proyectonan cu a y lo wordo financia PAFOR di presupuesto di gobierno mediante  FDA manera e Street car, renobacion di centro di ciudad, renobacion di algun school, edificio Cocolishi, edificio di Dimas y Labor etc. Te hasta e biaha aki Chris Dammers y su gobierno a bolbe ‘lubida’ di pone riba e lista  e construccion di e school HAVO/VWO pa Noord y cual proyecto tabata planifica caba na 2009 door di Gabinete Oduber, cu mapa, bestek y financiamento cla door di FDA!

Proyectonan FCCA
Tambe den e lista ta aparece proyectonan cu a y ta wordo financia door di FCCA, esta e embeyecimento di e barionan caminda e casnan social ta ubica y cual tur e casnan aki den pasado a ser construi pa gobierno di MEP, ya cu Gabinete Mike Eman mes no a yega di construi un solo cas social na Aruba.

Proyectonan ‘pendiente’
Y pa duna un toke di hilaridad na e comunicado di Chris Dammers, den su lista ta aparece un gran cantidad di proyecto cu te ainda ta ‘pendiente’ pa wordo ehecuta, pero cu Chris ta haci como sifuera cu su gobierno ya a saca placa caba pa ehecuta esakinan, siendo cu tur hende sa cu por ehempel Colegio Frere Bonifacius, Colegio San Nicolas, Rosa College, Colegio San Antonio tin añanan caba ta para putri wardando riba nan renobacion.

Na kico a inverti 2.4 biyon florin?
Pues e lista di proyectonan fantasma di Chris Dammers ta un cos di hari y caminda ta bisto cu su persona kier manipula y tuma pueblo haci un biaha mas. E lista aki ta un tutu completo, yena cu mentira, trocemento, astucia y falsedad! Hecho ta cu lo ta bon pa Chris Dammers biba cu e realidad cu un gran parti di e proyectonan menciona no a ser ehecuta, pues cu te ainda pueblo no por wak y fula unda nan placa a bay manera cu e ta conclui den su comunicado. Alavez mayoria di e proyectonan nan financiamento NO ta sali for di caha di gobierno!

Finalmente lo ta bon pa Chris Dammers splica pueblo si den kico su gobierno di AVP a inverti e mas cu 600 miyon florin cu Gabinete Oduber a laga atras na 2009, e.o. den e Placa di Plant y BBO di Valero y tambe e mas cu 1.8 biyon florin cu nan a fia den 5 aña, aumentando nos debe nacional te cu 82% di GDP.

Expresionnan haci den e articulo aki no necesariamente ta refleha opinion di ArenaPoliti.co