{idkey=9034b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F855-evelyn-wever-croes-schoolgeld-di-250-florin-no-ta-baha%3FItemid%3D101][title=Evelyn+Wever-Croes%3A+Schoolgeld+di+250+florin+no+ta+baha][desc=NO+TIN+BOLUNTAD+DEN+AVP+PA+SOLUCIONA+PROBLEMA+DI+SKOA+ORANJESTAD+%E2%80%93+Parlamento+a+yama+e+minister+encarga+cu+ensenjansa+pa+purba+yega+na+un+solucion+di+e+impasse+entre+Gobierno+y+SKOA.+E+reunion+aki+a+tuma+lugar+diaranson+1+di+april%2C+y+a+dura+16+ora.SKOA+ta+dirigi+e+scolnan+catolico+na+Aruba%2C+y+tin+mas+o+menos+10+mil+studiante.+Mayornan+ta+paga+un+contribucion+den+gastonan+di+nan+yiu+pa+actividadnan+fuera+di+ensenjansa.+Pasobra+segun+nos+leynan+nacional+y+tratadonan+internacional+di+cual+nos+pai]}
NO TIN BOLUNTAD DEN AVP PA SOLUCIONA PROBLEMA DI SKOA

ORANJESTAD – Parlamento a yama e minister encarga cu ensenjansa pa purba yega na un solucion di e impasse entre Gobierno y SKOA. E reunion aki a tuma lugar diaranson 1 di april, y a dura 16 ora.
SKOA ta dirigi e scolnan catolico na Aruba, y tin mas o menos 10 mil studiante. Mayornan ta paga un contribucion den gastonan di nan yiu pa actividadnan fuera di ensenjansa. Pasobra segun nos leynan nacional y tratadonan internacional di cual nos pais tambe ta parti, gastonan di ensenjansa mes, esta salario di docente, huur y mantencion di edificio, mester core pa cuenta di gobierno.
Debi cu SKOA su subsidio a keda atras y no ta cubri tur e gastonan mas, SKOA a anuncia di lo bin cu schoolgeld di 250 florin pa studiante, y si tene cuenta cu tin 10 mil studiante na e scol, esaki kiermeen cu SKOA lo haya 2.5 miyon florin cu esaki.
SKOA tabata tin un atraso den entregamento di cuentanan anual, pero recientemente a logra entrega te cu anja 2010. Esaki ta pone cu awor si nan por haya e parti di e subsidio cu gobierno a retene di e anjanan te cu 2010. Segun e cuenta anual 2010 cu parlamento por a mira durante e reunion, e debe aki ta 4 miyon florin. Y debi cu Gobierno no tin placa y no por paga SKOA, SKOA a bai cobra mayornan.Pero, si SKOA tin mester di 2.5 miyon florin, y Gobierno debe SKOA 4 miyon florin, no ta husto cu ta mayornan mester bai paga asina tanto.

SOLUCION DI MEP
“Pesey a cuminsa un accion di firma di mayornan contra e aumento aki, pasobra den e temponan aki di tanto medida, esun aki no ta algo cu mayornan por paga facilmente. Pa nos tabata hopi importante pa sa exactamente cuanto gobierno debe SKOA, y pa conbense gobierno pa paga su debe na SKOA. Y si gobierno no tin e placa, nos a propone e minister pa busca e placa na FDA, of di e placa cu mester bin di Union Europeo. Y si esey no ta posibel, nos a propone pa saca e placa di e fondonan cu a wordo poni disponibel pa Rietveld Academie y TNO di mas o menos 3 miyon. Pasobra e placa ey ta poni pa stimula conosemento riba e nivel mas halto. Pero tanto bal bo inverti den conosemento riba e nivel di mas halto, si bo fundeshi den ensenjansa ta swak! Un directiva di scol grandi den nos ensenjansa basico, SKOA, ta pasando den problemanan financiero serio debi na e problemanan financiero di pais Aruba. E gobierno aki en bes di fortifica e base, ta prefera di neglisha e fundeshi, laga SKOA bai bancarota, y inverti den conosemento avansa, Rietveld y TNO. Nos kier un alternativa pa e medida di 250 florin y pesey nos kier pa en bes cu ta inverti asina tanto placa den conosemento avansa, reparti e fondonan entre e ensenjansa basico y avansa.
Nos a presenta un mocion pa urgi gobierno paga su debe na SKOA y delibera cu SKOA con pa logra pa no hisa e schoolgeld. Lamentablemente e parlamentarionan di AVP no a sostene e mocion aki, pero a scohe pa gobierno sigi cu su plan pa bai Corte. Nos ta lamenta esaki, pasobra e ta un proceso cu por tarda masha hopi mes, y si Gobierno gana of si Gobierno perde, toch e mester paga su debe na SKOA. Pues nada a cambia, Gobierno ta prefera di bai Corte y SKOA ta keda para ariba cu e schoolgeld mester aumenta”, segun lider di MEP Evelyn Wever-Croes

KIKO PA HASI
Nos ta recomenda mayornan pa no paga e schoolgeld ainda, y sostene e accion di firma CONTRA e aumento di schoolgeld, pa asina pone mas presion riba SKOA y Gobierno pa nan bai soluciona NAN problema nan mes, sin mester cobra nan problema riba lomba di e mayornan. Y keda pendiente pa e caso den Corte.

Expresionnan haci den e articulo aki no necesariamente ta refleha opinion di ArenaPoliti.co