{idkey=9472b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F92-gabinete-me-ii-a-pidi-web-pa-instala-panelnan-solar-riba-dak-di-scolnan-na-aruba%3FItemid%3D101][title=Gabinete+ME+II%3A+A+pidi+WEB+pa+instala+panelnan+solar+riba+dak+di+scolnan+na+Aruba][desc=Den+fin+di+siman+tras+di+lomba+Gabinete+Mike+Eman+II+a+instala+un+%26quot%3BAdvisory+Board%26quot%3B+cu+mester+controla+cu+lo+cumpli+cu+e+meta+poni+pa+2020%2C+ora+cu+Aruba+mester+ta+independiente+di+e+energia+produci+kimando+combustiblenan+fossil.+Esaki+Prome+Minister+Mike+Eman+a+anuncia+durante+un+conferencia+di+prensa+dialuna+mainta+tempran.+E+Hunta+aki+ta+consisti+di+representantenan+di+TNO%2C+Carbon+War+Room%2C+Web%2C+ELMAR%2C+Utilities+Aruba%2C+Ministerio+di+Asuntonan+di+Energia%2C+Consehero+di+Minister+di+Energia+Richar]}

Den fin di siman tras di lomba Gabinete Mike Eman II a instala un "Advisory Board" cu mester controla cu lo cumpli cu e meta poni pa 2020, ora cu Aruba mester ta independiente di e energia produci kimando combustiblenan fossil. Esaki Prome Minister Mike Eman a anuncia durante un conferencia di prensa dialuna mainta tempran.

E Hunta aki ta consisti di representantenan di TNO, Carbon War Room, Web, ELMAR, Utilities Aruba, Ministerio di Asuntonan di Energia, Consehero di Minister di Energia Richard Arends, Angelique Peterson y Prome Minister Mike Eman.

Prome Minister Eman a splica cu den fin di siman caba e hunta a reuni pa repasa loke a logra caba segun e metanan poni, mientras cu a pone riba papel algun punto importante pa futuro. Un di e puntonan aki ta cu pa inicio di 2016 Aruba lo mester a surpasa 50%  di capacidad di energia renobabel. "E reto e ora lo ta, e resto di 50%," e mandatario a duna di conoce.

Den e reunion menciona, a discuti cu e deseo ta pa e companianan di utilidad hunga un rol mas prominente pa ta e operadornan y esnan cu lo carga produccion di e siguiente 50% di energia limpi. Di e forma aki, e lo tin su impacto positivo tambe den e finanza di e companianan di utilidad. "E ta un punto di principio importante cu a keda dicidi y pa cual e companianan di utilidad mes ta sinti un entusiasmo pa percura pa e resto di 50% cu falta di energia renobabel pa yega 100%." E mandatario a splica cu e situacion actual ta cu mayoria di e proyectonan aki ta den man di companianan priva y a menciona e Parke di Molina di Biento, Parke Solar (cu lo ta esun mas grandi den Caribe). Si e companianan aki ta bay ta e unico accionistanan den e proyectonan di futuro y ki tipo di energia lo bay produci, no a wordo discuti ni dicidi ainda. "Esaki ta algo cu ta keda completamente den man di e companianan di utilidad," Eman a bisa.

AMPLIA CAPACIDAD PANEL SOLAR

E di dos punto cu e mandatario a menciona ta ampliacion di e cantidad di panelnan solar na Aruba. El a splica cu estudio haci a demostra cu tin espacio pa amplia, sin haci mucho inversion grandi den p.e. bateria pa mantene stabilidad riba grid, cu un otro 5 pa 6% di megawatt di energia solar riba e red di coriente.

Den cuadro di esaki, durante e reunion di e hunta un apelacion a wordo haci riba e compania WEB pa bini cu un proyecto cu lo tin un impacto comunitario grandi. A pidi e experto evalua pa instala 6 megawatt di coriente solar riba tur e dak di scolnan rond Aruba pa por haya energia renobabel na e scolnan. Di e forma aki haci e transicionnan mas facil cu e scolnan por instala airco na e scolnan. Specialmente awor cu Gabinete Mike Eman II ta introduciendo e pilot-project di Traimerdia pa scolnan secundario. "Scolnan cu airco lo haci un diferencia grandi y mas atractivo pa e studiantenan."

E mandatario a bisa cu WEB mester evalua tur e aspecto di e proyecto ainda, pero e ta hopi optimista cu e proyecto lo por tuma luga, y produci energia renobabel pa e scolnan. "Decisionnan importante a wordo tuma. Tin bes tin idea y visionnan cu nos ta compronde ta parce dificil pa nos pais por alcansa, ta parce algo hopi ambicioso y hasta inalcansabel, pero asina e ta cu visionnan cu ta premira algo mas leu den futuro, pero hopi escencial pa hiba bo pais mas leu."

Expresionnan haci den e articulo aki no necesariamente ta refleha opinion di ArenaPoliti.co